ជីវិតកម្សាន្ដ

នៅពីក្រោយភាពស្រស់ស្អាតរបស់អាងទឹកកំពីងពួយ បានបង្កប់ភាពឈឺចាប់របស់ប្រជាជនខ្មែរ

បានផុស

៥ years មុន

នៅ

ថ្ងៃពុធ ៥ មករា ២០២២

ដោយ

បច្ចុប្បន្នអាងកំពីងពួយជាទីកន្លែងពេញនិយមរបស់ភ្ញៀវទេសចរ ទៅទស្សនាកម្សាន្តលេងទឹកបណ្តែតអារម្មណ៍ គយគន់ទេសភាពព្រៃភ្នំ ដែលហ៊ុំព័ទ្ធជុំវិញ ប៉ុន្តែអាងទឹកមួយនេះ បានបង្កប់ភាពឈឺចាប់ និងជីវិតរបស់ប្រជាជនខ្មែរជាច្រើននាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហម អរុណ ប្រធានការិយាល័យគ្រប់គ្រងឧស្សាហកម្មទេសចរណ៍ខេត្ត បានឲ្យដឹងថា អាងកំពីងពួយគឺជារមណីដ្ឋានទេសចរណ៍កែច្នៃប្រវត្តិសាស្ត្រ១ ស្ថិតនៅប៉ែកខាងលិចនៃទីរួមខេត្តបាត់ដំបង ដែលបានកសាងឡើង ក្នុងសម័យប៉ុលពត ដោយកម្លាំងមនុស្សសុទ្ធសាធ ដែលមានបណ្តោយ ៦,០០០ ម៉ែត្រ និងទទឹង ១៩០០ ម៉ែត្រ អាចផ្ទុកទឹកបាន ១១០,០០០,០០០ ម៣(មួយរយដប់លានម៉ែត្រគូប) នៅរដូវវស្សាដែលជាប្រភពទឹកសម្រាប់វិស័យកសិកម្មហើយកំពីងពួយ គឺជាឈ្មោះរុក្ខជាតិទឹកម្យ៉ាង ដែលអាចយកទៅទទួលទានបាន។

លោកបន្តថា អាងកំពីងពួយដែលក្លាយជារមណីយដ្ឋានក្នុងពេលនេះ វាជាឆាកសោកនាដកម្មដ៏ធំមួយនៅក្នុងរបបប្រល័យពូជសាសន៍ប៉ុលពត ដែលត្រូវបានសាងសង់ឡើងដោយប្រជាជនខ្មែររាប់ម៉ឺននាក់បានកើតជាទំនប់ដ៏ធំស្កឹមស្កៃនេះ គឺប្រើកម្លាំងមនុស្សសុទ្ធសាធធ្វើឡើងដោយប្រើចបកាប់ និងរែកហើយស្ថាបនិកទាំងនោះភាគច្រើន បានបាត់បង់ជីវិតអស់ទៅហើយដែរ។

លោក ហម អរុណ បានឲ្យដឹងទៀតថា ផ្ទៃបឹងមានសភាពធំល្វឹងល្វើយជុំវិញព័ទ្ធទៅដោយភ្នំ ដែលអំណោយផលយ៉ាងប្រសើរដល់អ្នកទេសចរជិះទូកស្ទួចត្រី និងមុជទឹកកម្សាន្ត។ លើសពីនេះអ្នកទេសចរអាចសម្រាកពិសាអាហារ និងស្រូបយកខ្យល់អាកាសបរិសុទ្ធ ដោយមានទ្វារទឹកដ៏ធំពីរកន្លែងមានទឹកហូរគ្រប់រដូវកាលបានបម្រើដល់វិស័យកសិកម្មរបស់ប្រជាកសិករ។

លោកប្រធានការិយាល័យគ្រប់គ្រងឧស្សាហកម្មទេសចរណ៍ខេត្ត ក៏បានបន្តថា អាង ១ នេះ ជាប្រភេទប្រវត្តិសាស្ត្រកែច្នៃ ដែលមានទីតាំងឋិតក្នុងភូមិតាង៉ែន ឃុំតាគ្រាម ស្រុកបាណន់ ចម្ងាយ ៣៦ គ.មពីទីរួមខេត្តបាត់ដំបង ហើយបច្ចុប្បន្នរមណីយដ្ឋានអាងកំពីងពួយនេះ មានសក្តានុពលដូចជា៖ ទំនប់ប្រវត្តិសាស្ត្រ, ទេសភាពអាង, កន្លែងលេងទឹក, ចម្ការឈូក និងគយគន់ទេសភាពជុំវិញអាងជាដើម៕

អត្ថបទ៖ សៅ សារិទ្ធ