មន្ត្រីថៃម្នាក់ទៀត ត្រូវគេធ្វើឃាតនៅខេត្តភាគខាងត្បូង

មន្ត្រីថៃម្នាក់ទៀតត្រូវបានគេធ្វើឃាតនៅខេត្ត Pattani ស្របពេលស្ថានការណ៍នៅភាគខាងត្បូងថៃ កំពុងវឹកវរខ្លាំង។ 

តាមការផ្សាយរបស់ Khaosod នៅថ្ងៃសុក្រទី១៧ខែតុលាឆ្នាំ២០២៥ ខ្មាន់កាំភ្លើងមិនស្គាល់មុខបានបាញ់សម្លាប់លោក Muhammad Noor Awae ដែលជាអនុប្រធានរដ្ឋបាលឃុំ Khao Tum។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះកើតឡើងក្បែរព្រះវិហារ Ban Koh Ba To ក្នុងស្រុក Yarang ពេលគាត់បើករថយន្តវិលត្រឡប់ពីការអធិស្ឋានថ្ងៃសុក្រ។

បច្ចុប្បន្ន សមត្ថកិច្ចថៃ កំពុងបើកការស៊ើបអង្កេតករណីនេះ និងតាមចាប់ជនល្មើស។

ការវាយប្រហារនេះកើតឡើងមួយថ្ងៃបន្ទាប់ពីប៉ូលិសថៃនិងអ្នកភូមិ ១១នាក់ រងរបួស ក្នុងការផ្ទុះគ្រាប់បែកនៅខេត្ត Narathiwat។

តាមការផ្សាយរបស់ Khaosod ដដែលនេះ, គ្រាប់បែកដែលលាក់ក្នុងធុងសំរាម ត្រូវបានបញ្ជាពីចម្ងាយឲ្យផ្ទុះនាវេលាម៉ោង៨:៥០នាទីព្រឹក ក្នុងហាងកាហ្វេមួយ ស្ថិតនៅចម្ងាយប្រហែល២០០ម៉ែត្រពីប៉ុស្តិ៍ប៉ូលិស Yi-ngo។

ក្នុងចំណោមអ្នកភូមិទាំង៨នាក់ដែលរបួស គឺមាន៤នាក់របួសធ្ងន់ត្រូវបញ្ជូនទៅមន្ទីរពេទ្យ Narathiwat Rajanagarindra ដើម្បីព្យាបាល ខណៈប៉ូលិស៣នាក់ មានរបួសទ្រូងនិងហ៊ឹងត្រចៀក ត្រូវបញ្ជូនទៅព្យាបាលនៅមន្ទីរពេទ្យ Yi-ngo៕

អត្ថបទ៖ សុខ សុវណ្ណ

ចុចអាន៖ ផ្ទុះគ្រាប់បែក មួយគ្រាប់ទៀតនៅភាគខាងត្បូងប្រទេសថៃ របួសប៉ូលិសនិងអ្នកភូមិ ១១នាក់