តាម​ការ​សន្យា ទីបំផុត​តារា​សម្ដែង​កូនកាត់ កញ្ញា ស៊ីន យូ​ប៊ី​ន បាន​នាំ​យក​នូវ​សិល្បៈ​វប្បធម៌​ដ៏​ស្រស់​ផូរផង់​របស់​កម្ពុជា ទៅកាន់​ឆាក​អន្តរជាតិ ជាមួយ​នឹង​ការ​បង្ហាញ​ខ្លួន ព្រម​ជាមួយ​វប្បធម៌​ដ៏​អស្ចារ្យ​របស់​កម្ពុជា​ទៅ​កាន់​ពិភពលោក​ទៀត​ផង។

នេះ​គឺជា​មោទកភាព​ដ៏​គួរ​ឲ្យ​ស្ងើចសរសើរ​ចំពោះ​តារា​ស្រី​របស់​ខ្មែរ​កញ្ញា ស៊ីន យូ​ប៊ី​ន ដែល​បាន​រំលេច​ខ្លួន​ជាមួយ​ការ​នាំ​យក​សិល្បៈ និង​វប្បធម៌​ខ្មែរ​ទៅ​បង្ហាញ​ពិភពលោក។ ជា​ចំណាប់អារម្មណ៍​ផ្ទាល់ខ្លួន​របស់​កញ្ញា ស៊ីន យូ​ប៊ី​ន បាន​ថ្លែង​ថា តាម​សន្យា​នេះ​គឺជា​ការ​ឈាន​មួយ​ជំហាន​ទៀត​ក្នុង​ការ​នាំ​សិល្បៈ​វប្បធម៌​ដ៏​ស្រស់​ផូរផង់​របស់​កម្ពុជា​ទៅកាន់​ឆាក​អន្តរជាតិ​ដូចដែល​ខ្ញុំ​ធ្លាប់​បាន​សន្យា​ជាមួយ​ហ្វេនៗ។

ស៊ីន យូ​ប៊ី​ន បន្ត​ទៀត​ថា យូ​ប៊ី​ន មាន​កិត្តិយស​ដែល​បាន​បង្ហាញខ្លួន ព្រម​ជាមួយ​នឹង​វប្បធម៌​ដ៏​ផូរផង់​របស់​កម្ពុជា​នៅ​លើ cover របស់ HARPER’SBAZAAR 3-2023 ទៅកាន់​ពិភពលោក។ យូ​ប៊ី​ន លើក​ឡើង​ដែរ​ថា អរគុណ​ជា​ពិសេស​សម្រាប់​លោក Botramohar Art ដែល​បាន​ដំឡើង​មកុដ​ដ៏​ស្រស់​ស្អាត ដល់​ថ្នាក់​សាសន៍​គេ​ស្រែក wow និង​ព្រឺ​សម្បុរ​ពេញ Studio ពេល​លើក​មកុដ​នេះ​ចេញ​មក។

កញ្ញា ស៊ីន យូ​ប៊ី​ន បន្ថែម​ថា ហេតុ​ដូចនេះ​សង្ឃឹម​ថា​ប្រជាជន​កម្ពុជា​នឹង​ពេញចិត្ត និង​ចូលរួម​សាទរ​ជាមួយ​នឹង Yubin និង proud ជាមួយ​វប្បធម៌​ខ្មែរ​យើង សូម​អរគុណ។

អ្នកគាំទ្រ បាន​បង្ហាញ​ការ​សាទរ និង​លើកទឹកចិត្ត​ឲ្យ​តារា​ស្រី​រូប​នេះ​បន្ត​ការ​នាំយក​សិល្បៈ​វប្បធម៌​ខ្មែរ​ទៅកាន់​ឆាក​អន្តរជាតិ​ផង​ដែរ៕

អត្ថបទ ៖ ចាន់រ៉ា