ខ្សែជីវិតសេដ្ឋី ថៃ ទើបទិញកម្មវិធី បវរកញ្ញាចក្រវាល ទម្រាំមានប្រាក់វាល់លាន ជីវិតរងការប្រមាថ

Ann Chakrabongse ត្រូវ​បាន​គេ​ស្គាល់​ថា ​ជា​ស្ត្រី​កែ​ភេទដ៏​ជោគជ័យ​បំផុត​ក្នុង​តំបន់​អាស៊ាន ​មនុស្ស​ជា​ច្រើន​ប្រហែល​ជា​គិត​ថា​ នាងមានជីវិត​ល្អ​ឥត​ខ្ចោះ​គ្រប់​យ៉ាង។ ប៉ុន្តែ​ការ​ពិត ជីវិតនាង​មិន​មែន​ជា​ផ្កា​កុលាប​តាំង​លម្អ​ក្នុងថូមាស​ឡើយ។ ទម្រាំឈានដល់ចំណុច​នេះ Ann ​ត្រូវ​តែ​បង្កើត​គ្រប់យ៉ាង​ដោយ​ខ្លួន​ឯង តាំងពី​នៅក្មេង នៅ​ពេល​នាង​ជា​សិស្សវិទ្យាល័យ។

ដោយឡែក​កាល​ពី​ពេល​ថ្មីៗ​នេះ​ លើ​បណ្ដាញ​សង្គម​អ៊ីនធឺណិត​ កំពុង​តែ​ជជែក​អំពី​ឈ្មោះ Ann Chakrabongse ដែល​ទទួល​បាន​រហស្សនាម សេដ្ឋី​ប្រាក់​លាន​ទើប​តែ​ទិញយកកម្មវិធី​ Miss Universe​ ដែលមានការប្រលងបវរកញ្ញាចក្រវាលជាង ៥០០ លាននាក់ជុំវិញពិភពលោក។

អ្នកជំនួញ Ann Chakrabongse មាន​ឈ្មោះ​ពិត​ថា Jakkaphong Jakrajutatip លោក​កើត​ក្នុង​គ្រួសារ​មាន​ដើម​កំណើត​ចិន ដែល​តឹងរ៉ឹង​ខ្លាំង​ចំពោះ​ការ​កែ​ភេទ និង​ជា​កូនប្រុសច្បងនៃគ្រួសារ។ លោក​មាន​បងប្អូន​បង្កើត​ចំនួន ៥ នាក់ កើតថ្ងៃទី ១៧ ខែ​កុម្ភៈ ឆ្នាំ ១៩៧៩ បច្ចុប្បន្ន​មាន​អាយុ ៤៣ ឆ្នាំ។ Ann បាន​បញ្ចប់​ការ​សិក្សា​ពី​វិទ្យាល័យ និង​សាកលវិទ្យាល័យ វិទ្យាសាស្ត្រ​នយោបាយ នៅ​ប្រទេស​អូស្ត្រាលី។ មុន​នឹង​ក្លាយ​ជា Ann Chakrabongse សព្វ​ថ្ងៃ​នេះ ជីវិត​របស់​លោក​លំបាកណាស់។ ទោះបីជា Ann​ បាន​ទៅ​សិក្សានៅ​​អូស្ត្រាលី​កាលនៅ​អាយុ ១៦ឆ្នាំ ប៉ុន្តែ​គាត់​ត្រូវ​ធ្វើការ​ក្រៅ​ម៉ោង ​ដើម្បី​រក​ប្រាក់​ចំណូល ធ្វើ​ការ​ជា​ក្មេង​ប្រុស​នៅ​ស្ថានីយ​ប្រេង​ឥន្ធនៈ ​ដោយ​ធ្វើ​ការ​ផង​និង​សិក្សា​ផង ហើយ​​ជួយ​ដល់​អ្នក​​ផ្ទះ​ថែម​ទៀត។

Ann បាន​បញ្ចប់​ថ្នាក់​បរិញ្ញាបត្រ​ផ្នែក​វិទ្យាសាស្ត្រ​នយោបាយ​ពី​សាកល​វិទ្យាល័យ Bond មុន​ពេល​ត្រឡប់​មក​កាន់កាប់​អាជីវកម្ម​ជួល​វីដេអូ​ពី​ឪពុក​របស់​គាត់​ ហើយ​​បាន​ចាប់​ផ្ដើម​អាជីវកម្ម​នៅ​អាយុ ២១ ឆ្នាំ ប៉ុន្តែ​ដោយសារ​អាជីវកម្ម​ជួល​រលំ​វីដេអូ​នៅ​ទ្រឹង​ លោក​បាន​ស្វែងរក​ឱកាស​អាជីវកម្ម​ផ្សេង​ទៀត។ ដូច្នេះ​ភាពយន្ត​ឯកសារ Walking With Dinosaurs ត្រូវ​បាន​ផលិត​ជា​ឌីវីឌី​ សម្រាប់​ចែកចាយ​នៅ​ប្រទេស​ថៃ ហើយ​អាច​រក​ចំណូល​ដំបូងបាន ១០លានបាត។

យ៉ាងណាមិញ ​ក្នុង​វ័យ​កុមារភាព ជា​ញឹកញាប់​មនុស្ស​បាន​ជេរ​ប្រមាថ​លោក​ថា «កើត​មក​ដើម្បី​​ក្លាយ​ជា​មនុស្ស​ គ្មានថ្ងៃចម្រើន និង​ជោគជ័យ» ប្រយោគ​នេះ​ហើយ ​​ជា​កម្លាំង​ជំរុញ​ដ៏​សំខាន់ធ្វើ​ឲ្យ​ Ann តស៊ូនិង​ប្រើ​វា​​សម្រាប់ឲ្យ​ខ្លួនឯង​ឲ្យ​ក្លាយ​ជា​មនុស្សប្រសើរជាងមុន រហូត​ដល់​នាង​អាច​ទទួល​បាន​ភាព​ជោគជ័យ ជា​នាយកប្រតិបត្តិនៃ​ក្រុមហ៊ុន​ដែល​មាន​តម្លៃ​រាប់​ពាន់​លាន​ដុល្លារ។

នៅ​ពេល​ជីវិត​ទទួល​បាន​ជោគជ័យ Ann បាន​សម្រេច​ចិត្ត​លាត​ត្រដាង​ប្រាប់​ក្រុម​គ្រួសារ​ អំពី​ចំណង់​ផ្លូវ​ភេទ​ ឪពុក​អាច​ទទួល​យក​បាន តែម្ដាយ​មិន​ទទួល​យក​ឡើយ ហើយ​បដិសេធមិន​និយាយជាមួយគាត់អស់រយៈពេល ៣ ឆ្នាំ។​ ក្រោយមក​គ្រួសារ​ហ៊ាន​ទទួល​យក​ភេទរបស់គាត់ ​ទើប ​Ann ឈានជើងចូលទៅក្នុងសង្គមខាងក្រៅ​ ដោយសម្រេចចិត្តទៅ​កូរ៉េខាងត្បូង​ ដោយ​ចាប់ផ្តើម​ពីការ​វះកាត់ប្តូរ​ភ្នែក រហូតដល់​ប្តូរភេទ។ Ann ក៏ត្រូវគេដឹងថា នាងមាន​កូន២នាក់ ដែលសុទ្ធតែជួលគេឲ្យពរពោះ ខណៈកូនប្រុសទីមួយឈ្មោះ Andrew និងកូនស្រីម្នាក់ឈ្មោះ Angelica ដែលជាកូនកាត់អាល្លឺម៉ង់​និង​ថៃ កើតចេញពីពងរបស់ស្ត្រី​ជនជាតិ​អាមេរិក​ ដើមកំណើត​អាល្លឺម៉ង់។

បច្ចុប្បន្ន​នាង​គឺ​ជា​នាយក​ប្រតិបត្តិ​នៃ​ក្រុមហ៊ុន JKN Global Media Public Company Limited ​នាំ​ចូល​មាតិកា​ពី​កម្មវិធី​បរទេស ជាពិសេស​ប្រទេស​ឥណ្ឌា ដែល​មានវប្បធម៌​ស្រដៀង​នឹង​ថៃ ដើម្បី​លក់​ឲ្យ​ស្ថានីយ​ទូរទស្សន៍​ផ្សេងៗ។ក្រោយមក Ann បាននាំយកក្រុមហ៊ុន JKN Global Media Public Limited មកចុះ​បញ្ជី​ក្នុងផ្សារហ៊ុន MAI ក្នុងឆ្នាំ ២០១៧។ អាជីវកម្មចុងក្រោយរបស់ Anne គឺ Miss Universe Organization (MUO) បន្ទាប់ពីបានឈានដល់កិច្ចព្រមព្រៀងជាមួយ IMG Worldwide, LLC ដែលជាក្រុមហ៊ុន​បុត្រសម្ព័ន្ធ​របស់ Endeavor Group Holdings, Inc. សរុប​មិន​លើស​ពី ១៤ លានដុល្លារ ដើម្បីពង្រីកការរក្សាសិទ្ធិនៃម៉ាកបវរកញ្ញាចក្រវាល ជំរុញកំណើននៃ​ក្រុមអាជីវកម្មពាណិជ្ជកម្ម និងជំរុញឲ្យ JKN ក្លាយ​ជា​ក្រុមហ៊ុន​ពាណិជ្ជកម្ម​មាតិកាសកល។

ផ្អែក​តាម​ទិន្នន័យ​សម្រាប់​ឆ្នាំ ២០២២ Ann Chakrabongse ជាប់​ចំណាត់ថ្នាក់​ទី ១៤៩ នៅ​ក្នុង​មហាសេដ្ឋី​របស់​ប្រទេស​ថៃ ហើយ​ត្រូវ​បាន​គេ​ចាត់​ទុក​ថា​ជា​ស្ត្រី​កែ​ភេទ​ដែល​មាន​តម្លៃ​បំផុត​នៅ​ក្នុង​ប្រទេស​ថៃ និង​អាស៊ី​ ដោយ​ជាប់​ចំណាត់ថ្នាក់​លេខ ៣ លើ​ពិភពលោក៕

ប្រែសម្រួល៖ សាង ស្រីល័ក្ខ

ចុចអាន៖ថៃ ដាក់ទុនវាល់លាន ទិញយកកម្មវិធី បវរកញ្ញាចក្រវាឡ ផ្ដាច់មុខពី អាមេរិក

ចុចអាន៖Miss Grand វៀតណាម ទ្រហោយំអោបអតីតម្ចាស់មកុដ Nguyễn Thúc Thùy ក្រោយមិនជាប់ Top 10 (មានវីដេអូ)