អាជីវករខ្មែរថៃជាង១ពាន់នាក់បានចាក់វ៉ាក់សាំង Astrazeneca ពីក្រុមគ្រូពេទ្យខេត្តច័ន្ទបុរី ប្រទេសថៃ

ខេត្តបាត់ដំបង៖ អាជីវករកម្ពុជា និងថៃជាង១ពាន់នាក់ដែលកំពុងរស់នៅ និងលក់ដូរនៅក្នុងផ្សារថៃនៃច្រកទ្វារអន្តរជាតិ បានឡែម និងច្រកដូង ស្រុកកំរៀង ខេត្តបាត់ដំបង បានទទួលការចាក់វ៉ាកសាំង Astrazeneca ជាបណ្ដើរៗហើយ។ នេះបើយោងតាមប្រភពពីប្រទេសថៃ។

ដោយការផ្តល់ចាក់វ៉ាក់សាំងនេះបានប្រព្រឹត្តិទៅនៅក្នុងបរិវេណផ្សារ “បានឡែម” ស្ថិតក្នុងភូមិសាស្ត្រស្រុកប៉ូងណាមរ៉ង ខេត្តច័ន្ទបុរី ប្រទេសថៃ តាមរយៈក្រសួងសុខាភិបាលប្រទេសថៃបានផ្តល់នូវការចាក់វ៉ាក់សាំង Astrazeneca ជូនដល់ប្រជាជនទាំងថៃ និងកម្ពុជា ដែលបាន និងកំពុងរស់នៅរកស៊ីក្នុងភូមិសាស្ត្រខាងលើដែលមានចំនួនសរុប ១,១០៣នាក់ក្នុងនោះប្រជាជនថៃចំនួន៦៧០នាក់ និងប្រជាជនខ្មែរចំនួន៤៣៣នាក់។

ប្រភពបន្តថា តាមរយៈការផ្តល់ជូននូវការចាក់វ៉ាក់សាំងការពារជំងឺរាតត្បាតជាសាកលពីជំងឺកូវីដ-១៩ ខាងលើនេះគឺធ្វើឡើងក្រោមវត្តមានជាអធិបតីលោក សាធីត ពិទូតេឆាត អនុរដ្ឋមន្ត្រីក្រសួងសុខាភិបាលថៃ និងជាប្រធានកម្មវិធីបើក និងផ្តល់នូវការចាក់វ៉ាក់សាំងប្រភេទ “Astrazeneca” ដល់ប្រជាជនទាំង២ រួមទាំងប្រធានសមាគមលក់ដូរ និងទេសចរណ៍ព្រំប្រទល់ជាយដែន ថៃ-កម្ពុជា នៃខេត្តច័ន្ទបុរី ប្រទេសថៃ និងមន្ត្រីសំខាន់ៗមួយចំនួនទៀត។

ការផ្តល់វ៉ាក់សាំងចាក់កូវីដ-១៩ នាពេលនេះក្រោយពីក្រុមគ្រូពេទ្យថៃបានចុះពិនិត្យសុខភាព និងធ្វើតេស្តយកវត្ថុសំណាកដល់ក្រុមអាជីវករខ្មែរថៃ និងអ្នកបើករថយន្តចេញចូលប្រចាំនៅច្រកអន្តរជាតិដូង កាលពីចុងខែមិថុនាឆ្នាំ២០២១កន្លងទៅ។

តាមការគូសបញ្ជាក់ពីលោក រ៉ាត់ថាវីដតាំង គៀតភិចឆារ៉ាក់ ជាប្រធានសមាគមលក់ដូរ និងទេសចរណ៍ព្រំប្រទល់ជាយ ដែនថៃកម្ពុជា នៃខេត្តច័ន្ទបុរី បានលើកឡើងថា ការចាក់វ៉ាក់សាំងជូនដល់បងប្អូនទាំងថៃ និងខ្មែរដែលជាអាជីវករ និងអ្នកធ្វើការទាំងនោះ ក្នុងគោលបំណងដើម្បីកាត់បន្ថយនូវការកង្វល់ព្រួយបាម្ភពីការរាតត្បាត និងពីការឆ្លងរាលដាលនៃជំងឺកូវីដ-១៩ នៅតាមព្រំដែនរវាងកម្ពុជា និងថៃ ជាពិសេសនៅតាមច្រកទ្វារអន្តរជាតិ ដូងបានឡែម និងនៅក្នុងផ្សារបានឡែមផ្ទាល់តែម្តង។

លោកបន្តទៀតថា ការផ្តល់ និងចាក់វ៉ាក់សាំងជូនដល់បងប្អូនអាជីវករនៃប្រទេសទាំង២នេះមានចំនួនសរុប ១,១០៣នាក់ ក្នុងនោះប្រជាពលរដ្ឋខ្មែររស់នៅ និងកំពុងធ្វើការរកស៊ីនៅទីនោះមានចំនួនសរុប៤៣៣នាក់ ក្រៅពីនេះក៏មានពលរដ្ឋរស់នៅក្នុងស្រុកកំរៀងបានទៅស្នើសុំចាក់វ៉ាក់សាំង “Astrazeneca” ពីអាជ្ញាធរថៃចំនួន៤៦នាក់៕

អត្ថបទ៖ សៅ សារិទ្ធ