ព័ត៌មានអន្ដរជាតិ

គ្រូទាយល្បីនៅថៃ អួតថា ខ្លួនជាព្រះម៉ែកាលី ដែលអាចដឹងហេតុការណ៍ក្នុងប្រទេស នាពេលខាងមុខ

បានផុស

១១ ខែ មុន

នៅ

ថ្ងៃសុក្រ ២២ សីហា ២០២៥

ដោយ

គ្រូទាយដ៏ល្បីប្រចាំប្រទេសថៃ Mor Plai បញ្ជាក់ថា នាងមិនមែនជាគ្រូទាយទេ ប៉ុន្តែជាឧបករណ៍ផ្ទុកវិញ្ញាណដឹងហេតុការណ៍ដែលប្រុងនឹងកើតឡើងក្នុងប្រទេសថៃនាពេលមុខ និងអាចមើលឃើញបាតុភូតធម្មជាតិតាំងពីកុមារភាព នាងថែមទាំងអះអាងទៀតថា ខ្លួនជាព្រះម៉ែកាលី ដែលទេពធីតានៃព្រហ្មញ្ញសាសនា ឬហិណ្ឌូសាសនា។

**គ្រូទាយដ៏ល្បីប្រចាំប្រទេសថៃ Mor Plai រូបភាព៖Sanook**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម thethaiger បានចុះផ្សាយថា គ្រូទាយស្រីដ៏ល្បីរូបនេះ នាពេលកន្លងមកធ្លាប់ទស្សន៍ទាយពីជោគវាសនារបស់អ្នកយោបាយថៃជាច្រើន រហូតដល់កេរ្តី៍ឈ្មោះរបស់នាង បានក្លាយជាប្រធានបទដែលមនុស្សជាច្រើនតាមស្វែងរក និងពិភាក្សាជារៀងរាល់ថ្ងៃ។ ទោះបីជាយ៉ាងណាក៏ដោយ ដោយសារតែភាពល្បីសុះសាយមួយនេះ បាននាំឲ្យនាងរងការគំរាមពីអ្នកមានអំណាច ដែលខ្លួនហ៊ានទស្សន៍ទាយមិនសមទំនងពីជោគវាសនាប្រទេសថៃ ដែលនោះនាំឲ្យរូបនាងស្ថិតក្នុងអារម្មណ៍តានតឹងខ្លាំង រហូតត្រូវបញ្ជូនទៅមន្ទីរពេទ្យភ្លាមៗ។

យ៉ាងណា បន្ទាប់ពីសុខភាពហាក់ដូចជាបានធូរស្បើយឡើងវិញ គ្រូទាយស្រី Mor Plai ស្រាប់តែលេចមុខផ្ដល់បទសម្ភាសន៍ក្នុងកម្មវិធី Club Friday Show ដែលត្រៀមចាក់ផ្សាយ នៅថ្ងៃសៅរ៍ ទី២៣ ខែសីហា ឆ្នាំ២០២៥។

នៅលើទំព័រ CHANGE2561 បានចេញផ្សាយសម្រង់បទសម្ភាសន៍ខ្លីៗរបស់គ្រូទាយដ៏ល្បីរូបនេះ នៅពេលមួយដែល ពិធីករបានសួរថា តើវិជ្ជាជីវៈរបស់នាងអាចត្រូវបានគេហៅថា គ្រូទាយដែរឬទេ? ភ្លាមៗនោះដែរ Mor Plai បញ្ជាក់យ៉ាងដូច្នេះថា តាមពិតទៅនាងមិនមែនជាគ្រូទាយទេ តែអាចដឹងជោគវាសនានាថ្ងៃខាងមុខ និងជាមនុស្សមើលឃើញអមនុស្សតាំងតែពីនៅវ័យក្មេង។

ជាងនេះថែមទៀត គ្រូទាយដដែលនោះបានទម្លាយថែមទៀតថា «ខ្ញុំធ្លាប់មើលឃើញស្ត្រីម្នាក់ឈរនៅចំពោះមុខខ្ញុំ ហើយនិយាយថា ខ្ញុំជាព្រះនាងកាលី។ ខ្ញុំធ្លាប់មានអារម្មណ៍ស្ពឹកស្រពន់ដូចមនុស្សវិញ្ញាណ។ ខ្ញុំបិទភ្នែកហើយយំមិនអាចគ្រប់គ្រងខ្លួនឯងបានទេ។ ប៉ុន្តែក្នុងរូបភាព ខ្ញុំបានឃើញបុរសម្នាក់មានពស់ និងស្ត្រីម្នាក់ទៀតជិះសត្វខ្លា និងមានដៃជាច្រើនលើខ្លួនរបស់ពួកគេ»។

យ៉ាងណាមិញ ត្រឹមវីដេអូឃ្លិបមិនដល់១នាទីរបស់គ្រូទាយជនជាតិថៃនេះ បានធ្វើឲ្យមហាជនជាច្រើនបញ្ចេញមតិក្នុងន័យពីរខុសៗគ្នា ក្នុងពេលដែលមួយក្រុមជឿលើសម្ដីគ្រូទាយស្រីនេះ ព្រោះកន្លងមកប្រជាជនថៃក៏មានជំនឿទៅលើការទស្សន៍ទាយជោគវាសនា ព្រមទាំងអប្បិយជំនឿយ៉ាងមុតមាំបំផុត ខណៈដែលអ្នកផ្សេងទៀត ហាក់មិនសូវជឿថា នាងជាព្រះម៉ែកាលីដូចការះអាងនោះទេ៕