ប្រវត្តិ Lily Rose តួឯកស្រីរឿង “The Idol” ដែលកំពុងផ្ទុះមតិរិះគន់ជុំទិស

បន្ទាប់ពីលេចមុខជាតួឯកស្រីក្នុងខ្សែភាពយន្តភាគរឿង “The Idol” តារាស្រី Lily Rose Melody Depp ហាក់មិនទទួលការគាំទ្រច្រើនឡើយ ត្បិតសាច់រឿងត្រូវទស្សនិកជនរិះគន់ពីភាពអាសអាភាស និងខ្វះតម្លៃអប់រំដល់អ្នកទស្សនា​ ជាពិសេសឥទ្ធិពលមិនល្អដែលអាចប៉ះពាល់ដល់ក្មេងៗ។

យ៉ាងណាមិញ មុនពេលល្បីក្នុងរឿង “The Idol” ដល់ថ្នាក់ទស្សនិកជនរិះគន់ចាស់ដៃ តារាស្រី Lily Rose ធ្លាប់លេចមុខក្នុងភាពយន្តជាច្រើនរឿងមកហើយ ហើយនាងក៏មានប្រវត្តិជោគជ័យជាច្រើនផងដែរ ។

តាមពិត Lily Rose ជាកូនស្រីបង្កើតរបស់កំពូលតារាសម្ដែង Johnny Depp ដោយនាងធ្លាប់ទទួលជោគជ័យក្នុងវិស័យសិល្បៈយ៉ាងត្រចះត្រចង់ តាំងតែពីវ័យទើប ១៦ឆ្នាំមកម្ល៉េះ។ នាងកើតក្នុងឆ្នាំ១៩៩៩ គឺកូនស្រីពៅរវាង Johnny Depp និងកំពូលតារាម៉ូឌែល Vanessa Paradis ។ បច្ចុប្បន្ន Lily Rose មិនមែនត្រឹមតែជាតារាសម្ដែងប៉ុណ្ណោះទេ ប៉ុន្តែនាងក៏មានអាជីពជាតារាម៉ូឌែល ដែលមានគេស្គាល់យ៉ាងច្រើននៅក្នុងពិភពម៉ូដ។

មុនពេលល្បីដូចបច្ចុប្បន្ន ពាក្យចចាមអារ៉ាមមួយចំនួននិយាយថា តារាស្រីវ័យ ២៤ឆ្នាំរូបនេះ ទទួលបានប្រជាប្រិយរន្ទឺសុះសាយ ដោយសារកេរ្តិ៍ឈ្មោះរបស់ឪពុកម្ដាយជាតារាល្បីស្រាប់។ យ៉ាងណាមិញព័ត៌មានមួយចំនួនទៀតលើកឡើងថា Lily Rose ប្រឹងប្រែងខ្លាំងណាស់ ​ក្នុងវិស័យសិល្បៈ ពោលគឺនាងប្រើសមត្ថភាពខ្លួនឯងសុទ្ធសាធ។

ងាកទៅក្រោយវិញ Lily Rose ចាប់ផ្តើមអាជីពសម្ដែង នៅអាយុ ១៥ឆ្នាំ ដោយដើរតួនៅក្នុងរឿង Tuck ។ បន្ទាប់ពីនោះមក នាងបន្តលេចមុខក្នុងរឿងផ្សេងៗទៀតដូចជា My Last Lullaby, The Dancer និង Voyagers។ល។ គួរឲ្យកត់សម្គាល់ Lily Rose ធ្លាប់បានបង្ហាញខ្លួនក្នុង MV “All around the world” របស់តារារ៉េបប្រុស Rejjie Snow ដោយមានអ្នកទស្សនាជាងមួយលានដង។

ទន្ទឹមនឹងភាពជោគជ័យក្នុងវិស័យភាពយន្ត Lily Rose ក៏មានឥទ្ធិពលខ្លាំងក្នុងពិភពម៉ូដផងដែរ។ នាងត្រូវបានគេចាត់ទុកជាតារាមួយរូបដែលមានស្ទីលផ្ទាល់ខ្លួនគួរឱ្យចាប់អារម្មណ៍ មិនចាញ់ម៉ូឌែលល្បីៗដូចជា Hailey Baldwin និង Kendall Jenner ឡើយ។

នៅអាយុ ១៦ឆ្នាំ Lily Rose បានក្លាយជាអ្នកតំណាងនៃម៉ាកយីហោ Coco Chanel និងបានចូលរួមកម្មវិធីកម្រាលព្រំក្រហមធំៗដូចជា Met Gala និង Cannes ជាដើម។ លើសពីនេះ Lily Rose ត្រូវបានម្ចាស់ប្រេនចាត់ទុកជាតារាបង្ហាញដែលមានផ្ទៃមុខដ៏កម្រ និងត្រូវបាន Coco Chanel ចុះផ្សាយដោយភ្ជាប់ជាមួយនឹងចំណងជើងថា “Princess of Chanel”។

មិនតែប៉ុណ្ណោះកូនស្រី Johnny Depp រូបនេះ ត្រូវគេចាត់ទុកជាតារាស្រីជំនាន់ថ្មី ដែលមានអ្នកស្វែងរកជាបន្តបន្ទាប់ដើម្បីផ្សាយម៉ាកសម្លៀកបំពាក់លំដាប់ខ្ពស់ៗ។ នាងក៏តែងតែបង្ហាញមុខលើក្របទស្សនាវដ្តីម៉ូដល្បីៗដូចជា Vogue, Elle, Glamour ហើយក្នុងឆ្នាំ២០២០ Lily Rose ត្រូវបានបោះឆ្នោតដោយ Harper’s Bazaar ជារូបតំណាងម៉ូដអន្តរជាតិមួយក្នុងចំណោម៉ូឌែល ១៥នាក់លើពិភពលោក។ គេរំពឹងថា Lily Rose នឹងមានភាពល្បីល្បាញមួយកម្រិតបន្ថែមទៀតនាពេលអនាគត៕

ប្រែសម្រួល៖ សន្យា

ចុចអាន៖​ បង្ហាញខ្លួនលើកនេះ Lily-Rose Depp រងភាព​ចម្រូងចម្រាស​ថាលួច​កែសម្ផស្ស

ចុចអាន៖ ច្រើនសន្លឹកដ៏ស្រើបស្រាលរបស់ Jennie ក្នុងភាពយន្ត “The Idol” ធ្លាប់ត្រូវទស្សនិកជនតិះដៀលថាអាសអាភាស