តារាស្រីទូរទស្សន៍ TVB ត្រូវជនអនាមិកគំរាមរំលោភ និងសម្លាប់

Cathy Wong ពិធីការិនីកម្មវិធីទូរទស្សន៍ TVB Scoop និងជាអតីតបេក្ខនារីបវរកញ្ញាហុងកុង ត្រូវបានជនមិនស្គាល់មុខគំរាមរំលោភ និងសម្លាប់ បន្ទាប់ពីនាងនិយាយប៉ះពាល់ដល់អង្គការមួយ។

កម្មវិធី Scoop បានទទួលពាក្យគំរាមកំហែងពីជនអនាមិកម្នាក់ ដោយគេអះអាងថា Cathy បាននិយាយប៉ះពាល់ដល់អង្គការរបស់គេ ហើយគេនឹងចាប់រំលោភនាង បន្ទាប់មកនឹងសម្លាប់ចោលតែម្ដង។ គេថែមទាំងនិយាយថាគេបានស្គាល់អាសយដ្ឋានរបស់ Cathy Wong យ៉ាងច្បាស់ទៀតផង។ មិនតែប៉ុណ្ណោះ អ្នក​ផ្ញើ​ពាក្យគំរាម​កំហែង​​បន្ថែម​ថា ​គេ​នឹងកាត់​តារាស្រីរូបនេះជា​ ១៨​ដុំ មុន​នឹងបោះ​ឲ្យ​នាង​ទៅ​ត្រី​ និង​ឆ្កែស៊ី។

ក្រោយពីទទួលបានការគំរាមកំហែងនេះ Scoop បានរាយការណ៍ទៅប៉ូលីសហុងកុង ហើយពេលនេះប៉ូលិសកំពុងបើកការស៊ើបអង្កេត។

ដោយឡែក Cathy Wong បានផ្ដល់បទសម្ភាសន៍ឱ្យសារព័ត៌មាន HK01 ថា ដំបូងនាងតក់ស្លុតដែរ ប៉ុន្តែក្រោយមកនាងស្ងប់អារម្មណ៍វិញ ព្រោះក្រុមការងាររបស់កម្មវិធីមានគ្នាច្រើននាក់ណាស់ ដូច្នេះនាងមិនគិតថាជនអនាមិកនោះហ៊ានធ្វើអ្វីផ្ដេសផ្ដាសទេ។ ចំណែកទម្លាប់ដែលនាងតែងតែជិះរថភ្លើងក្រោមដីទៅផ្ទះរាល់ដង នាងនៅតែបន្តធ្វើដដែល៕

ប្រែសម្រួល៖ សន្យា

ប្រភព៖ Asiaone