តារាពហុជំនាញ ខាត់ សុឃីម ចែករំលែកបទពិសោធ ស្តីពីជាប់បំណុលហើយមានការលំបាក (មានវីដេអូ)

កាលពីថ្មីៗកន្លងទៅ តារា​ពហុ​ជំនាញ​អ្នក​នាង ខាត់ សុ​ឃី​ម ធ្លាប់បាន​ធ្វើការ​ចែករំលែក​នូវ​បទ​ពិសោធផ្ទាល់ខ្លួនម្តងរួចមកហើយជុំវិញការ​ដោះស្រាយ​បំណុល ជា​ការ​ឆ្លើយ​តប​ទៅ​នឹងសំណូមពររបស់មហាជន​មួយ​ចំនួន ​ដែល​កំពុង​ជាប់ផុង​នឹង​បំណុល។

តាម​រយៈ​វី​ដេ​អូ​ឃ្លី​ប​បង្ហោះ​នៅ​លើ​បណ្តាញ​សង្គមអ្នក​នាង ខាត់ សុ​ឃី​ម បាន​លើក​ឡើង​ថា “ស្តីពីជាប់បំណុលហើយមានការលំបាក សូមអធ្យាស្រ័យ ប្រសិនខ្វះខាតឬខុសពីបទពិសោធបងប្អូន”។ អ្នកនាងខាត់ សុឃីម បានរៀបរាប់ថា អ្វីដែលអ្នកនាងនិយាយកន្លងមក ឃើញថា មានការគាំទ្រនិងបានសូមណូមពរឲ្យអ្នកនាងនិយាយជាថ្មី។

អ្នកនាងខាត់សុឃីម បន្តថា នៅក្នុងសង្គមបច្ចុប្បន្ន មិនថាតែនៅស្រុកគេឬស្រុកយើងទេ គឺខ្ញុំសម្លឹងឃើញថា អ្នកជាប់បំណុលមានច្រើន ហើយអ្នកដែលយកបំណុលមកប្រើប្រាស់នេះ ក៏មិនត្រឹមត្រូវតាមអ្វីដែលពួកគាត់បានដាក់គោលដៅនៅពេលដែលគាត់ទៅខ្ចីដែរ។ អ៊ីចឹងថ្ងៃនេះ ខ្ញុំមកនិយាយអំពីបទពិសោធខ្លួនឯងទៀតហើយ ព្រោះខ្ញុំមានបទពិសោធខាងដោះបំណុលផ្ទាល់ខ្លួនឯង ទាំងបំណុលតូចនិងធំ។

តារាស្រីពហុជំនាញ ខាត់ សុឃីម បានបន្តថា ដោយសារតែរឿងបំណុល ពេលខ្លះបានធ្វើឲ្យមនុស្សមួយចំនួនគិតខ្លី និងខ្លះទៀតក្លាយជាមនុស្សបាត់បង់ម្ចាស់ការលើខ្លួនឯង ដើរលេងពាលាអាវ៉ាសែរ (ភ្លើតភ្លើន) ស្ទើរលែងជាមនុស្ស នេះដោយសារតែរឿងបំណុល។ អ្នកនាងបន្តថា ពាក្យថាបំណុល គឺយើងត្រូវតែរកសងគេដោយហេតុថា ពេលខ្លះកំពុងតែរកស៊ីឡើង…ស្រាប់តែធ្លាក់មកវិញភ្លាមៗក៏មានដែរ។

ខាត់ សុឃីម បានបន្តទៀតថា នៅពេលដែលយើងធ្លាក់ខ្លួន តើយើងគួរធ្វើដូចម្តេចដើម្បីរកលុយដោះបំណុលគេ? អ្នកនាង ខាត់ សុឃីម បានបញ្ជាក់ថា ជំហានដំបូងយើងត្រូវពិនិត្យមើលសុខភាពហិរញ្ញវត្ថុខ្លួនឯងឡើងវិញ ដោយផ្តោតលើ ចំណូលចំណាយនិងបំណុល គួបផ្សំនឹងការតាំងចិត្តខិតខំប្រឹងប្រែងឡើងវិញ។ ម្យ៉ាងទៀត យើងត្រូវតែកាត់បន្ថយការចំណាយដែលមិនចាំបាច់ជាដើម៕ អត្ថបទ៖ ចាន់រ៉ា