ប្រយ័ត្នខុសច្បាប់ ហើយឆ្លើយមិនដឹង! ពូជ្រួញ ក្រើនរំលឹកអ្នកក្រៅអាជីពព័ត៌មានពីសកម្មភាពប៉ះពាល់សន្តិសុខជាតិ

ទាក់ទងនឹងការធ្វើសម្ភាស ផ្សាយរូបភាពសម្ងាត់ទ័ព និងការផលិតមាតិកាណាមួយដែលបង្កអន្តរាយដល់សន្តិសុខជាតិ ដូចជានាំឱ្យមានការបែកបាក់សាមគ្គីភាពជាតិ បំបាក់ទឹកចិត្តកងទ័ព ទំនាក់ទំនងជាមួយប្រទេសដទៃ ការបង្កអរិភាពជាតិសាសន៍ សិទ្ធិបុគ្គល សាធារណមតិជាតិ និងអន្តរជាតិ នឹងត្រូវទទួលវិធានការតាមផ្លូវច្បាប់។

តាមរយៈវីដេអូជាង២នាទី លោក ឆេង សុភ័ក្ត្រ អ្នកផលិតមាតិកាល្បីឈ្មោះ ដែលមហាជនស្គាល់ថា ស្ថាបនិករៀនថត បានក្រើនរំលឹកដល់សាធារណជនជានូវ ៣ចំណុចសំខាន់ៗ ដើម្បីជាការពញ្ញាក់ស្មារតីជនរួមជាតិ ប្រព្រឹត្តិផ្ទុយបំណងរបស់ថ្នាក់ដឹកនាំ និងគោលការណ៍ច្បាប់នៃការផ្សាយដំណឹង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយយោងតាមសេចក្តីណែនាំ ស្តីពីការផ្សព្វផ្សាយ និងការចែកចាយព័ត៌មានផ្តល់ផលអវិជ្ជមានដល់សន្តិសុខជាតិ អ្នកផលិតមាតិកាល្បីឈ្មោះរូបនេះ បានគូសបញ្ជាក់ជាដំណឹងឱ្យជ្រាបទាំងអស់គ្នាថា៖

១. រាល់ការធ្វើដំណើរ និងការចុះយកព័ត៌មាននៅសមរភូមិជួរមុខ ត្រូវមានការជូនដំណឹងនិងស្នើសុំការអនុញ្ញាតពីក្រសួងព័ត៌មាន និងសមត្ថកិច្ចនៅសមរភូមិមុខ ហើយត្រូវកាត់បន្ថយជាអតិប្បរមា ដើម្បីធានាសុវត្ថិភាពផ្ទាល់ខ្លួន និងសន្តិសុខជាតិ និងត្រូវគោរពក្រមសីលធម៌ វិជ្ជាជីវៈសារព័ត៌មាន ច្បាប់ស្តីពីរបបសារព័ត៌មាន និងលិខិតបទដ្ឋាគតិយុត្តជាធរមាននៃព្រះរាជាណាចក្រកម្ពុជា។

២. ហាមផ្សព្វផ្សាយ និងចែករំលែកព័ត៌មាន អំពីទីតាំងឈរជើង ការចល័តទ័ព លេណដ្ឋានកងទ័ព ការប្រើប្រាស់គ្រឿងសព្វាវុធ យោធោប្បករណ៍ និងការសម្ងាត់របស់កងទ័ព ដែលធ្វើឱ្យអន្តរាយដល់សន្តិសុខជាតិ និង បង្កគ្រោះថ្នាក់ដល់អ្នកបំពេញបេសកកម្មជូនជាតិ។

៣. ត្រូវធានាថា មិនធ្វើឱ្យអន្តរាយដល់សន្តិសុខជាតិ ការបែកបាក់សាមគ្គីភាពជាតិ ការបំបាក់ទឹកចិត្តកងទ័ព ទំនាក់ទំនងជាមួយប្រទេសដទៃ ការបង្កអរិភាពជាតិសាសន៍ សិទ្ធិបុគ្គល សាធារណមតិជាតិ និងអន្តរជាតិ ដោយចាំបាច់ត្រូវផ្ទៀងផ្ទាត់ព័ត៌មានជាមួយប្រភពព័ត៌មានផ្លូវការរបស់ថ្នាក់ដឹកនាំជាតិ រាជរដ្ឋាភិបាលកម្ពុជា ក្រសួងការពារជាតិ និងក្រសួងការបរទេស និងកិច្ចសហប្រតិបត្តិការអន្តរជាតិ ក្រសួងព័ត៌មាន និងក្រសួងស្ថាប័នពាក់ព័ន្ធផ្សេងទៀត។