ដំណើរជីវិត នាយ ពែកមី មុនល្បីឈ្មោះបោះសំឡេង

តារាកំប្លែងវោហាស័ព្ទមិនចេះរីងស្ងួត នាយ ពែកមី ដែលទទួលបានការគាំទ្រខ្លាំងពីសំណាក់មហាជនទាំងចាស់ក្មេង តាមរយៈទេពកោសល្យដ៏ប៉ិនប្រសព្វ តើលោកមានដំណើរជីវិតជូរចត់បែបណាខ្លះ។

លោក ចែម ចាន់​ដា​រ៉ា ហៅ​នាយ ពែ​កមី កើត​នៅ​ថ្ងៃទី ​០១ ខែកក្កដា ឆ្នាំ​ ១៩៨១ ​នៅ​ភូមិ​ពពែ​ត ឃុំ​ពពែ​ត ស្រុក​ស្វាយទាប ខេត្តស្វាយរៀង​។ នាយ ពែកមី បានបង្ខំចិត្តបញ្ចប់ការសិក្សារបស់ខ្លួននៅថ្នាក់ទី ៩ ដោយសារភាពក្រីក្រ នាយក៏សម្រេចបួសជាព្រះសង្ឃបានបីវស្សា នៅ​វត្ត​សុវណ្ណ​រង្សី។ ដោយមើលឃើញជីវភាពគ្រួសារកាន់តែដុនដាបទៅៗ ក៏បានលាចាកសិក្ខាបទមកធ្វើការនៅទីក្រុងភ្នំពេញ ដើម្បីជួយសម្រាលបន្ទុកគ្រួសារ ព្រោះពេលនោះជីវភាពពឹងផ្អែកទៅលើការធ្វើស្រែទាំងស្រុង។

ដោយសារស្រលាញ់វិស័យសិល្បៈ នាយ ពែកមី បានដាក់ពាក្យប្រលងចម្រៀងនៅក្នុងប៉ុស្ត៍ទូរទស្សន៍មួយ នៅឆ្នាំ ២០០០ តែហាក់បីដូចជាមិនមែននិស្ស័យផ្នែកចម្រៀងនាយបានធ្លាក់តាំងពីវគ្គជម្រុះដំបូង។ ហេតុតែព្រេងវាសនាមកដល់ នៅ​ឆ្នាំ​ ២០០៩ ​ពែ​កមី ក៏បានដាក់ពាក្យប្រលងក្នុងកម្មវិធី​ មហា​កំប្លែង​ទទួលបានជយលាភីលេខ ១ ហើយក៏​ក្លាយជា​តារា​កំប្លែង​ប្រចាំ​ស្ថានីយទូរទស្សន៍​ CTN​។

ដោយសារតែសមត្ថភាពទេពកោសល្យ និងការខិតខំតស៊ូ រិះរកពាក្យប្លែកៗ កំណាព្យចុងជួន ពែ​កមី ក៏ទទួលបានការគាំទ្រពីទស្សនិកជនជាខ្លាំង ជាពិសេសតាមរយៈកំប្លែងរឿង ថាំងចេងទៅចម្លងធម៌។ ក្រោយជោគជ័យលើវិស័យកំប្លែង ពែកមី ក៏បានឈានជើងចូលផលិតកម្មថោននៅឆ្នាំ ២០១៣។ បទចម្រៀងដំបូង “ឲ្យប្រពន្ធស៊ីសៀង ឲ្យនាងស៊ីស៊ុប” បានធ្វើឲ្យនាយផ្ទុះការគាំទ្រយ៉ាងខ្លាំង។ ទន្ទឹមនឹងភាពរីកចម្រើនលើវិស័យសិល្បៈកំប្លែង និងចម្រៀង ពែកមី ក៏បានពង្រីកខ្លួនទៅវិស័យភាពយន្តដំបូងនៅឆ្នាំ ២០១៤ គឺរឿង បងប្អូនពីរនាក់ ដែលផលិតដោយផលិកម្ម LD Picture៕

អត្ថបទ៖ ផានិត