ចង់ទៅលេងទេ! ថៃ ត្រៀមលើកលែងការធ្វើចត្តាឡីស័កសម្រាប់អ្នកទេសចរដែលបានចាក់វ៉ាក់សាំងហើយ ចាប់ពីខែតុលា

ប្រទេសថៃគ្រោងនឹងលើកលែងការធ្វើចត្តាឡីស័កសម្រាប់ភ្ញៀវទេសចរដែលបានចាក់វ៉ាក់សាំងរួច ទៅកាន់ទីក្រុងបាងកក និងគោលដៅទេសចរណ៍ផ្សេងទៀត ចាប់ពីខែតុលា ក្នុងគោលបំណងដើម្បីស្តារឧស្សាហកម្មសំខាន់ៗ ដែលត្រូវបានបំផ្លាញដោយការទប់ស្កាត់ការឆ្លងរាលដាលនៃជំងឺកូវីដ ១៩ ។

អ្នកនាំពាក្យរងរដ្ឋាភិបាលលោកស្រី Traisulee Traisoranakul បាននិយាយថា វិធានការណ៍ថ្មីនេះមានន័យថា មានភាពងាយស្រួលក្នុងការចូលទៅកាន់តំបន់ទេសចរណ៍សំខាន់ៗដូចជា ទីក្រុង Pattaya ខេត្ត Phang Nga កោះ Samui ខេត្ត Krabi និងរដ្ឋធានីបាងកក ជាដើម ។

ការប្រកាសនេះធ្វើឡើង នៅពេលកោះរមណីយដ្ឋាន Phuket ត្រៀមបើកឲ្យភ្ញៀវទេសចរចាក់វ៉ាក់សាំងក្នុងខែកក្កដា ខណៈប្រទេសនេះក៏កំពុងស្វែងរកការចាក់វ៉ាក់សាំងដល់ប្រជាជនរបស់ខ្លួន មុនពេលបើកប្រទេសឡើងវិញ និងមុនពេលចាក់វ៉ាក់សាំងទ្រង់ទ្រាយធំ ចាប់ផ្តើមនៅក្នុងប្រទេសថៃ ។

ទេសចរណ៍ គឺជាប្រភពចំណូល និងការងារដ៏សំខាន់សម្រាប់ប្រទេសថៃ ។ នៅក្នុងឆ្នាំ ២០១៩ ប្រទេសនេះ បានស្វាគមន៍ភ្ញៀវទេសចរចំនួន ៣៩.៩ លាននាក់ ដោយរកចំណូលបានចំនួន ១.៩១ ពាន់លានបាត ស្មើនឹង ៦១.៣២ ពាន់លានដុល្លារអាមេរិក ខណៈចំនួននេះបើធៀបនឹងចំនួនភ្ញៀវមកដល់ ៦.៧ លាននាក់កាលពីឆ្នាំមុន ។

គួររំឭកថា ចាប់តាំងពីឆ្នាំមុន ប្រទេសថៃបានរឹតបន្តឹងដំណើរការទិដ្ឋាការ និងតម្រូវឲ្យភ្ញៀវទេសចរទាំងអស់ និងប្រជាជនដែលវិលត្រឡប់មកប្រទេសវិញ ធ្វើចត្តាឡីស័ករយៈពេល ១៤ ថ្ងៃនៅក្នុងកន្លែងដែលរដ្ឋាភិបាលបានកំណត់ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ថៃ ត្រៀមចាក់វ៉ាក់សាំងដល់ជនបរទេសដែលរស់នៅក្នុងប្រទេសខ្លួន

ចុចអាន ៖ ថៃ រំពឹងទទួលវ៉ាក់សាំង Pfizer រហូតដល់ ២០ លានដូស នៅពាក់កណ្តាលឆ្នាំនេះ