Zhao Lusi ស្ទើតែក្លាយជាមនុស្សរុក្ខជាតិ មិនអាចឈរបាន និង បាត់បង់សមត្ថភាពនិយាយ

ថ្មីៗនេះ Zhao Lusi ស្រាប់តែទទទួលរងនូវជំងឺដាច់សរសៃឈាមខួរក្បាលនៅផ្ទះ បាត់បង់សមត្ថភាពក្នុងការនិយាយ និងមិនអាចឈរ រឺ​ ដើរបាន បន្សល់ទុកនូវសារដ៏គួរខ្លោចចិត្តមួយ។

យោងតាមពត៍មានពី ​​Sina នៅល្ងាចថ្ងៃទី 28 ខែធ្នូ មិត្តភក្តិរបស់ Zhao Lusi ដែលមានឈ្មោះថា Wei Xiao បានផ្តល់ព័ត៌មានស្ថានភាពបច្ចុប្បន្នរបស់តារាស្រីរូបនេះ។ មុន​នេះ Zhao Lusi ត្រូវ​បាន​គេ​ថត​រូបបស់នាងដែល​កំពុង​សម្រាក​ព្យាបាល​នៅ​មន្ទីរពេទ្យ​ក្នុង​ស្ថានភាព​ទន់​ខ្សោយ​មិន​អាច​ឈរ​បាន។

Wei Xiao បានបង្ហាញថា Zhao Lusi កំពុងទទួលបានសមត្ថភាពនិយាយឡើងវិញជាបណ្តើរៗ ហើយបានចាប់ផ្តើមក្រោកឈរឡើងសម្រាប់លំហាត់ស្តារនីតិសម្បទា។

“Zhao Lusi បានសុំឱ្យខ្ញុំប្រាប់អ្នកគ្រប់គ្នាឱ្យដឹងថាស្ថានភាពរបស់នាងកំពុងមានស្ថេរភាពបន្តិចម្តងៗ ដោយសង្ឃឹមថាព័ត៌មាននេះអាចបន្ធូរបន្ថយការព្រួយបារម្ភរបស់មនុស្សគ្រប់គ្នា។ រហូតមកដល់ពេលនេះនាងបានចាប់ផ្តើមនិយាយម្តងទៀតហើយចាប់ផ្តើមក្រោកឈរឡើងដើម្បីអនុវត្តការស្តារនីតិសម្បទា។ យើងទាំងអស់គ្នាមានអារម្មណ៍ថាមានសំណាង និងសប្បាយរីករាយមិនគួរឱ្យជឿ។

ក្នុងរយៈពេលប៉ុន្មានថ្ងៃកន្លងមកនេះ នាងបានសហការយ៉ាងសកម្មជាមួយនឹងការព្យាបាលនៅមន្ទីរពេទ្យ។ ដំបូងឡើយ ត្រូវមានផែនការសម្រាប់ការត្រួតពិនិត្យរយៈពេលវែង តាមការណែនាំរបស់វេជ្ជបណ្ឌិត ប៉ុន្តែការវិវឌ្ឍន៍ថ្មីៗក្នុងរយៈពេលពីរថ្ងៃចុងក្រោយនេះ អាចនាំឱ្យមានការកែតម្រូវ។ យើងទាំងអស់គ្នាមានក្ដីសង្ឃឹមថានឹងទទួលបានលទ្ធផលវិជ្ជមាននៅទីបញ្ចប់” នេះជាអ្វីដែល​ Wei Xiao ចែករំលែកក្នុងនាម Zhao Lusi ។

ទោះបីជានាងមានស្ថានភាពធ្ងន់ធ្ងរក៏ដោយ Zhao Lusi បានលើកទឹកចិត្តមិត្តភក្តិរបស់នាងដោយសុំឱ្យពួកគេកុំយំ។ ភាពកក់ក្តៅ និងទឹកចិត្តដ៏ល្អរបស់នាង បានធ្វើឱ្យអ្នកគាំទ្ររបស់នាង ចាប់អារម្មណ៍យ៉ាងខ្លាំង។

វាច្បាស់ណាស់ថាស្ថានភាពរបស់ Zhao Lusi គឺធ្ងន់ធ្ងរ។ នាងបាត់បង់សមត្ថភាពនិយាយ និងដើរជាបណ្ដោះអាសន្ន ប្រហែលជាដោយសារជំងឺដាច់សរសៃឈាមខួរក្បាលស្រាល។ ឥឡូវនេះនាងត្រូវការពេលវេលាដើម្បីជាសះស្បើយ។

លើសពីនេះ ការបង្ហោះរបស់ Wei Xiao បានបង្ហាញថា Zhao Lusi បានបង្ហាញសញ្ញានៃអស្ថិរភាពសុខភាព មុនពេលមានឧបទ្ទវហេតុនេះ។ នៅពេលដែលពួកគេបានជួបគ្នាក្នុងថ្ងៃខួបកំណើតរបស់នាង ថ្ងៃទី 9 ខែវិច្ឆិកា Wei Xiao បានកត់សម្គាល់ឃើញថាសុខភាព និងផ្លូវចិត្តរបស់ Zhao Lusi មិនល្អនោះទេ។

Wei Xiao ក៏បានបញ្ជាក់ផងដែរថា “ការពិតនៅពីក្រោយឧប្បត្តិហេតុនេះទាមទារឱ្យមានការទទួលខុសត្រូវ និងការបំភ្លឺ​ ទាក់ទងនឹងស្ថានភាពរបស់នាង និងការពិតនៅពីក្រោយវា នៅចំណុចនេះ វាមិនអាស្រ័យលើខ្ញុំ ដែលជាមិត្តភ័ក្តិ ក្នុងការរំលឹកឡើងវិញនូវអ្វីគ្រប់យ៉ាងដែលបានកើតឡើងនោះទេ ហើយក៏មិនគួរ Lusi បើករបួសរបស់នាងឡើងវិញដើម្បីពន្យល់ដែរ។ យើង​សង្ឃឹម​ថា​នរណា​ម្នាក់​នឹង​បោះ​ជំហាន​ទៅ​មុខ​ក្នុង​ការ​ទទួល​ខុស​ត្រូវ និង​បញ្ជាក់​ពី​អ្វី​គ្រប់​យ៉ាង»​។

សេចក្តីថ្លែងការណ៍នេះបានជំរុញឱ្យមានការសង្ស័យនិងចង់ដឹងជាសាធារណៈថាបញ្ហាសុខភាពរបស់ Zhao Lusi អាចត្រូវបានផ្សារភ្ជាប់ទៅនឹងបញ្ហានៅក្នុងក្រុមផលិតកម្ម Lovers ។

កន្លងមក អ្នកសរសេរប្លុកកម្សាន្តដ៏ល្បីរបស់ចិន Liu Daichui បានបង្ហើបថា Zhao Lusi ប្រឈមមុខនឹងការលំបាក និងសម្ពាធយ៉ាងសម្បើម ពេលកំពុងថតរឿងក្រោមការដឹកនាំរបស់ Deng Ke។ Deng ត្រូវបានគេស្គាល់ដោយសារស្នាដៃរបស់គាត់ដូចជា Bright Future, Flight to You និង The Longest Promise៕