ONE PEACE BAND ក្រុមតន្ត្រីតំណាងជាតិនឹងទៅសម្តែងក្នុងព្រឹត្តិការណ៍ប្រគំតន្ត្រីអន្តរជាតិ

ONE PEACE BAND ជាឈ្មោះក្រុមតន្ត្រីកម្ពុជា ដែលបានបង្កើតឡើងដោយការរួមបញ្ចូលគ្នា រវាងក្រុមតន្ត្រីយុវវ័យ Nevrmind Band ជាមួយតារាចម្រៀងល្បី មាស សុខសោភា គ្រូតូរ្យតន្ត្រី និងជាតន្ត្រីករព្យាណូរល្បី សូ ស្រណោះ និង លោក ហ៊ូ សូរ្យវង្សា តន្ត្រីករភ្លេងបុរាណ ដែលនឹងដឹកនាំក្រុម ដោយលោក គង់ សុធារិទ្ធ។

ក្រុមតន្ត្រីយុវវ័យ ONE PEACE BAND មានសមាជិក ៨រូប នឹងចេញទៅធ្វើការសម្ដែងរួមគ្នាលើឆាកអន្តរជាតិ ពីថ្ងៃទី២០-២៣ ខែតុលា ឆ្នាំ២០២៣ ខាងមុខនេះ នៅទីក្រុងហ្សាកាតា ប្រទេសឥណ្ឌូនេស៊ី ដែលក្នុងនោះមានក្រុមតន្ត្រីយុវវ័យចំនួន ១៦ក្រុម មកពី ១១ប្រទេសក្នុងតំបន់អាស៊ាននិងសាធារណរដ្ឋកូរ៉េ។ ព្រឹត្តិការណ៍ប្រគំតន្ត្រីអន្តរជាតិដ៏អស្ចារ្យ ASEAN-Korea Music Festival ហៅកាត់ថា (ROUND Festival 2023) នេះ នឹងធ្វើការផ្សព្វផ្សាយតាមរយៈ YouTube Channel នៃបណ្ដាញទូរទស្សន៍ល្បី KBS របស់កូរ៉េផងដែរ។ ការរៀបចំកម្មវិធីប្រគំតន្ត្រីអន្តរជាតិនេះធ្វើឡើងក្នុងន័យលើកស្ទួយវិស័យសិល្បៈវប្បធម៌ និងជាព្រឹត្តិការណ៍អមនៃកិច្ចប្រជុំកំពូលអាស៊ានលើកទី៤២ ដែលប្រទេសឥណ្ឌូនេស៊ីជាប្រធានប្ដូរវេន និងដើម្បីអបអរសាទរខួប៥០ឆ្នាំ នៃចំណងទំនាក់ទំនងកាទូតរវាងសាធារណរដ្ឋកូរ៉េ និងសាធារណរដ្ឋឥណ្ឌូនេស៊ី។

ក្រុមតន្ត្រីយុវវ័យកម្ពុជាបានរៀបចំ និងនិពន្ធនូវបទចម្រៀងថ្មីល្បីរបស់ខ្លួនដែលជាបទចម្រៀងដើម (Original Songs) ដើម្បីចូលរួមសម្ដែងក្នុងព្រឹត្តិការណ៍ខាងលើ។ នេះគឺជាមោទកភាពដ៏ថ្លៃថ្លាដែលក្រុមតន្ត្រីតំណាងកម្ពុជា នឹងចូលរួមជាមួយក្រុមតន្ត្រីយុវវ័យផ្សេងទៀតសម្ដែងលើឆាកអន្តរជាតិ ជាផ្នែកមួយនៃការលើកស្ទួយមុខមាត់ប្រទេសជាតិតាមរយៈសិល្បៈវប្បធម៌ ដែលសរបញ្ជាក់ឱ្យឃើញពីភាពពេញមុខពេញមាត់លើឆាកអន្តរជាតិ ដោយសារកម្ពុជាមានសុខសន្តិភាពពេញលេញ៕