អតីតស្វាមី សាន់ឆាយ ត្រូវគេជេរថាមានពុតត្បុត ក្រោយទ្រហោរយំ រំលែកទុក្ខភរិយា

បន្ទាប់ពី Barbie Hsu ឬតួសាន់ឆាយបានទទួលមរណភាព អតីតស្វាមី Wang Xiaofei បានហោះទៅកាន់កោះតៃវ៉ាន់ភ្លាមៗ។ រូបភាព​របស់លោកទ្រហោរយំ រហូតដល់ថ្នាក់ហើមភ្នែក​ បាន​ធ្វើ​ឲ្យ​អ្នក​លេង​អ៊ីនធឺណិត​ជា​ច្រើន​ផ្ទុះការ​ចាប់អារម្មណ៍ជាខ្លាំង។

ទោះបីជាយ៉ាងណាក៏ដោយ រហូតមកដល់ពេលនេះ Wang Xiaofei ត្រូវបានគេរិះគន់ថា ធ្វើពុតចំពោះការស្លាប់របស់ អទីតភរិយាតែប៉ុណ្ណោះ។ ជាពិសេស នៅរសៀលថ្ងៃទី៤ ខែកុម្ភៈ អ្នកជំនួញប្រុសបានបញ្ចេញមតិនៅខាងក្រោមវីដេអូចាស់របស់គូស្នេហ៍ដែលចូលរួមក្នុងកម្មវិធីទូរទស្សន៍មួយថា «មនុស្សស្លាប់ គួរតែជាខ្ញុំវិញទេ»។

ការ​អត្ថាធិប្បាយ​របស់ Wang Xiaofei បាន​ក្លាយ​ជា​ចំណុច​សំខាន់​នៃ​ប្រព័ន្ធ​ផ្សព្វផ្សាយ​សង្គម​យ៉ាង​ឆាប់​រហ័ស រហូតឡើងដល់​លេខ១ លើ​ការ​ស្វែង​រក​ដ៏​ក្តៅ​គគុក​របស់ Weibo។ រូបលោកបានប្រឈម​នឹង​ការ​រិះគន់ពីមហាជនថា ជាមនុស្សពុតត្បុត ពេលដែលភរិយានៅមានជីវិត គាត់មិនបានធ្វើល្អជាមួយឡើយ ជាពិសេសបែរជាធ្វើបាបផ្លូវចិត្តនាងយ៉ាងធ្ងន់ធ្ងរបំផុត ហើយនៅពេលដែលនាងស្លាប់ គាត់បែរជាមកស្រែកយំដូចជាតួកំសត់ទៅវិញ។

មិនតែប៉ុណ្ណោះ អ្នកផ្សេងទៀតថែមទាំងបញ្ចេញមតិបន្ថែមថា អ្នកជំនួញទួញសោកហាក់ធ្វើដូចជា Barbie ជាប្រពន្ធបច្ចុប្បន្នរបស់គាត់! ពេលនេះ លោកសមនឹងទទួលពានរង្វាន់អូស្ការខ្លាំងណាស់។ ក្នុងពេលដែលអ្នកខ្លះជំរុញឲ្យលោកទៅនៅជាមួយសាន់ឆាយថែមទៀតផង។

យ៉ាងណា អ្វីដែលកាន់តែធ្វើឲ្យមហាជនស្អប់ខ្ពើម Wang Xiaofei កាន់តែខ្លាំងនោះគឺថា សាន់ឆាយហាក់ទទួលរងទុក្ខលំបាកក្នុងជីវិតច្រើនហួសប្រមាណ ចាប់តាំងពីរៀបការជាមួយស្វាមីជាង១០ឆ្នាំមក។ មានម្ដងៗនាងវិះតែបាត់បង់ជីវិត នៅពេលដែលនាងសម្រាលកូន ស្រាប់តែបេះដូងលែងដើរ ដែលនោះបង្ហាញពីការមិនយកចិត្តទុកដាក់ពីស្វាមី ក្នុងកំឡុងពេលពរពោះ។ក្រោយមកទៀត នាងបានពរពោះកូនទី៣ ប៉ុន្តែជារឿងសោកស្ដាយ នាងបានរលូតកូនចំពេលដែលទទួលដំណឹងស្វាមីលួចមានស្រី។ សូម្បីតែម្ដាយក្មេក ក៏ជេរស្ដីមកលើរូបនាងមិនសមទំនង រហូតនាងទ្រាំលែងបានទើបសម្រេចដាក់ពាក្យលែងលះនៅឆ្នាំ ២០២១។

គួរបញ្ចាក់បន្ថែមទៀតថា Barbie Hsu និង Wang Xiaofei បានរៀបការនៅឆ្នាំ ២០១១ បន្ទាប់ពីទំនាក់ទំនងបានត្រឹមតែ ៤៩ ថ្ងៃប៉ុណ្ណោះ។ ពួកគេមានកូនពីរនាក់ជាមួយគ្នា កូនស្រីអាយុ ១១ ឆ្នាំ និងកូនប្រុសអាយុ ៩ ឆ្នាំ។ នៅឆ្នាំ ២០២១ ប្តីប្រពន្ធនេះបានលែងលះគ្នា ហើយព្យុះបានចាប់ផ្តើមបន្ទុះចេញពីទីនេះ។ អ្នកទាំងពីរបន្តប្តឹង និងវាយប្រហារគ្នានៅលើបណ្តាញសង្គមឥតឈប់ឈរ៕

អត្ថបទ៖ សាង ស្រីល័ក្ខ

ចុចអាន៖កំណត់ត្រាពេទ្យ ថា សាន់ឆាយ បដិសេធមិនព្យាបាល២ដង ហើយញៀនថែសម្រស់លែងគិតសុខភាព