អ្នកជំងឺកូវីដចំនួន ៥៣នាក់នៅស្វាយរៀងត្រូវបានអនុញ្ញាតឲ្យចេញពីមន្ទីរពេទ្យវិលត្រឡប់ទៅផ្ទះវិញ

លោក បណ្ឌិត កែរ រដ្ឋា ប្រធានមន្ទីរសុខាភិបាលខេត្ដស្វាយរៀងបានឲ្យដឹងនៅព្រឹកថ្ងៃទី០៤ឧសភានេះថាគិតចាប់ពីព្រឹករហូតដល់យប់ម៉ោង១០ថ្ងៃទី០៣ខែឧសភាមន្ទីរសុខាភិបាលខេត្តស្វាយរៀងបានអនុញ្ញាតឲ្យអ្នកជំងឺកូវីដ‑១៩ ចំនួន៥៣នាក់ស្រី១៦នាក់វិលត្រឡប់ទៅលំនៅដ្ឋានវិញក្រោយព្យាបាលជាសះស្បើយ។

មន្ត្រីសុខាភិបាលខេត្តស្វាយរៀដដែលរូបនេះ បានបញ្ជាក់ថា អ្នកជំងឺទាំងនោះត្រូវបន្តធ្វើចត្តាឡីស័ករយៈពេល១៤ថ្ងៃនៅតាមផ្ទះរៀងៗខ្លួនជាបន្តទៀតនិងអនុវត្តឱ្យបានត្រឹមត្រុវតាមវិធានរបស់ក្រសួងសុខាភិបាលដោយដាក់ខ្លួនឱ្យនៅដាច់ដោយឡែកពីក្រុមគ្រួសារបន្តធ្វើការតាមដានសុខភាពដើម្បីឱ្យប្រាកដប្រជាថាពួកគាត់អស់មេរោគកូវីដ‑១៩នៅក្នុងខ្លួន។

បើតាមលោក កែរ រដ្ឋា រហូតមកដល់ព្រឹកនេះខេត្តស្វាយរៀងមានអ្នកឆ្លងជំងឺកូវីដ‑១៩ក្នុងព្រឹត្តិការណ៍សហគមន៍ ២០កម្ភៈ ចំនួន៣១៥នាក់ក្នុងនោះមានអ្នកជាសះស្បើយចំនួន២៧៥នាក់ស្លាប់ចំនួន៤នាក់និងអ្នកកំពុងសម្រាកព្យាបាលនៅមន្ទីរពេទ្យនៅសល់ត្រឹមតែ៣៥នាក់ប៉ុណ្ណោះ។

ដើម្បីទប់ស្កាត់ជំងឺកូវីដ‑១៩នេះដែរ មន្ទីរសុខាភិបាលខេត្តស្វាយរៀងបានដាក់ក្រុមគ្រូពេទ្យត្រួតពិនិត្យសំណាកដល់អ្នកដំណើរដែលមកពីតំបន់មានហានិភ័យខ្ពស់នៃជំងឺកូវីដ‑១៩ផងដែរ។

លោក បណ្ឌិត កែរ រដ្ឋា បានបន្តថាការដាក់ក្រុមគ្រូពេទ្យនៅក្រោលគោលផ្លូវជាតិ១និងច្រកអណ្តូងត្របែកផ្លូវជាតិលេខ ១៣ នេះគឺអនុវត្តទៅតាមសារាចរ របស់ រាជរដ្ឋាភិបាលសម្រាប់ត្រួតពិនិត្យសំណាករហ័សទៅលើអ្នកធ្វើដំណើរមកពីតំបន់ក្រហម តំបន់លឿងទុំតំបន់លឿងនិងអ្នកដែលមកបេសកកម្មមកខេត្តស្វាយរៀងមានរយៈពេលខ្លីនិងរយៈពេលវែង។

លោកបណ្ឌិត បានបន្ថែមទៀតថាក្រៅពីដាក់គោលដៅនៅទីតាំងទាំងពីរកន្លែងខាងលើនេះហើយមន្ទីរសុខាភិបាលក៏បានយកទីតាំងមណ្ឌលចត្តាឡីស័កកំរិត២ ខេត្តដែលមានទីតាំងស្ថិតនៅឃុំមុខដាស្រុករមាសហែកសម្រាប់ដាក់ក្រុមគ្រូពេទ្យចល័តសម្រាប់ចុះទៅយកសំណាកអ្នកដំណើរទៅដល់ផ្ទះឬនៅមណ្ឌលចត្តាឡីស័កភូមិឃុំនានានៅពេលអាជ្ញាធរមូលដ្ឋានទាក់ទង៕

អត្ថបទ៖សំអឿន