ត្រាំ ធ្វើដំណើរទៅកាន់ប្រទេសជប៉ុន មុនពេលជួបជាមួយលោក ស៊ី ជីនពីង

ប្រធានាធិបតីអាមេរិក ដូណាល់ ត្រាំ នឹងធ្វើដំណើរទៅកាន់ប្រទេសជប៉ុននៅថ្ងៃចន្ទ ទី២៧ ខែតុលា នេះក្នុងជើងទីពីរនៃដំណើរទស្សនកិច្ចនៅតំបន់អាស៊ី ដែលត្រូវបានគេរំពឹងថានឹងបញ្ចប់ដោយកិច្ចប្រជុំជាមួយលោក ស៊ី ជីនពីង ប្រធានាធិបតីចិននៅកូរ៉េខាងត្បូង។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AFP។

ដំណើរទស្សនកិច្ចនៅអាស៊ីនេះ ជាដំណើរទស្សនកិច្ចលើកដំបូងរបស់លោក ត្រាំ ចាប់តាំងពី លោក វិលត្រឡប់មកកាន់តំណែងវិញ។ លោក ត្រាំ បានចាប់ផ្តើមដំណើរទស្សនកិច្ចរបស់លោកនៅប្រទេសម៉ាឡេស៊ី ដោយលោកបានចុះហត្ថលេខាលើកិច្ចព្រមព្រៀងពាណិជ្ជកម្ម និងរ៉ែ និងបានផ្តល់កិច្ចព្រមព្រៀងពាណិជ្ជកម្មថ្មីដល់ប្រទេសកម្ពុជា និងថៃ និងធ្វើអធិបតីក្នុងកិច្ចព្រមព្រៀងឈប់បាញ់រវាងប្រទេសកម្ពុជានិងថៃក្នុងអំឡុងពេលកិច្ចប្រជុំកំពូលអាស៊ានផងដែរ។

បន្ទាប់មក លោក ត្រាំ នឹងធ្វើដំណើរទៅកាន់ប្រទេសជប៉ុន ដើម្បីជួបជាមួយព្រះចៅអធិរាជ Naruhito និងនាយករដ្ឋមន្ត្រីថ្មីជប៉ុនលោកស្រី Sanae Takaichi។ គួរបញ្ជាក់ដែរថា លោកស្រី Sanae Takaichi និយាយថា ការពង្រឹងទំនាក់ទំនងជាមួយសហរដ្ឋអាមេរិកគឺជាអាទិភាពចម្បងរបស់លោកស្រី។ លើសពីនេះប្រទេសជប៉ុនភាគច្រើនត្រូវបានរួចផុតពីពន្ធពាណិជ្ជកម្មដ៏ច្រើនដែលលោក ត្រាំ បានដាក់លើប្រទេសជាច្រើនទៀត។

សូមបញ្ជាក់ថាផ្នែកសំខាន់បំផុតនៃដំណើរទស្សនកិច្ចនេះនឹងស្ថិតនៅប្រទេសកូរ៉េខាងត្បូង ជាកន្លែងដែលលោក ត្រាំ មានគម្រោងជួបជាមួយលោក ស៊ី ជីនពីង ក្នុងអំឡុងពេលកិច្ចប្រជុំកំពូល APEC ដើម្បីបន្ធូរបន្ថយភាពតានតឹងពាណិជ្ជកម្មរវាងសហរដ្ឋអាមេរិក និងចិន។ លោក ត្រាំ ក៏បាននិយាយផងដែរថា លោកអាចនឹងជួបជាមួយមេដឹកនាំកូរ៉េខាងជើង លោក គីម ជុងអ៊ុន ប្រសិនបើអាចធ្វើទៅបាន ដោយសង្ឃឹមថានឹងចាប់ផ្តើមការចរចាឡើងវិញលើសន្តិភាព និងការរំសាយអាវុធនុយក្លេអ៊ែររបស់កូរ៉េខាងជើង៕

អត្ថបទ៖ ប៊ុន សុភាព