ត្រាំ៖ ចំណាប់ខ្មាំង​នៅ​ហ្គាហ្សា​ប្រហែល​ជា​ត្រូវ​ដោះលែង​នៅថ្ងៃ​ចន្ទ​សប្ដាហ៍ក្រោយ

លោក ដូណាល់ ត្រាំ បាននិយាយនៅក្នុងបទសម្ភាសន៍​នា​ថ្ងៃទី​៩​ខែតុលា​ឆ្នាំ​២០២៥ ជាមួយនឹងពិធីករ Fox News លោក Sean Hannity ថា ចំណាប់ខ្មាំងដែលនៅសេសសល់ក្នុង​តំបន់​ហ្គាហ្សា នឹងប្រហែលជាត្រូវបានដោះលែងនា​ថ្ងៃចន្ទ​ទី​១៣​ខែតុលា​ឆ្នាំ​២០២៥។ លោក​ប្រធានាធិបតី​អាមេរិក​ បានធ្វើការកត់សម្គាល់នេះ បន្ទាប់ពីបានប្រកាសថា អ៊ីស្រាអែល និងក្រុមហាម៉ាស បានយល់ព្រមលើដំណាក់កាលដំបូងនៃកិច្ចព្រមព្រៀងសន្តិភាព ដើម្បីបញ្ចប់សង្រ្គាមរយៈពេលពីរឆ្នាំរបស់ពួកគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោមកិច្ចព្រមព្រៀង ចំណាប់ខ្មាំងដែលនៅសេសសល់ទាំងអស់ រួមទាំងសាកសព នឹងត្រូវដោះលែង«ឆាប់ៗនេះ» ជាថ្នូរនឹង​ការ​ដកទ័ពរបស់អ៊ីស្រាអែលពី​តំបន់​ដែល​ព្រមព្រៀង​​គ្នា។ ប្រភព​ពី​មន្ត្រីសេតវិមានជាន់ខ្ពស់ម្នាក់បានប្រាប់សារព័ត៍មាន CBS News និង CNN ថា កិច្ចព្រមព្រៀងនឹងទៅដល់​គណៈរដ្ឋមន្ត្រីអ៊ីស្រាអែល សម្រាប់ការអនុម័តនៅថ្ងៃព្រហស្បតិ៍​នេះ។ បន្ទាប់ពីអនុម័ត​ដោយជោគជ័យ អ៊ីស្រាអែលនឹងដកកងទ័ពរបស់ខ្លួនក្នុងរយៈពេល២៤​ម៉ោង​បន្ទាប់។ ចំណែក​ឯ​ការដោះលែងចំណាប់ខ្មាំងដោយក្រុមហាម៉ាស នឹងចាប់ផ្តើមក្នុងរយៈពេល ៧២​ម៉ោង។

សូមជម្រាប​ថា កាលពី​ចុង​ខែមុន សេតវិមាន បានបង្ហាញផែនការសន្តិភាព ២០ចំណុចសម្រាប់បញ្ចប់ជម្លោះហ្គាហ្សា ដែលផែនការនោះអំពាវនាវឲ្យមាន​បទឈប់បាញ់ជាបន្ទាន់ ការដោះលែងចំណាប់ខ្មាំងថ្នូរនឹងអ្នកទោស ការដកអាវុធក្រុមហាម៉ាស និង ការដកទ័ពអ៊ីស្រាអែលចេញពី​ដែនដីប៉ាឡេស្ទីន។

អ៊ីស្រាអែល បានចាប់ផ្តើមសង្គ្រាមនៅតំបន់ហ្គាហ្សា ដើម្បីឆ្លើយតបទៅនឹងការវាយប្រហារថ្ងៃទី៧ខែតុលាឆ្នាំ២០២៣ ដែលពេលនោះខ្មាន់កាំភ្លើងក្រុមហាម៉ាស បានសម្លាប់មនុស្សប្រមាណ ១ ២០០ នាក់ និងចាប់ ២៥១ នាក់ ផ្សេងទៀតជាចំណាប់ខ្មាំង។

ជាលទ្ធផលនៃសង្គ្រាម, មនុស្ស ៦៧ ១៨៣ នាក់ ត្រូវបានសម្លាប់ដោយអ៊ីស្រាអែលនៅហ្គាហ្សា ក្នុងនោះមានកុមារចំនួន ២០ ១៧៩ នាក់ ហើយកម្ទេចតំបន់នេះសឹងរាបដូចកន្ទេល៕

ដោយ៖ ឈាង