ជីវិតកម្សាន្ដ

ការប្រគំតន្ត្រី Lady Gaga នៅប្រេស៊ីល ទាក់ទាញអ្នកគាំទ្រ ២.១ លាននាក់ លើសតារាចម្រៀងល្បីៗផ្សេងទៀត

បានផុស

១២ ខែ មុន

នៅ

ថ្ងៃអង្គារ ៦ ឧសភា ២០២៥

ដោយ

Lady Gaga បានសម្តែងការប្រគំតន្ត្រីដោយឥតគិតថ្លៃ ស្ថិតនៅលើឆ្នេរ Copacabana ក្នុងទីក្រុង Rio de Janeiro ប្រទេសប្រេស៊ីល ដោយទាក់ទាញអ្នកគាំទ្រយ៉ាងច្រើនលើសលប់ ដល់ជាង ២,១ លាននាក់ កាលពីថ្ងៃទី ៣ខែឧសភា។ ព្រឹត្តិការណ៍មួយនេះ ក៏បានកត់សម្គាល់ការបើកដំណើរការគម្រោងមួយឈ្មោះថា Todo Mundo no Rio ដែលជាគំនិតផ្តួចផ្តើមដោយ Bonus Track និង Corona ដើម្បីទាក់ទាញការកម្សាន្តនៅក្នុងទីក្រុង និងស្តារសេដ្ឋកិច្ចរបស់ទីក្រុងឡើងវិញ ។

ការសម្តែងដ៏មានថាមពលរបស់ម្ចាស់បទ «Die With a Smile» បានចាក់ផ្សាយផ្ទាល់ក្នុងប្រទេសប្រេស៊ីល នៅក្នុងកម្មវិធី Multishow និង TV Globo កាន់តែពង្រឹងឋានៈរបស់តារាចម្រៀងវ័យ៣៩ឆ្នាំ ក្លាយជារូបតំណាងប៉ុបរបស់ពិភពលោក។ ពិសេសជាងនេះទៅទៀត នេះក៏ជាការផ្សព្វផ្សាយអាល់ប៊ុមស្ទូឌីយ៉ូទី៧របស់នាង ក្រោមចំណងជើងថា «Mayhem» ចេញផ្សាយកាលពីថ្ងៃទី ៧ខែមីនាកន្លងទៅនេះ។

ការប្រគំតន្ត្រីដែលបានបំបែកកំណត់ត្រាទាក់ទាញអ្នកទស្សនាជាង ២.១ លាននាក់ ចាប់ផ្តើមនៅម៉ោង ៩យប់ បានប្រែក្លាយឆ្នេរ Copacabana ទៅជាសមុទ្រនៃអ្នកគាំទ្រ ដោយបានបន្លឺឡើងនូវទស្សនីយភាពប្រវត្តិសាស្ត្រ ក្នុងទីតាំងបានរៀបចំនាពេលកន្លងមក។ ទន្ទឹមគ្នានោះ តារាចម្រៀង ម៉ាដូណា ទាក់ទាញអ្នកគាំទ្រត្រឹមតែ ១.៦ លាននាក់ ក្នុងប្រគំតន្រ្តីចុងក្រោយរបស់នាងឈ្មោះថា Celebration នៅខែឧសភា ឆ្នាំ ២០២៤ ខណៈដែលក្រុម The Rolling Stones ទាក់ទាញបាន ១.៥ លាននាក់ ក្នុងឆ្នាំ ២០០៦ ប៉ុណ្ណោះ។

ទោះយ៉ាងណា នេះក៏មិនមែនជារឿងចម្លែកដែលការប្រគំតន្រ្តីរបស់់ Lady Gaga ទទួលបានការគាំទ្រយ៉ាងភ្លូកទឹកភ្លូកដីបែបនេះ។ ដូចដែលទស្សនិកជនធ្លាប់ដឹងស្រាប់ហើយថា ទំនាក់ទំនងរបស់នាងជាមួយអ្នកគាំទ្រប្រេស៊ីល ដែលត្រូវបានគេហៅថា «Little Monsters» តែងតែបង្ហាញយ៉ាងពេញទំហឹងនៅបណ្ដាញអ៉ីនធឺណិត។

មិនតែប៉ុណ្ណោះ ប្រព័ន្ធផ្សព្វផ្សាយសង្គមជាច្រើន បានចែករំលែកឃ្លីបនៃទម្លាប់រាំដ៏មានថាមពលខ្ពស់របស់ Gaga និងបទចម្រៀងរំជួលចិត្ត ដោយក្នុងនោះមានតែកោតសរសើរពីសំណាក់អ្នកគាំទ្រជាច្រើន។ អ្នកបញ្ចេញមតិខ្លះបានលើឡើងថា ការប្រគំតន្ត្រីមួយនេះប្រៀបទៅនឹងព្រឹត្តិការណ៍ Copacabana កន្លងមក ដូចជាកម្មវិធីបុណ្យចូលឆ្នាំថ្មីឆ្នាំ ១៩៩៤ របស់តារាចម្រៀង Rod Stewart ដែលបានទាក់ទាញអ្នកចូលរួមចំនួន ៤.២ លាននាក់ ហើយចំណែក Gaga នៅតែអាចទាក់ទាញទស្សនិកជនទូទាំងពិភពលោក បើទោះជានាងឈានចូលដលវ័យជ្រេហើយក្ដី៕