កំពុងរងគ្រោះខ្លាំងដោយកូវីដផង ពេលនេះ ហ្វីលីពីន ប្រកាសស្ថានភាពអាសន្នគ្រោះមហន្តរាយជំងឺមួយទៀតរហូតដល់ចុងឆ្នាំ

យោងតាមសារព័ត៌មាន Malacañang បានឲ្យដឹងនៅថ្ងៃអង្គារនេះថា លោកប្រធានាធិបតីហ្វីលីពីន Rodrigo Duterte បានប្រកាសពីស្ថានភាព នៃគ្រោះមហន្តរាយនៅទូទាំងប្រទេស ដោយសារតែជំងឺគ្រុនផ្ដាសាយជ្រូកអាហ្វ្រិក រហូតដល់ចុងឆ្នាំនេះ ខណៈប្រទេសនេះ ក៏កំពុងរងគ្រោះខ្លាំង ដោយសារជំងឺកូវីដ ១៩ ។

អ្នកនាំពាក្យប្រធានាធិបតី លោក Harry Roque បាននិយាយថា លោកប្រធានាធិបតី Duterte បានចុះហត្ថលេខា លើសេចក្តីប្រកាសមួយ ដែលប្រកាសពីស្ថានភាព នៃគ្រោះមហន្តរាយ រហូតដល់ដំណាច់ឆ្នាំនេះ ប៉ុន្តែវាអាចលុបចេញវិញ ទៅតាមកាលៈទេសៈដែលអាចកើតមាន ។

លោក Roque បានបញ្ជាក់ថា “ទីភ្នាក់ងាររដ្ឋាភិបាល និងអង្គភាពរដ្ឋាភិបាលមូលដ្ឋានទាំងអស់ កំពុងចូលរួមផ្តល់ជំនួយពេញលេញ ក៏ដូចជាសហការគ្នា និងកៀរគរធនធានចាំបាច់ ដើម្បីអនុវត្តវិធានការបន្ទាន់ និងសមស្រប ក្នុងលក្ខណៈទាន់ពេលវេលា ដើម្បីកាត់បន្ថយការរីករាលដាលបន្ថែមទៀត នៃជំងឺគ្រុនផ្ដាសាយជ្រូកអាហ្វ្រិក” ។

លោកបន្តថា “យើងក៏ត្រូវដោះស្រាយ ការចំណាយ និងការផ្គត់ផ្គង់ផលិតផលសាច់ជ្រូក កាត់បន្ថយតម្លៃលក់រាយ និងការស្តារឡើងវិញ នៃឧស្សាហកម្មជ្រូកក្នុងស្រុកជាដើម” ។

បច្ចុប្បន្ន ហ្វីលីពីន ក៏ជាប្រទេសរងគ្រោះដោយកូវីដ ខ្លាំងបំផុតលំដាប់ទី ២ នៅតំបន់អាស៊ីអាគ្នេយ៍ បន្ទាប់ពីប្រទេសឥណ្ឌូនេស៊ី ខណៈគិតត្រឹមពេលនេះ ប្រទេសហ្វីលីពីន មានករណីឆ្លងជំងឺកូវីដ ១៩ ជាង ១ លានករណី និងមានអ្នកស្លាប់ចំនួន ១៨,៥៦២ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Inquirer.net

ចុចអាន ៖ ហ្វីលីពីន លេងធម៌ក្ដៅលើអ្នកដែលពាក់ម៉ាសដាក់ក្រោមចង្កា និងក្រោមច្រមុះ

ចុចអាន ៖ រាល​ដាល​ច្រើន​ឡើងៗ​ហើយ! ប្រទេស​រងគ្រោះ​ដោយ​កូវីដ​ខ្លាំង​បំផុត​ទី​ពីរ​នៅ​អាស៊ី ​រក​ឃើញ​វីរុស​បំប្លែង​ខ្លួន​របស់​ឥណ្ឌា