ផ្ទុះគ្រាប់បែក មួយគ្រាប់ទៀតនៅភាគខាងត្បូងប្រទេសថៃ របួសប៉ូលិសនិងអ្នកភូមិ ១១នាក់

ខេត្តភាគខាងត្បូងប្រទេសថៃ រងការវាយប្រហារទៀតហើយ ដោយនៅព្រឹកថ្ងៃព្រហស្បតិ៍ទី១៦ខែតុលាឆ្នាំ២០២៥ គ្រាប់បែកទម្ងន់១០គីឡូក្រាមមួយគ្រាប់ បានផ្ទុះបណ្តាលឲ្យមន្ត្រីប៉ូលិស៣នាក់និងអ្នកភូមិ៨នាក់រងរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Khaosod, គ្រាប់បែកដែលលាក់ក្នុងធុងសំរាម ត្រូវបានបញ្ជាពីចម្ងាយឲ្យផ្ទុះនាវេលាម៉ោង៨:៥០នាទីព្រឹក ក្នុងហាងកាហ្វេមួយ ស្ថិតនៅចម្ងាយប្រហែល២០០ម៉ែត្រពីប៉ុស្តិ៍ប៉ូលិស Yi-ngo នៃខេត្ត Narathiwat។ 

ក្នុងចំណោមអ្នកភូមិទាំង៨នាក់ដែលរបួស គឺមាន៤នាក់របួសធ្ងន់ត្រូវបញ្ជូនទៅមន្ទីរពេទ្យ Narathiwat Rajanagarindra ដើម្បីព្យាបាល ខណៈប៉ូលិស៣នាក់ មានរបួសទ្រូងនិងហ៊ឹងត្រចៀក ត្រូវបញ្ជូនទៅព្យាបាលនៅមន្ទីរពេទ្យ Yi-ngo។

ការវាយប្រហារនេះកើតឡើងមិនដល់មួយថ្ងៃផង បន្ទាប់ពីកងកម្លាំងថៃ បានផ្ទុះអាវុធជាមួយក្រុមផ្តាច់ខ្លួននៅខេត្តភាគខាងត្បូងមួយទៀតគឺ Pattani ដែលឈានដល់បណ្តាលឲ្យមេក្រុមស៊ើបអង្កេតនិងជាមេក្រុមដោះគ្រាប់បែកម្នាក់ផងនោះ បាត់បង់ជីវិត។

លោក Somsak Naksen មកពីអង្គភាពល្បាតព្រំដែនលេខ៤៤៤ ត្រូវក្រុមផ្តាច់ខ្លួនបាញ់ចំក្បាលស្លាប់ ពេលចុះធ្វើប្រតិបត្តិការក្នុងការប្រយុទ្ធគ្នា នៅក្បែរវិទ្យាស្ថាន​ Attarbiyatul Hadeesah Ponoh ក្នុងភូមិលេខ៤ ឃុំ Bang Kao ស្រុក Sai Buri។

ក្រោយការវាយប្រហារនេះ មន្ត្រីថៃបានបើកការស៊ើបអង្កេតរកជនល្មើសជាបន្តទៀត និងថែមទាំងដាក់ពង្រាយកម្លាំងដើម្បីពង្រឹងសន្តិសុខ ហើយបង្កើនការប្រុងប្រយ័ត្នឈានដល់កម្រិតខ្ពស់។

ការវាយប្រហារជាបន្តបន្ទាប់ កំពុងបង្កជាចលាចលនិងភាពវឹកវរ ធ្វើឲ្យពលរដ្ឋថៃ នៅតាមបណ្តាខេត្តភាគខាងត្បូង ត្រូវរស់នៅក្នុងភាពភិតភ័យរៀងរាល់ថ្ងៃ ដោយមិនដឹងថា ថ្ងៃណាទើបពួកគេអាចស្រណុកចិត្ត ឈប់បារម្ភនិងខ្លាចរអា៕

អត្ថបទ៖ សុខ សុវណ្ណ

ចុចអាន៖ មេដោះគ្រាប់បែកនិងជាមេផ្នែកស៊ើបអង្កេតថៃ ត្រូវបាញ់សម្លាប់ក្នុងការប្រយុទ្ធនៅ ភាគខាងត្បូង