ជីវិតកម្សាន្ដ

ងិន ម៉ារ៉ាឌី ទទូចសុំចិត្តឲ្យបញ្ឈប់ការរើសអើងអ្នកស្រលាញ់ភេទដូចគ្នា

បានផុស

៤ years មុន

នៅ

ថ្ងៃព្រហស្បតិ៍ ៨ កញ្ញា ២០២២

ដោយ

ស្របពេលដែលការគាំទ្រ និងប្រជាប្រិយភាពកំពុងលេចធ្លោលើវិស័យសិល្បៈកញ្ញា ងិន ម៉ារ៉ាឌី ដែលជាបវរកញ្ញាចក្រវាលកម្ពុជា ២០២១ ចេញមុខអំពាវនាវដល់អ្នកគាំទ្រ និងមហាជនខ្មែរឲ្យបញ្ឈប់ការរើសអើងអ្នកស្រលាញ់ភេទដូចគ្នា។

ការចេញមុខស្នើរសុំដោយទទូចរបស់បវរកញ្ញា ងិន ម៉ារ៉ាឌី ពេលនេះធ្វើឡើងបន្ទាប់ពីកត់សម្គាល់ឃើញថា នាពេលសព្វថ្ងៃនេះសម្រាប់បុគ្គលដែលជ្រើសយកការស្រឡាញ់ភេទដូចគ្នា នៅតែត្រូវបានគេប្រើជាការប្រមាថ ឬលេងសើចនៅទីសាធារណៈ ដោយគ្មានការគោរពសិទ្ធិឡើយ។ទង្វើនេះ ត្រូវបានកញ្ញា ងិន ម៉ារ៉ាឌី ចាត់ទុកថាជាសកម្មភាពអសីលធម៌ណាស់។

បវរកញ្ញា ងិន ម៉ារ៉ាឌី បានបញ្ចេញទស្សនៈថា នៅយុគសម័យ ២០២២ ជិតចូលដល់ ២០២៣ ទៅហើយការស្រឡាញ់ភេទដូចគ្នានៅតែត្រូវបានគេប្រើជាការប្រមាថ ឬលេងសើចនៅទីសាធារណៈ។ពេលខ្លះការលេងសើចត្រឹមតែ ២ ឬ ៣ ម៉ាត់របស់អ្នកអាចធ្វើឲ្យគេឈឺចាប់ខ្មាសគេនៅកណ្តាលមនុស្សជាច្រើន។

កញ្ញា ងិន ម៉ារ៉ាឌី បន្ថែមទៀតថា អ្នកគួរតែរៀនគោរពសិទ្ធិមនុស្ស ឲ្យតម្លៃមនុស្សជុំវិញខ្លួន ឬស្គាល់អំពីសុជីវធម៌ ទីតាំងដែលអ្នកចង់លេងសើចទៅកាន់នរណាម្នាក់។ ការស្រលាញ់ភេទដូចគ្នាមិនមែនជាការដែលនរណាម្នាក់ ត្រូវលើកយកមកជាការលេងសើចនោះទេ ត្រូវចេះគោរពនិងគិតពិចារណា។ ជាការពិតបើសង្កេតមកទល់ពេលបច្ចុប្បន្ន កំណើននៃការស្រលាញ់ភេទដូចគ្នាហាក់មានការកើនឡើងគួរឲ្យកត់សម្គាល់។

សូមជម្រាបដែរថាកញ្ញា ងិន ម៉ារ៉ាឌី គឺជាម្ចាស់មកុដ Miss Universe Cambodia 2021 ខណៈកន្លងទៅនាងក៏តំណាងឱ្យកម្ពុជាទៅចូលរួមប្រកួតក្នុងកម្មវិធី Miss Universe លើកទី ៧០ ឆ្នាំ ២០២១ នៅ ប្រទេសអ៊ីស្រាអែល៕

អត្ថបទ៖ ចាន់រ៉ា