ប៉ូលិសប្រេស៊ីល រារាំងផែនការបំផ្ទុះគ្រាប់បែកក្នុងការប្រគំតន្ត្រីរបស់ Lady Gaga ដែលមានមនុស្សចូលរួមជាង ២លាននាក់

ប៉ូលិសប្រេស៊ីលអះអាងថា ខ្លួនបានរារាំងផែនការបំផ្ទុះគ្រាប់បែក ក្នុងព្រឹត្តិការណ៍ប្រគំតន្ត្រីរបស់តារាចម្រៀង Lady Gaga កាលពីថ្ងៃសៅរ៍ទី៣ខែឧសភាឆ្នាំ២០២៥ នៅឆ្នេរ Copacabana ក្នុងទីក្រុង Rio de Janeiro ដែលមានការចូលរួមពីសំណាក់មនុស្សជាង២លាននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC, ប៉ូលិសបានបញ្ជាក់ពីការចាប់ខ្លួនមេក្លោងនៃផែនការវាយប្រហារនេះ ពីបទកាន់កាប់អាវុធខុសច្បាប់នៅរដ្ឋភាគខាងត្បូង Rio Grande do Sul ហើយប្រតិបត្តិការរបស់ប៉ូលិស បានរកឃើញថា ក្រុមឧក្រិដ្ឋជននេះតែងនិយាយញុះញង់ឲ្យមានការស្អប់ខ្ពើមជាពិសេសលើកុមារ មនុស្សពេញវ័យ និងសហគមន៍អ្នកស្រឡាញ់ភេទដូចគ្នា។

ក្រោយរារាំងផែនការបាន ប៉ូលិសប្រេស៊ីល ក៏បន្តស៊ើបអង្កេតហើយចេញដីកាឆែកឆេរ Rio de Janeiro, Mato Grosso, Rio Grande do Sul និង Sao Paulo ដើម្បីតាមរកអ្នកជាប់ពាក់ព័ន្ធបន្ថែមទៀត។

ជុំវិញរឿងនេះដែរ ក្រុមការងាររបស់ Lady Gaga អះអាងថា ពួកគេទើបដឹងពីព័ត៌មាននេះក្រោយចប់ការប្រគំតន្ត្រីប៉ុណ្ណោះ ហើយដឹងតាមរយៈប្រព័ន្ធផ្សព្វផ្សាយសង្គមទៀត។

អ្នកនាំពាក្យរបស់ Lady Gaga និយាយថា «តាំងពីមុនពេលរហូតដល់ការសម្តែង ពួកគេគ្មានដឹងពីបញ្ហាសន្តិសុខអ្វីទេ ហើយប៉ូលិសឬអាជ្ញាធរ ក៏មិនទាន់ទងទៅ Lady Gaga ពាក់ព័ន្ធហានិភ័យអ្វីដែរ»។

យ៉ាងណាក្តី ជាវិធានការសន្តិសុខមុនការប្រគំតន្ត្រីចាប់ផ្តើម, ប៉ូលិស ៥ ០០០នាក់ត្រូវបានដាក់ពង្រាយ ហើយអ្នកចូលរួមត្រូវឆ្លងកាត់ឧបករណ៍ស្កេនអាវុធនិងគ្រឿងដែក ចំណែកដ្រូននិងកាមេរ៉ាចាប់ផ្ទៃមុខ ក៏ត្រូវប្រើផងដែរ។

សូមបញ្ជាក់ថា ការប្រគំតន្ត្រីនេះ ត្រូវរ៉ាប់រងចំណាយដោយទីក្រុង Rio ផ្ទាល់ ដើម្បីស្តារសេដ្ឋកិច្ចរបស់ទីក្រុងឡើងវិញ ជាមួយការរំពឹងទុកថា វាអាចទាញប្រាក់ចំណូលបាន១០០លានដុល្លារអាមេរិក៕

អត្ថបទ៖ សុខ សុវណ្ណ

ចុចអាន៖ បំណាក់​ដីនៅប្រេស៊ីលសម្លាប់មនុស្ស១០នាក់