អឿន ម៉ូលីកា៖ គ្មានភាពជោគជ័យណាដែលយើងអាចធ្វើបានតែម្នាក់ឯងឡើយ

គេសង្កេតឃើញថា អំឡុងមួយរយ:ពេលប៉ុន្មានឆ្នាំចុងក្រោយនេះ​ តារាចម្រៀងស្រីអ្នកនាង អឿន ម៉ូលីកា ហាក់មានភាពជោគជ័យខ្លាំងលើមុខជំនួញផ្ទាល់ខ្លួនដែលធ្វើឲ្យតារាស្រីរូបនេះកាន់តែហ៊ឺហារជាមួយការរស់នៅលើគំនរលុយ និងទ្រព្យសម្បតិមួយចំនួនធំ។

ដោយសារកត្តានេះទើបធ្វើឲ្យតារាស្រី ម៉ូលី កា កាន់តែប្រែមុខប្រែមាត់ខុសប្លែកពីមុន។ ម្យ៉ាងទៀតអ្វីដែលកំពុងមាន​នាពេលបច្ចុប្បន្នត្រូវបានអ្នកនាង អឿន ម៉ូលីកា បញ្ជាក់ថា គ្មានភាពជោគជ័យណាដែលយើងអាចធ្វើបានតែម្នាក់ឯងឡើយហើយត្រង់ចំណុចនេះនាងចង់សំដៅថា បើមិនមានការចូលរួមសហការយ៉ាងល្អពីបុគ្គលិក ឬក្រុមការងារនោះទេ ក៏មិនអាចជោគជ័យដែរ។

ក្រោមហេតុផលនេះ ទើបតារាស្រី អឿន ម៉ូលីកា កាលពីថ្មីៗនេះ បានធ្វើឲ្យក្រុមការងារ និងបុគ្គលិករបស់នាងរីករាយក្រៃលែង តាមរយៈការលើកទឹកចិត្តពួកគេនូវតំណើរកម្សាន្ដនៅទីក្រុងបាងកកប្រ​ទេសថៃរយៈពេល៥ថ្ងៃ ដែលថ្លៃ​ចំ​ណាយទៅលើការធ្វើប៉ាស្ព័រ ,សំបុត្រយន្ដហោះ ,ការស្នាក់នៅ និងអាហារ​ផ្សេងៗគឺនាងជាអ្នករ៉ាប់​រងទាំងអស់។

បើតាមការបញ្ជាក់ គឺអ្នកនាង អឿន ម៉ូលីកា បានដឹកនាំក្រុមការងារឡើងយន្ដហោះកាលពីថ្ងៃទី០៥ ខែតុលា ឆ្នាំ២០២២, ហើយតំណើរកម្សាន្ដរយៈពេលខ្លីនោះ ក៏មានវត្តមានស្វាមីរបស់នាង គឺលោក ហុង មានុណ ,ប្អូនស្រីនាង និងកូនស្រី នុណ ច័ន្ទ​ម៉ូនី​តា អា​យុ​ជាង២ឆ្នាំ ព្រមទាំងតារាសម្ដែងរូបស្រស់ នូណា ក៏រួមតំណើរជាមួយផងដែរ។

គេសង្កតឃើញថា ទាំង ម៉ូលី កា និងក្រុមការងាររបស់នាងពិតជាសប្បាយចិត្តហើយតាមព័ត៌មានថា កា​រដែល ម៉ូលី កា ចំណាយលុយជាច្រើនសម្រាប់ការដើរលេងក្រៅស្រុកនោះ ដោយសារតែនាងទទួលបានភាពជោគជ័យលើមុខជំនួញ និងជាការលើកទឹកចិត្តដល់បុគ្គលិកដែលច្នើមៗ និងស្មោះត្រង់ធ្វើការជាមួយនាងដើម្បីជាការតបស្នង។ សកម្មភាពរបស់ ម៉ូលីកា នាពេលនេះ ត្រូវបានគេចាត់ទុកថា ជាគំរូល្អមួយក្នុងការលើកទឹកចិត្តដល់ក្រុមការងារ ឬបុគ្គលិក ព្រោះគ្មានភាពជោគជ័យណាដែលយើងអាចធ្វើបានតែម្នាក់ឯងឡើយ។

ដោយឡែកសម្រាប់តំណើរកម្សាន្ដ​នៅថៃជាមួយក្រុមការងារនាពេលនេះ ម៉ូលីកា មិនប្រាប់ថា ចំណាយថវិការសរុបអស់ប៉ុន្មានទេ តែតារាស្រីរូបនេះថ្លែងសារថា ”ចែកា និងស្វាមី នាំក្រុមការងារមកដើរលេងនៅប្រទេសថៃ សប្បាយសប្បាយ ខ្ញុំស្រលាញ់ពួកគាត់ដូចបងប្អូនអ៊ីចឹង មិនដែលគិតថាជាបុគ្គលិកឬមេឡើយ”៕

អត្ថបទ៖ ចាន់រ៉ា