ជីវិតកម្សាន្ដ

ឡូរ៉ា ម៉ម៖ ជោគជ័យនេះ គឺគ្រាន់តែជាការចាប់ផ្ដើមតែប៉ុណ្ណោះ!

បានផុស

៤ years មុន

នៅ

ថ្ងៃអង្គារ ២៥ តុលា ២០២២

ដោយ

តារាចម្រៀង ឡូរ៉ា ម៉ម ជាស្ថាបនិក និងនាយកប្រតិបត្តិផលិតកម្មបារមី បានលើកឡើងថា លោកព្រឹទ្ធាចារ្យ គង់ ណៃ និង វណ្ណដា បាននិយាយថា វាដល់ពេលហើយដែលយើងក្រោកឡើង គឺដល់ពេល “Time to Rise!” ហើយប្រជាជនកម្ពុជាក៏បានយល់ព្រមជាមួយពួកគាត់ដែរ គឺយល់ព្រមដល់ទៅ ១០០ លានដង ដែលជោគជ័យនេះ គ្រាន់តែជាការចាប់ផ្ដើមប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការលើកឡើងនេះ បន្ទាប់ពី វីដេអូចម្រៀង MV បទ Time to Rise! ទទួលបានការចូលទស្សនាពីប្រជាជនលើពិភពលោករហូតទៅដល់ចំនួន ១០០ លានដង គិតត្រឹមថ្ងៃទី ២៣ ខែតុលា នេះ។

ឡូរ៉ា ម៉ម បានបង្ហោះសារលើបណ្ដាញសង្គមរបស់ខ្លួនថា៖ “ចាប់ពីថ្ងៃនេះតទៅ ខ្ញុំមានជំនឿចិត្តខ្លាំងជាងពេលមុនទៅទៀតថា នេះគឺគ្រាន់តែជាការចាប់ផ្ដើមតែប៉ុណ្ណោះ។ ដូច្នេះ តោះកម្ពុជា ក្រោកឡើងវិញ!”។

កញ្ញា ឡូរ៉ា ម៉ម រំលឹក មានគេបានប្រាប់នាងថា “ការធ្វើបទ Original គឺមិនអាចទៅរួចទេ!”។ កញ្ញា ចាំបានផងដែរនូវកិច្ចសន្ទនាមួយ ជាមួយ លោក Arn Chorn-Pond ដែលគាត់បាននិយាយថា អាជីវកម្មខ្លះមិនឱ្យតម្លៃសិល្បៈប្រពៃណីរបស់យើង ហើយគិតថា សិល្បៈនេះតូចទាប “គួរឱ្យខ្មាស់គេណាស់”។ ជាមួយនឹងពាក្យទាំងនោះ លោកបានជំរុញនាងឱ្យធ្វើអ្វីមួយអំពីវា។

កញ្ញា ឡូរ៉ា ម៉ម លើកឡើងបន្តថា៖ “នៅពេលខ្ញុំពិចារណាពីការចងចាំនេះ ខ្ញុំដឹងថា មានមនុស្សមួយចំនួនដែលមិនមានអារម្មណ៍សប្បាយចិត្តជាមួយនឹងគំនិតនៃ “ភាពអស្ចារ្យរបស់ខ្មែរ” នោះទេ។ ឥឡូវនេះខ្ញុំយល់ហើយថា ហេតុអ្វី បានជាវាគួរឱ្យខ្លាចសម្រាប់ពួកគេ។ នេះគឺ ដោយសារតែការបរាជ័យ គឺកើតឡើងញឹកញាប់ពេក ហើយមនុស្សជាច្រើនប្រហែលជាមានអារម្មណ៍ថា យើងបានចាញ់គ្រប់គ្រាន់ហើយ”។

គួរបញ្ជាក់ថា វីដេអូចម្រៀងផលិតថ្មី បទ “Time to Rise!” បកស្រាយដោយ តារាចម្រៀងរ៉េប វណ្ណ ដា រួមដោយបញ្ចូល ឧបករណ៍តន្ត្រីបុរាណ ចាប៉ី ព្រមទាំងសំនៀង របស់ព្រឹទ្ធាចារ្យ គង់ ណៃ ក៏ធ្លាប់បានបំបែកឯតទគ្គកម្មដំបូងរបស់កម្ពុជា ដែលមានអ្នកចូលទស្សនាត្រឹមរយៈពេល ២៤ ម៉ោង ដល់ទៅ ១ លានដង។ មិនត្រឹមតែប៉ុណ្ណោះ MV បទចម្រៀងនេះ ក៏បានជាប់ចំណាត់ថ្នាក់លេខ ១ “Best Videos of 2021” ដែលជ្រើសរើសដោយ LiFTED Asia ផងដែរ៕

អត្ថបទ៖ ច័ន្ទ វីរៈ