នី មុន្នីនាថ លើកឡើងអត្ថប្រយោជន៍ ៣ចំណុចនៃការបរិច្ចាគឈាមសង្គ្រោះជីវិតមនុស្ស

ដូចប្រិយមិត្តបានដឹងហើយថាប្រធានមូលនិធិឈាមនិងជាតារាសម្តែង នី មុន្នីនាថ កាលពីថ្មីៗនេះបានរៀមចំកម្មវិធីបរិច្ចាគឈាមដោយមានការគាំទ្រពីមហាជន និងសិល្បករសិល្បរិនីក្នុងការរួមចំណែក ស័្មគ្របរិច្ចាគឈាមដល់មូលនិធិរបស់នាងប្រព្រឹត្តិទៅដោយជោគជ័យ។

បន្ទាប់កម្មវិធីបរិច្ចាគឈាមនេះ បានបញ្ចប់ដោយជោគជ័យនិងទទួលបានការគាំទ្រពីគ្រប់មជ្ឈដ្ឋានកញ្ញា នី មុន្នីនាថ បានសម្តែងក្តីរំភើបនិងអរគុណសម្រាប់ការចូលរួមពីសំណាក់បងប្អូនមហាជន ព្រមទាំងប្រជាពលរដ្ឋខ្មែរ។ នី មុន្នីនាថ បានចាត់ទុកការបរិច្ចាគឈាម គឺមានសារ:ប្រយោជន៍សំខាន់ជួយសង្គ្រោះជីវិតមនុស្ស។

ជាមួយគ្នានេះដែរកញ្ញា នី មុន្នីនាថ បានបំផុសដោយលើកឡើងនៅអត្ថប្រយោជន៍ ៣ចំណុច នៃការបរិច្ចាគឈាមសង្គ្រោះជីវិតមនុស្ស។ ប្រធានមូលនិធិឈាមកញ្ញា នី មុន្នីនាថ បញ្ជាក់ថា ការផ្តល់ឈាមគឺជាអំពើល្អដ៏អស្ចារ្យ និងជាការជួយសង្គ្រោះជីវិតមនុស្សយ៉ាងពិតប្រាកដ។

នី មុន្នីនាថ បន្តទៀតថា ទោះបីជាដំណើរការនេះអាចធ្វើឱ្យអ្នកមានអារម្មណ៍តក់ស្លុត ឬមិនស្រួលបន្តិចក៏ ដោយក៏វាពិតជាមានអត្ថន័យយ៉ាងធំធេង។ ហេតុអ្វីការផ្តល់ឈាមពិតជាអស្ចារ្យ?
១.ជួយសង្គ្រោះជីវិត ឈាមអ្នកអាចជួយមនុស្សច្រើនឱ្យរួចពីជំងឺគ្រោះថ្នាក់ កុមារកើតមុនពេល ឬអ្នកដែលត្រូវការវះកាត់។
២. រំភើបចិត្ត ដឹងថាអ្នកជាផ្នែកមួយនៃការផ្លាស់ប្តូរដ៏ធំក្នុងជីវិតអ្នកដទៃ។
៣.សុខភាពល្អការផ្តល់ឈាមជា ប្រក្រតីអាចជួយធ្វើឲ្យរាងកាយផ្លាស់ប្ដូរឈាមថ្មី និងពិនិត្យសុខភាពដោយឥតគិតថ្លៃ។អរគុណចំពោះចិត្តអ្នកដែលចង់ជួយសង្គ្រោះអ្នកដទៃ។

គួរបញ្ជាក់ថា កម្មវិធីបរិច្ចាគឈាមរបស់មូលនិធិឈាមគឺតារាសម្តែងកញ្ញា នី មុន្នីនាថ បានរៀបចំឡើងកាលពីថ្ងៃទី០៦ ខែមេសា ឆ្នាំ២០២៥ ក្នុងនោះក៏មានការចូលរួមយ៉ាងកុះករពីអ្នកគាំទ្រ និងសិល្បករសិល្បការិនី ដើម្បីបរិច្ចាគឈាមជួយសង្គ្រោះជីវិតមនុស្សផងដែរ៕ អត្ថបទ៖ ចាន់រ៉ា