ដើម្បីសម្ដែងឱ្យចូលតួពិតៗ Lady Gaga ប្រើពេលច្រើនយ៉ាងនេះ ក្នុងខ្សែភាពយន្ត House Of Gucci

តារាចម្រៀង Lady Gaga ថ្លែងក្នុងពិធីសម្ភោធខ្សែភាពយន្ត នៅឯទីក្រុងឡុងដ៏ថា នាងចំណាយពេលរាប់ខែ ដើម្បីសម្ដែងជាតួអង្គភរិយានៃវង្សត្រកូល Gucci ក្នុងរឿងក្ដីសោកនាដកម្ម House Of Gucci។

ខ្សែភាពយន្តដកស្រង់ពីជីវិតពិត រឿង House Of Gucci ជាខ្សែភាពយន្តនិយាយអំពីការធ្វើឃាតលើអ្នកបន្តវេននៃប្រេន​​ Guuci  ក្នុងប្រទេសអ៊ីតាលី អំឡុងទសវត្សរ៍ឆ្នាំ ១៩៩០ ។ វាជាការរៀបរាប់ឡើងវិញអំពីករណីឃាតកម្មដ៏ល្បីបំផុតក្នុងឧស្សាហកម្មម៉ូដ ដែលត្រូវបានយកមកផលិតជាខ្សែភាពយន្តចំនួន ២ម៉ោង ៤៤នាទី។

តារាចម្រៀង Gaga ដើរតួជានាង Patrizia Reggiani ដែលបានរៀបការជាមួយលោក Maurizio Gucci នៃត្រកូល Gucci ក្នុងឆ្នាំ ១៩៧២ ប៉ុន្តែពួកគេបានលែងលះគ្នានៅឆ្នាំ ១៩៩៤ ។

មួយ​ឆ្នាំបន្ទាប់ លោក Maurizio ត្រូវ​បាន​ជនមិនស្គាល់មុខ លប​បាញ់​សម្លាប់​នៅ​ខាង​ក្រៅ​ការិយាល័យរបស់​គាត់។ ​ក្រោយ​មកអតីតភរិយាជនរងគ្រោះគឺនាង Reggiani ត្រូវតុលាការកាត់ទោសឱ្យជាប់គុក ១៨ឆ្នាំ ពីបទឃាតកម្មគិតទុកជាមុន និងត្រូវបានដោះលែងនៅឆ្នាំ ២០១៦។

ដោយឡែក Lady Gaga ដែលជាតួសម្ដែងតំណាងលោកស្រី Patrizia Reggiani និយាយថា រឿងនេះ ជារឿងដែលនាងចំណាយពេលច្រើនបំផុតទាំងលើការអានស្គ្រីប និងដើរតួរយ៉ាងហោច ៩-១៨ខែដែរ ក្នុងការដាក់អារម្មណ៍ឱ្យចូលសាច់រឿង និងសម្ដែងឱ្យសមទៅនឹងចរិតលក្ខណៈរបស់តួអង្គ។

​មិនចម្លែកនោះទេដែលតារាស្រីវ័យ ​៣៥ឆ្នាំរូបនេះ ប្រើពេលច្រើនម្ល៉ឹងៗក្នុងការសម្ដែង ដើម្បីឱ្យសាច់រឿងល្អមើល ព្រោះកន្លងមក ខ្សែភាពយន្តរឿង A Star Is Born ដែលនាងសម្ដែង ធ្លាប់ទទួលបានពានរង្វាន់អូស្ការ លើបទចម្រៀងដើមល្អបំផុត ហើយ Lady Gaga ក៏ត្រូវបានតែងតាំងជាតារាសម្តែងឆ្នើមផងដែរ។

គួរបញ្ជាក់ថា ខ្សែភាពយន្ត House Of Gucci នឹងចាប់បញ្ចាំង នៅចុងខែវិច្ឆិកានេះហើយ៕

ប្រែសម្រួល៖ សន្យា

ចុចអាន៖ បងថ្លៃ Travis Scott រងការរិះគន់យ៉ាងចាស់ដៃ ក្រោយទម្លាយរូបស៊ិចស៊ី មិនខ្វល់សោកនាដកម្មរត់ជាន់គ្នា

ចុចអាន៖ ប្រឡូកសិល្បៈជាង ៤០ឆ្នាំ ពេលនេះ Mr. Bean សល់លុយប៉ុន្មានក្នុងដៃ?