ទើបជាសះស្បើយពីកូវីដ! តារាចម្រៀង ម៉ា ច័ន្ទបញ្ញា ស្រាប់តែជួបទុក្ខផ្ទួនៗគ្នា

តារាចម្រៀងលោក ម៉ា ច័ន្ទបញ្ញា បានធ្វើឲ្យអ្នកគាំទ្រមានការភ្ញាក់ផ្អើលគ្រប់គ្នា ខណ:នៅសុខៗស្រាប់​តែលោក បានពោលពាក្យត្អូញត្អែរចេញពីក្នុងចិត្តថា ខ្លួនអាយុជិត ៣០ឆ្នាំ បែរជាត្រូវជួនទុក្ខផ្ទួនៗគ្នាតែម្តង។

ផ្អែកតាមសំណេររបស់លោក ម៉ា ច័ន្ទបញ្ញា បានរៀបរាប់នៅលើបណ្តាញសង្គមផ្ទាល់ខ្លួនថា «នៅចុងអាយុ ២៩ឆ្នាំនេះ បន្ទាប់ពីងើបពី Anxiety ខ្ញុំបានឆ្លងអូមីក្រុង ហើយវាបានឆ្លងបន្តដល់ម៉ាក់ប៉ា និងក្រុមការ ងារ។ ជាបានមួយភ្លែតកុងបង្កើតខាងប៉ារបស់ខ្ញុំឈឺ រួចគាត់បានចែកឋានទៅ មួយខែក្រោយមកតាទួតរបស់ខ្ញុំឈឺ ហើយគាត់បានចែកឋានដែរ»។

តារាចម្រៀងលោក ម៉ា ច័ន្ទបញ្ញា បន្ថែមទៀតថា «ការងារក៏រអាក់រអួលច្រើន នៅមានរឿងផ្ទៃក្នុងផ្សេងទៀត ដែលពិបាករៀបរាប់អស់។ ប៉ុន្តែខ្ញុំតែងប្រាប់ខ្លួនឯងថា «ខ្ញុំអាចធ្វើបាន» ដូចបទចម្រៀងដែលខ្ញុំបានសរសេរថា «រដូវផ្ការីកផ្ដល់ក្ដីសង្ឃឹមតែក្នុងបរិវេណអ្នកតស៊ូ»។

បន្ទាប់ពីឃើញតារាប្រុសលោក ម៉ា ច័ន្ទបញ្ញា ត្អូញត្អែរដូច្នេះគឺគេសង្កេតឃើញ មានអ្នកគាំទ្រ និងមិត្ត ភក្តិរួមអាជីពសិល្ប:មួយចំនួន បានសម្តែងការលើកទឹកចិត្តដល់តារាប្រុសរូបនេះ ឲ្យមានភាពរឹងមាំផងដែរ៕

អត្ថបទ៖ ចាន់រ៉ា