សមាគមសិល្បករខ្មែរ ស្ញប់ស្ញែងនូវទឹកចិត្តប្រពៃអ្នកសិល្ប:ដែលព្រមរួមសហការក្នុងស្មារតី «សាមគ្គីដើម្បីកម្ពុជា»

ក្នុងស្មារតី «សាមគ្គីគ្នាដើម្បីកម្ពុជា» សិល្បករសិល្បការិនីខ្មែរជាច្រើនរូប បានចំណាយ​ពេលវេលាផ្ទាល់ខ្លួនគាំទ្រដល់ដំណើរការរៃអង្គាសថវិកា «មូលនិធិស៊ីធីអិនទ្រទ្រង់កងទ័ពការពារព្រំដែនជាតិ» ។ សកម្មភាពនេះ ក៏ត្រូវបានប្រធានសមាគមសិល្បករខ្មែរ បង្ហាញការកោតសរសើរ ហើយចាត់ទុកជាសកម្មភាពមិនអាចកាត់ថ្លៃបាន និងលើកឡើងថា «ខ្មែរសាមគ្គី ខ្មែរខ្លាំង» ។

ជាមួយគ្នានេះ សមាគមសិល្បករខ្មែរ បានបង្ហាញការលើកទឹកចិត្តចំពោះសិល្បករសិល្បការិនីខ្មែរ ដែលបានរួមគ្នាស្ម័គ្រចិត្តក្នុងស្មារតីនេះផងដែរ និងថ្លែងការអរគុណជាពិសេស ដល់ទឹកចិត្តរបស់សម្តេចតេជោ ហ៊ុន សែន និង សម្ដេចកិត្តិព្រឹទ្ធបណ្ឌិត ដែលសម្ដេចទាំងទ្វេបានបរិច្ចាគថវិកាចំនួន ៣០០លានរៀល ដល់មូលនិធិក្នុងការទ្រទ្រង់កងទ័ពការពារព្រំដែនជាតិ។

សមាគមបានបន្តថា ក្រៅពីការចូលរួមក្នុងសកម្មភាពដោយផ្ទាល់យ៉ាងសស្រាក់សស្រាំហើយនោះ ថ្នាក់ដឹកនាំ ក្រុមការងារ សិល្បករ-សិល្បការិនី ជាសមាជិកទាំងអស់ក៏មាននូវសន្ដានចិត្តដ៏ប្រពៃ ចូលរួមឧបត្ថម្ភជាថវិកាទៅតាមលទ្ធភាពផងដែរ។

ឆ្លៀតក្នុងឱកាសវិសេសវិសាលនេះ សមាគមសិល្បករខ្មែរក្រោមការដឹកនាំរបស់លោកជំទាវអ្នកឧកញ៉ា ម៉ៅ ចំណាន គិតម៉េង ជាប្រធាន សូមគោរពថ្លែងអំណរគុណយ៉ាងជ្រាលជ្រៅបំផុតជូនចំពោះ សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ដែលសម្ដេចទាំងទ្វេបានបរិច្ចាគថវិកាចំនួន ៣០០លានរៀល ដល់មូលនិធិក្នុងការទ្រទ្រង់កងទ័ពការពារព្រំដែនជាតិ ព្រមទាំងបន្តអំពាវនាវដល់សប្បុរសជនឱ្យមានការចូលរួមរួមបន្ថែមទៀតផងដែរ។

ក្នុងនោះ សមាគមក៏សូមគោរពថ្លែងអំណរគុណដល់សប្បុរសជនទាំងក្នុងនិងក្រៅប្រទេស ដែលបានចូលរួមបរិច្ចាគជាបន្តបន្ទាប់ តាំងពីមុនពេលអំឡុងពេលផ្សាយផ្ទាល់ និងរហូតមកដល់ពេលនេះ។ ក្រុមការងារមូលនិធិ នៅតែបន្តទទួលនូវថវិកាបរិច្ចាគជាបន្តទៀតពីសប្បុរសជនបងប្អូនសិល្បករសិល្បការិនីជាបន្តទៀត៕ ចាន់រ៉ា