ទុក្ខជាន់ទុក្ខ! កំពុងរងគ្រោះខ្លាំងដោយកូវីដផង ពេលនេះ ឥណ្ឌា ជួបការរញ្ជួយដីដ៏ខ្លាំងក្លាមួយទៀត

យោងតាមការស្ទង់ភូគព្ភសាស្ត្រសហរដ្ឋអាមេរិក (USGS) បាននិយាយថា ការរញ្ជួយដីកម្រិត ៦.៤ រ៉ិចទ័រ បានវាយប្រហាររដ្ឋ Assam ប្រទេសឥណ្ឌា នៅព្រឹកថ្ងៃពុធនេះ ប៉ុន្តែមិនទាន់មានសេចក្តីរាយការណ៍ភ្លាមៗអំពីអ្នកស្លាប់ និងរបួសនោះទេ ។

USGS បាននិយាយថា ការរញ្ជួយដីបានវាយប្រហារនៅជម្រៅ ៣៤ គីឡូម៉ែត្រ ខណៈចំណុចកណ្តាលរបស់វានៅជិតទីប្រជុំជន Dhekiajuli ចម្ងាយ ១៤០ គីឡូម៉ែត្រ ភាគខាងជើងនៃទីក្រុង Guwahati រដ្ឋ Assam ។

ដំបូងឡើយ មជ្ឈមណ្ឌលនៃគ្រោះរញ្ជួយដីនៅសមុទ្រមេឌីទែរ៉ាណេអឺរ៉ុប (EMSC) បានដាក់កម្រិតការរញ្ជួយដីនេះត្រឹម ៦.២ រ៉ិចទ័រប៉ុណ្ណោះ ។

ទន្ទឹមនោះ ការរំញ័រដ៏ខ្លាំងក្លាម្ដងហើយម្ដងទៀត ក៏ត្រូវបានកើតមានឡើងនៅតំបន់ភាគឥសាន្តនៃប្រទេសឥណ្ឌា និងប្រទេសជិតខាង ប៊ូតាន ផងដែរ ដោយបង្ខំឲ្យមនុស្សរាប់រយនាក់រត់ចេញពីផ្ទះ ។

បើតាមសម្តីរបស់មន្រ្តី នៅទីភ្នាក់ងារជាតិគ្រប់គ្រងគ្រោះមហន្តរាយឥណ្ឌា ដែលសុំមិនបញ្ចេញឈ្មោះបាន្យដឹងថា មន្រ្តីនៅទីភ្នាក់ងារមួយនេះ ក៏កំពុងវាយតម្លៃរបាយការណ៍ នៃការបំផ្លិចបំផ្លាញ និងការស្លាប់ និងរងរបួស បន្ទាប់ពីគ្រោះរញ្ជួយដីនេះផងដែរ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ India Today / CNA

ចុចអាន ៖ វីរុសដែលឆ្លងសាហាវនៅ ឥណ្ឌា ពេលនេះចូលដល់ប្រទេសចំនួន១៧ហើយ

ចុចអាន ៖ មន្ទីរពេទ្យក្លាយជាសមរភូមិប្រយុទ្ធ! វីដេអូ ពលរដ្ឋ ឥណ្ឌា នាំគ្នាវាយគ្រូពេទ្យ ព្រោះខឹងមិនព្យាបាលសាច់ញាតិ