ជីវិតកម្សាន្ដ

ម៉ា ដូណា ស្រកទម្ងន់ ៥ គីឡូ ក្រោយសាងផ្នួសកាន់ទុក្ខឪពុក

បានផុស

២ years មុន

នៅ

ថ្ងៃសៅរ៍ ៥ សីហា ២០២៣

ដោយ

តារាសម្ដែង និងកំប្លែង លោក ម៉ា ដូណា កាលពីថ្មីៗនេះ បានកោរសក់សាងផ្នួសកាន់ទុក្ខលោកឪពុកជាទីស្រលាញ់ដែលបានទទួលមរណភាពដោយគ្មានថ្ងៃវិលត្រឡប់។ យ៉ាងណាមិញតារារូបនេះ ក៏បានរៀបចំពិធីបុណ្យគម្រប់ខួប ៧ ថ្ងៃ ដោយគួប ១០០ ថ្ងៃ កាលពីថ្ងៃទី ០៣ ខែសីហា ផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីបុណ្យគម្រប់ខួប ៧ ថ្ងៃ គួប ១០០ ថ្ងៃ របស់ឪពុកតារាកំប្លែង ម៉ា ដូណា គេសង្កេតឃើញសិល្បករ-សិល្បការិនី ព្រមទាំងមិត្តភ័ក្ដិជិតឆ្ងាយបានចូលរួមយ៉ាងច្រើនកុះករ។ បន្ទាប់ពីបញ្ចប់នូវកម្មវិធីបុណ្យ ៧ ថ្ងៃឪពុក ម៉ា ដូណា បានបញ្ជាក់ដែរថា លោកនឹងលាចាកសិក្ខាបទនៅរសៀលថ្ងៃទី ០៤ ខែសីហានេះ ដើម្បីបម្រើការងារសិល្បៈវិញ។

លោក ម៉ា ដូណា បានថ្លែងប្រាប់ឲ្យដឹងទៀតថា អំឡុងពេលសាងផ្នួសកាន់ទុក្ខលោកឪពុកជាទីស្រលាញ់ លោកបានស្រកសាច់អស់ចំនួន ៥ គីឡូ ដោយគោរពតាមវិន័យព្រះសង្ឃ អត់ឆាន់ ក្នុងនោះ ក៏បណ្ដាលឲ្យលោកឈឺទៀតផង។ បន្ថែមពីនេះ លោក ម៉ា ដូណា បានអរគុណចំពោះសិល្បករ-សិល្បការិនី ដែលបានចូលរួមក្នុងពិធីបុណ្យ ១០០ ថ្ងៃ របស់លោកឪពុកខ្លួន។

សូមបញ្ជាក់ថា ឪពុកបង្កើតរបស់តារាកំប្លែង និងសម្តែង ម៉ា ដូណា បានទទួលមរណភាពកាលពីថ្ងៃទី ២៨ ខែកក្កដា ឆ្នាំ ២០២៣ ដោយសារជំងឺជាច្រើនខែមកនេះ។

លោក ម៉ា ដូណា តែងតែបង្ហាញនូវក្ដីស្រលាញ់ចំពោះលោកឪពុក។ ពិសេសលោកក៏បានបំពេញតួនាទីជាកូនល្អ ដោយការមើលថែលោកឪពុកតាំងពីដើមរហូតដល់ពេលដែលលោកឪពុកត្រូវបាត់បង់ជីវិតផងដែរ៕

អត្ថបទ ៖ ចាន់រ៉ា