ជើងចាស់ផ្នែកល្ខោនបាសាក់ ចែករំលែកជាចំណេះឱ្យដឹងថា “ល្ខោនបាសាក់” មានឈ្មោះដើមថា “ល្ខោនទ្រើងឃ្លោក”

ប្រធានក្រុមល្ខោនបាសាក់លោក អុល សំអាង បានចេញមុខបញ្ជាក់ថា “ល្ខោនបាសាក់” មានឈ្មោះដើមថា “ល្ខោនទ្រើងឃ្លោក” ដែលមានដើមកំណើតមកពីកម្ពុជាក្រោម ។

ផ្អែកតាមសំណេរលោក អុល សំអាង បានលើកឡើងថា “ល្ខោនបាសាក់មានឈ្មោះដើមថា ល្ខោនទ្រើងឃ្លោក” មានកំណើតនៅដែនដីកម្ពុជាក្រោម ក្នុងស្រុកបាសាក់ ខេត្តព្រះត្រពាំង (សព្វថ្ងៃស្ថិតក្រោមការគ្រប់គ្រងរបស់វៀតណាម) ។ក្រុមល្ខោនបាសាក់នៅទីនោះដំបូងបង្កើតឡើងដោយចៅអធិការវត្តខ្សាច់កណ្តាល (កម្ពុជាក្រោម) ព្រះនាម សួរ និងលោកតាឆាគ្រូន ព្រមទាំងសិស្សគណ គឺគ្រូខ្មៅ​គ្រូកន និងគ្រូខ្លា។​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អុល សំអាង បានបន្តថានៅអំឡុងទស្ស​វត្សឆ្នាំ​១៩៣០ លោកតា ឆាគ្រូន បាននាំល្ខោនទ្រើងឃ្លោកមកសម្តែងនៅក្រុងភ្នំពេញ និងបណ្តាខេត្តមួយចំនួនទៀតស្ថិតនៅតាមដងទន្លេបាសាក់ល្ខោននេះ ក៏ទទួលបានប្រជាប្រិយភាពយ៉ាងឆាប់រហ័សនៅក្រុងភ្នំពេញ។

លោកបន្តថា ដំបូងគេហៅថា “ល្ខោនមកពីស្រុកបាសាក់” ឮលុះក្រោយមកក៏ហៅកាត់ខ្លីថា “ល្ខោនបាសាក់” ហើយជាប់ឈ្មោះរហូតមកដល់សព្វថ្ងៃ ល្ខោនបាសាក់ គឺមានទាំងនិយាយ មានទាំងច្រៀង ហើយកំដរដោយភ្លេងបាសាក់​ ដែល​មានឥទ្ធិពលពីល្ខោនអូប៉េរ៉ារបស់ចិន​ និងវៀតណាម។

លោក អុល សំអាង បញ្ជាក់បន្ថែមថាតួអង្គស្រី (ម្ចាស់ក្សត្រិយ ឬទេពធីតា) តុបតែងខ្លួនស្រដៀងនឹងតួនាងក្នុងរបាំបុរាណ។ ចំណែកតួអង្គប្រុស (ស្តេច, ទេវបុត្រ ឬយក្ស) តុបតែងខ្លួនស្រដៀងនឹងតួអង្គប្រុសក្នុងល្ខោនអូប៉េរ៉ារបស់ចិន​ ឬវៀតណាមដែរ។ ប៉ុន្តែសព្វថ្ងៃ តួអង្គប្រុសតុបតែងខ្លួនស្រដៀង និងតួនាយរោងក្នុងរបាំបុរាណដែរ លើកលែងតែតួយក្សប៉ុណ្ណោះ ដែលនៅរក្សាសម្លៀកបំពាក់ដូចពីមុន។ ចំពោះឆាកវិញច្រើនតុបតែងដោយគំនូរ ប្រាសាទ ឬព្រៃភ្នំសិប្បនិម្មិត៕ ចាន់រ៉ា