ជីវិតកម្សាន្ដ

តារា K-pop ៥ដួង សាងអាជីទោលដ៏ជោគជ័យនិង មានទំហំទ្រព្យសម្បត្តិម្នាក់ៗដូចសេដ្ឋី

បានផុស

៦ ខែ មុន

នៅ

ថ្ងៃអង្គារ ៦ ឧសភា ២០២៥

ដោយ

ដោយធ្លាប់បានបង្កើតកេរ្តិ៍ឈ្មោះរៀងៗខ្លួន ជាមួយក្រុមល្បីៗដូចជា BIGBANG, BLACKPINK ឬ BTS សិល្បករ K-pop កំពូលៗជាច្រើន បានបង្ហាញពីការទាក់ទាញផ្ទាល់ខ្លួន បន្ទាប់ពីចាកចេញក្រុម ដើម្បីបន្តអាជីពទោលកាន់តែជោគជ័យលើសពីអ្វីៗទាំំងអស់។

ទោះបីជាតារាល្បីៗទាំងនោះមានឧបសគ្គក្នុងអាជីព ដូចជា កាតព្វកិច្ចបម្រើយោធា ជម្លោះជាមួយក្រុមហ៊ុនគ្រប់គ្រង ឬសម្ពាធដើម្បីរក្សាមុខមាត់ក្នុងស្រទាប់មហាជនក៏ដោយ ក៏ពួកគេនៅតែទទួលបានសមិទ្ធផលគួរឲ្យចាប់អារម្មណ៍នៅលើឆាកអន្តរជាតិ និងក្នុងវិស័យពាណិជ្ជកម្ម។

ខាងក្រោមនេះគឺជាតារាកូរ៉េ៥រូបដែលលេចធ្លោបំផុតក្នុងអាជីពទោល K-pop នាសម័យកាលបច្ចុប្បន្ននេះព្រមទាំងទំហំទ្រព្យសម្បត្តិដែលពួកគេមានច្រើនមិនធម្មតាឡើយ។

១. នាង Lisa នៅក្រុម BLACKPINK

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាង Lisa ត្រូវគេចាត់ទុកថា ជាតារាចម្រៀងទោលម្នាក់ ដែលទទួលបានជោគជ័យបំផុតក្នុងប្រវត្តិសាស្ត្រ K-pop។ ជាមួយនឹងកំណត់ត្រាពិភពលោកហ្គីណេសចំនួន៩ នាងបានក្លាយជាសិល្បករទោលរបស់ K-pop ច្រើនជាងគេ។ នាងក៏ជាអ្នកដំបូងគេដែលឈ្នះពានរង្វាន់ K-pop ល្អបំផុតនៅក្នុងកម្មវិធី MTV Video Music Awards ឆ្នាំ ២០២២ និងជាសិល្បករ K-pop ដែលមានអ្នកតាមដានច្រើនបំផុតនៅលើ Instagram ផងដែរ។

ក្រៅពីតន្ត្រី នាង Lisa ក៏ជ្រៀតខ្លួនចូលទៅហូលីវូដ និងជាតំណាងរបស់ម៉ាកយីហោម៉ូដប្រណីតជាច្រើន។ យោងតាម Celebrity Net Worth នាងគឺជាសមាជិកដែលមានបំផុតទីពីររបស់ក្រុម BLACKPINK ជាមួយនឹងទ្រព្យសម្បត្តិប៉ាន់ស្មានចំនួន ២៥លានដុល្លារ។

២ នាង Rose នៅក្រុម BLACKPINK

ការចេញបទចម្រៀងទោលរបស់នាងនៅឆ្នាំ ២០២១ នាង Rose បានបង្កើតកំណត់ត្រាយ៉ាងឆាប់រហ័សជាមួយនឹងបទ ចម្រៀងទោល ដែលមានចំណាត់ថ្នាក់ខ្ពស់បំផុតនៅលើតារាង Billboard Hot 100។ ថ្មីៗនេះ ការសហការរបស់តារាស្រីវ័យ២៨ឆ្នាំ ជាមួយអ្នកចម្រៀងអាមេរិក លោក Bruno Mars លើបទក្រោមចំណងជើងថា «APT» ហើយនោះបានជួយឲ្យនាងឈ្នះកំណត់ត្រាពិភពលោក Guinness World Record មួយផ្សេងទៀត ខណៈពេលដែលនាងក៏កំពុងពង្រឹងតំណែងជាសិល្បករទោលពិភពលោកដ៏លេចធ្លោម្នាក់ផងដែរ។ នៅឆ្នាំ ២០២៥ យោងតាមស្ថិតិ Celebrity Net Worth តារាកូរ៉េរូបនេះ ត្រូវបានគេវាយតម្លៃថា ជាសមាជិក BLACKPINK ដែលមានជាងគេបំផុតពោលគឺ ៣០លានដុល្លារ

៣ លោក Jungkook ក្រុម BTS

ក្នុងនាមជាសមាជិកក្រុម BTS ដំបូងដែលចេញចម្រៀងទោលជាផ្លូវការ Jungkook បានបន្តបង្កើតកំណត់ត្រាពិភពលោកយ៉ាងគគ្រឹកគគ្រេងបំផុត។ បទ «Seven» បានក្លាយជាចម្រៀង K-pop លឿនបំផុតដែលឈានដល់ ១ ពាន់លានលើវេទិកា stream និងនៅលើ Spotify លើសបទ Flowers របស់តារាចម្រៀង Miley Cyrus ទៅទៀត។ គាត់ក៏ជាសិល្បករទោលកូរ៉េដំបូងគេដែលមានបទចម្រៀងច្រើនលើសពី ១ ពាន់លានដង។ គិតត្រឹមឆ្នាំ ២០២៤ តារាប្រុសវ័យ២៧ឆ្នាំ មានទ្រព្យសម្បត្តិសរុប ៣៥ លានដុល្លារ ដែលស្ថិតនៅលំដាប់ទីពីរបន្ទាប់ពី V (Kim Taehyung) ក្នុងក្រុម BTS ។

៤ G-Dragon ក្រុម BIGBANG

ត្រូវបានគេដាក់ឈ្មោះថា «King of K-pop» តារាប្រុស G-Dragon គឺជាតារាតន្ត្រី និងម៉ូដដែលកេរ្តិ៍ដំណែលបានអូសបន្លាយជាងមួយទសវត្សរ៍។ ទោះបីជាបានរំខានអាជីពរបស់គាត់អស់រយៈពេល ១២ ឆ្នាំក៏ដោយក៏គាត់នៅតែធ្វើឲ្យមានការភ្ញាក់ផ្អើលនៅក្នុងសហរដ្ឋអាមេរិក ជាមួយនឹងអាល់ប៊ុមថ្មី «Übermensch» ហើយបានបង្ហាញខ្លួននៅលើ Billboard 200 ចំនួនបីដងឯណោះ។ ក្រៅពីតន្ត្រី តារារៀមច្បងរូបនេះក៏ជាមុខមាត់គួរឲ្យចាប់អារម្មណ៍ក្នុងឧស្សាហកម្មផ្សាយពាណិជ្ជកម្មផងដែរ ដោយមានទ្រព្យសម្បត្តិប្រមាណជា ៣០ លានដុល្លារ។

៥ Jackson Wang ក្រុម GOT7

មានដើមកំណើតមកពីហុងកុង និងល្បីល្បាញជាមួយក្រុមកូរ៉េ GOT7 លោក Jackson Wang បានបង្កើតស្លាកកំណត់ត្រាផ្ទាល់ខ្លួន បង្កើតម៉ាកយីហោម៉ូដ និងដណ្តើមបានមុខមាត់លើឆាកអន្តរជាតិជាច្រើន។ គាត់ត្រូវបានផ្តល់កិត្តិយសដោយទស្សនាវដ្ដី Forbes ក្នុងបញ្ជី «30 Under 30 China» ហើយបានទទួលពានរង្វាន់តន្ត្រីធំៗជាច្រើនដូចជា៖ កំណត់ត្រាប្រចាំឆ្នាំ និង ពានរង្វាន់តន្ត្រីប៉ុបអាស៊ី។

លើសពីនេះ អាជីពទោលរបស់ សិល្បករហុងកុងរូបនេះ បច្ចុប្បន្នកំពុងរីកចម្រើនទាំងនៅអាស៊ី និងលោកខាងលិច ព្រមជាមួយនឹងទ្រព្យសម្បត្តិលើសពី ១០០ លានដុល្លារអាមេរិកឯណោះ។

យ៉ាងណាមិញ តារាកូរ៉េខាងលើនេះគឺភត្តុតាងដ៏កម្រមួយដែលអាចបញ្ចាក់បានថា ទោះបីជាពួកគេបំបែកខ្លួនចេញពីក្រុម ក្លាយជាសិល្បករទោលក៏ពិតមែន។ ប៉ុន្តែម្នាក់ៗកាន់តែបង្ហាញអំពីនិរន្តរភាព និងចរិតផ្ទាល់ខ្លួនរបស់ពួកគេឲ្យទស្សនិកជនកាន់តែទទួលស្គាល់។ ជាពិសេសថែមទៀត តារាប្រុស-ស្រី ទាំងនោះ មិនត្រឹមតែមានកេរ្តិ៍ឈ្មោះក្នុងក្រុមប៉ុណ្ណោះទេ ប៉ុន្តែថែមទាំងបង្កើតម៉ាកយីហោផ្ទាល់ខ្លួន ដោយបញ្ជាក់ពីជំហររបស់ពួកគេរៀងៗខ្លួន នៅក្នុងឧស្សាហកម្មកម្សាន្តទូទាំងពិភពលោកដែលកំពុងតែរីកចម្រើនទៅមុខឥតឈប់ឈរ៕

អត្ថបទ៖ សាង ស្រីល័ក្ខ

ចុចអាន៖សុខភាពតារាជើងចាស់កូរ៉េរហ័សនាម «ជីតាជាតិ» Lee Soon-jae កាន់តែទ្រុឌទ្រោម