សួន ពិសិដ្ឋ រំលឹកអនុស្សាវរីយ៍អាល់ប៊ុមដំបូង បន្ទាប់ពីដំណើរ ១០ឆ្នាំ នៃការផលិត Original Songs

អ្នកនិពន្ធបទចម្រៀងល្បីឈ្មោះ សួន ពិសិដ្ឋ បានរំលឹកស្នាដៃសំខាន់មួយក្នុងអាជីពរបស់ខ្លួន គឺការផលិតបទចម្រៀង Original Songs អាល់ប៊ុមដំបូង ដែលបានបន្សល់ទុកជាស្នាដៃមានតម្លៃសម្រាប់វិស័យសិល្បៈចម្រៀងសម័យរបស់ខ្មែរ។

លោក សួន ពិសិដ្ឋ គឺជាអ្នកនិពន្ធដែលមានស្នាដៃឆ្នើម ក្នុងការតាក់តែងបទចម្រៀងល្បីៗជាច្រើនសម្រាប់តារាចម្រៀងប្រុស-ស្រីនៅក្នុងប្រទេស។ លើសពីនេះ លោកក៏មានជំនាញជាច្រើនផ្សេងទៀត រួមមានការដឹកនាំសម្ដែង ការផលិត និងបង្វឹកតារាចម្រៀង។

ក្នុងរយៈពេលជាង ២០ ឆ្នាំនៃការប្រឡូកក្នុងវិស័យសិល្បៈ លោកបានបង្កើតស្នាដៃជាច្រើន ទាំងការតែងនិពន្ធបទចម្រៀងប្រភេទស្នេហា បទលើកទឹកចិត្ត និងងបទដែលបង្ហាញពីមោទនភាពជាតិ។

ថ្មីៗនេះ លោកបានរំលឹកពីអាល់ប៊ុម Original Songs លើកដំបូង ដែលបានចេញផ្សាយនៅឆ្នាំ ២០១៦ ជាមួយកំពូលតារាចម្រៀង ព្រាប សុវត្ថិ នៅផលិតកម្មហង្សមាស។ អាល់ប៊ុមនេះ (CD 540) រួមបញ្ចូលទាំងបទភ្លេង និងទំនុកច្រៀងថ្មីៗ ដែលលោកជាអ្នកនិពន្ធផ្ទាល់។

លោក សួន ពិសិដ្ឋ បានបញ្ជាក់ថា រយៈពេល ១០ ឆ្នាំកន្លងមក (២០១៦–២០២៦) គឺជាអនុស្សាវរីយ៍ដ៏មានតម្លៃ ដែលបានបន្សល់ទុកស្នាដៃសំខាន់មួយសម្រាប់អាជីព និងវិស័យសិល្បៈខ្មែរ។

ជាមួយគ្នានេះដែរ លោកក៏បានចែករំលែកថា អនុស្សាវរីយ៍ល្អៗគួរត្រូវបានរក្សាទុក និងរំលឹក ដោយថ្លែងអំណរគុណដល់មិត្តរួមការងារ និងអ្នកគាំទ្រទាំងអស់ ដែលតែងតែគាំទ្រការងាររបស់លោក៕ ដោយ ៖ ចាន់រ៉ា