ពូជ្រួញ ស្នើឱ្យរក្សាតម្លៃជាខ្មែរ ស្រលាញ់គ្នា សាមគ្គីគ្នា កុំឆាប់ទម្លាក់ចុះរឿងជម្លោះព្រំដែនដែលគេឈ្លានពាន

លោក ឆេង សុភ័ក្ត្រ អ្នកផលិតមាតិកាល្បីឈ្មោះ ដែលមហាជនស្គាល់ថា “ស្ថាបនិករៀនថត” បានក្រើនរំលឹកដល់សាធារណជនជាថ្មី នូវស្មារតីសាមគ្គីភាព។ សារក្រើនរំលឹកនេះ គឺបន្ទាប់ពីលោកមើលឃើញថា សាធារណជនមួយចំនួនហាក់ឆាប់ដាក់ចុះស្ថានការណ៍ជម្លោះព្រំដែនខ្មែរ-ថៃ ដោយងាកមកចំណាយពេល ចំណាយអារម្មណ៍មិនល្អនឹងគ្នាទៅវិញទៅមក។

តាមរយៈវីដេអូជា ២ជាងនាទី អ្នកផលិតមាតិការូបនេះ បានលើកឡើងថា សូម្បីតែលោកផ្ទាល់ក៏ទទួលបានមតិតិះដៀលមិនសមហេតុផលលើរូបលោកផងដែរ។ តែឆ្លើយតបនឹងមតិដែលមិនមើលឃើញតម្លៃ នៃកិច្ចខិតខំប្រឹងប្រែជាក់ស្តែងរបស់លោក លោកមិនបានឆ្លើយឆ្លងនាំវែងឆ្ងាយនោះឡើយ គឺគ្រាន់តែដាក់ឈ្មោះគណនីហ្វេសប៊ុកនោះ ក្នុង blocked list ប៉ុណ្ណោះ។

ដោយបែបនេះ លោកស្នើថា “រក្សាតម្លៃជាខ្មែរ ស្រលាញ់គ្នា សាមគ្គីគ្នាពេលមានសត្រូវឈ្លានពាន! ឈប់ឈ្លោះគ្នាទៅ អ្នកណាបំពុល block ចោលទៅ” ឯរឿងណាដែលប៉ះពាល់ដល់ប្រយោជន៍ជាតិ និងប៉ះពាល់ដល់អារម្មណ៍ផ្ទាល់ខ្លួន ក៏មើលរំលងកុំតាមដានជាបន្តទៀត។ ជាពិសេស ក្នុងកាលៈទេសៈនេះ​ គប្បីរួមគ្នាធ្វើអ្វីដែលនាំប្រយោជន៍ជូនជាតិ តាមរយៈសកម្មភាពផ្សេងៗទៅតាមលទ្ធភាព៕