អាមេរិក​បញ្ជូននាវាចម្បាំង​១​គ្រឿង​ទៀត​ក្បែរ​វ៉េណេស៊ុយអេឡា បង្កើន​សម្ពាធ​​លើ​លោក​ម៉ាឌូរ៉ូ

នាវាពិឃាត​បំពាក់​ដោយ​មីស៊ីលដឹកនាំដោយសហរដ្ឋអាមេរិក បានចូលចតនៅរដ្ឋធានី​នៃ​ប្រទេស​​ទ្រីនីដាដនិង​តូបាហ្គោ កាលពីថ្ងៃអាទិត្យ​ទី​២៦​ខែ​តុលា​ ខណៈដែលរដ្ឋបាល​លោក​ដូណាល់ ត្រាំ កំពុង​បង្កើនសម្ពាធយោធារបស់ខ្លួនទៅលើប្រទេសជិតខាង​​គឺ វ៉េណេស៊ុយអេឡា និងរដ្ឋាភិបាល​របស់​លោក​នីកូឡាស ម៉ាឌូរ៉ូ។

នាវា USS Gravely បាន​ទៅ​ដល់រដ្ឋធានី​ព័រអេស្ប៉ាញ ជាផ្នែក​មួយ​នៃប្រតិបត្តិការក្នុងតំបន់ ដែលរួមបញ្ចូលផងដែរនូវការដាក់ពង្រាយនាវាផ្ទុកយន្តហោះ​ចម្បាំង USS Gerald R. Ford ដែលកំពុងធ្វើដំណើរទៅជិតដែនទឹកវ៉េណេស៊ុយអេឡា។ លោក​ម៉ាឌូរ៉ូ បានថ្កោលទោសទង្វើនេះ ដោយចោទប្រកាន់ទីក្រុងវ៉ាស៊ីនតោនថាកំពុងស្វែងរក«បង្កើតសង្រ្គាម​ថ្មី​មិន​ចេះ​ចប់​មិន​ចេះ​ហើយ» ប្រឆាំងនឹងប្រទេសរបស់គាត់។

មន្ត្រីអាមេរិកបាននិយាយថា កង​នាវា Gravely នឹងបន្តនៅ​​ប្រទេស​​ទ្រីនីដាដនិង​តូបាហ្គោ រហូតដល់ថ្ងៃព្រហស្បតិ៍ ដើម្បីធ្វើសមយុទ្ធហ្វឹកហ្វឺនរួមគ្នាជាមួយកងកម្លាំងក្នុងតំបន់។ លោកស្រី Jenifer Neidhart de Ortiz ប្រមុខ​ស្តីទី​នៃ​ស្ថានទូតសហរដ្ឋអាមេរិក​ប្រចាំ​តំបន់ បាននិយាយថា «សមយុទ្ធទាំងនេះដោះស្រាយការគំរាមកំហែងរួមគ្នាដូចជា ឧក្រិដ្ឋកម្មឆ្លងដែន និងបង្កើតភាពធន់តាមរយៈការបណ្តុះបណ្តាល បេសកកម្មមនុស្សធម៌ និងកិច្ចខិតខំប្រឹងប្រែងផ្នែកសន្តិសុខ»។

មន្ត្រីយោធាជាន់ខ្ពស់​ប្រទេស​ប្រទេស​​ទ្រីនីដាដនិង​តូបាហ្គោ ដែលសុំ​មិន​បញ្ចេញ​ឈ្មោះ​​ បាន​ប្រាប់​កាន់សារព័ត៌មាន Associated Press ថា ដំណើរទស្សនកិច្ចនេះទើប​រៀបចំឡើងនាពេលថ្មីៗដែរ​ទេ។ លោកស្រី​នាយករដ្ឋមន្ត្រី Kamla Persad-Bissessar បានគាំទ្រជាសាធារណៈចំពោះវត្តមាន និងប្រតិបត្តិការរបស់សហរដ្ឋអាមេរិកដែលកំពុងបន្តផ្តោតលើអ្នកជួញដូរគ្រឿងញៀនដែលត្រូវបានសង្ស័យនៅក្នុងដែនទឹក​តំបន់​ការ៉ាប៊ីន។

ទោះជាយ៉ាងណាក៏ដោយ ការដាក់ពង្រាយនេះបានបង្ក​ឲ្យ​មានការតវ៉ានៅក្នុងរដ្ឋធានី​ព័រអេស្ប៉ាញ។ លោក David Abdulah មេដឹកនាំគណបក្ស Movement for Social Justice បានរិះគន់ការសម្រេចចិត្តអនុញ្ញាត​ឲ្យ​នាវាចម្បាំងអាមេរិកចូលចតនៅជិតប្រទេស​វ៉េណេស៊ុយអេឡា ដោយហៅវាថា​ជា​ទង្វើ«គួរឲ្យ​ស្អប់ខ្ពើម»។

ដំណើរ​​របស់​នាវា​ចម្បាំង​​​នេះ​ ធ្វើ​ឡើង​បន្ទាប់​ពី​មាន​ការ​ព្រមាន​ពី​ស្ថានទូត​អាមេរិក​កាលពី​ពេល​ថ្មីៗ​នេះ​ដែល​បាន​ណែនាំ​ដល់​ពលរដ្ឋ​អាមេរិកាំង​នៅ​ទ្រីនីដាដ និង​តូបាហ្គោ​ឲ្យ​ចៀសវាង​កន្លែង​របស់​រដ្ឋាភិបាល ​ដោយសារ​ការ​គំរាមកំហែង​ផ្នែក​សន្តិសុខ។

Caricom ដែលជាប្លុកសហគមន៍ការ៉ាប៊ីន​ដែលមានរដ្ឋ​ជា​សមាជិក​ចំនួន​​១៥ បានជំរុញ​ឲ្យ​មានការសន្ទនា ចំពេលមានភាពតានតឹងក្នុងតំបន់កើនឡើង។ ​​ទ្រីនីដាដនិង​តូបាហ្គោ ដែល​ជា​សមាជិក Caricom បានប្រកាន់ជំហរតឹងរ៉ឹងជាងមុន ដោយ​លោកស្រី Persad-Bissessar បានប្រកែកថា តំបន់នេះមិនមែនជាតំបន់នៃសន្តិភាព​ទេ ដោយសារមានអត្រាឧក្រិដ្ឋកម្មហិង្សាខ្ពស់។

សូម​ជម្រាប​ថា កាល​ពី​ដើម​ខែ​សីហា​កន្លង​ទៅ រដ្ឋបាល​របស់​លោក​ ត្រាំ បានប្រកាសថា​ផ្តល់រង្វាន់ទ្វេដង​ឡើង​ដល់ ៥០​លាន​ដុល្លារ សម្រាប់ព័ត៌មានដែលនាំទៅដល់ការចាប់ខ្លួន ឬការកាត់ទោសប្រធានាធិបតីវ៉េណេស៊ុយអេឡា នីកូឡាស​ ម៉ាឌូរ៉ូ ដែល​ត្រូវ​ចោទប្រកាន់ពីបទជួញដូរគ្រឿងញៀន​នៅ​សហរដ្ឋ​អាមេរិក។ អាមេរិក​ចោទប្រកាន់លោក ម៉ាឌូរ៉ូ ថាកំពុង​ប្រើប្រាស់​ប្រាក់ចំណេញពីគ្រឿងញៀនដើម្បីរក្សាអំណាច​ខ្លួន។ លោក ម៉ាឌូរ៉ូ ត្រូវបានចោទប្រកាន់ជាលើកដំបូងនៅក្នុងឆ្នាំ​២០២០ ដោយរដ្ឋអាជ្ញា​​អាមេរិក ដែលថា លោក​បានដើរតួនាទីសំខាន់ក្នុងការសមគំនិតរត់ពន្ធកូកាអ៊ីនដ៏ច្រើនសន្ធឹកសន្ធាប់​ចូលទៅក្នុង​ទឹក​ដី​សហរដ្ឋអាមេរិក។

ក្រៅ​តែ​ពី​លោក ម៉ាឌូរ៉ូ មន្ត្រី​ធំៗ​មួយ​ចំនួន​របស់​វ៉េណេស៊ុយអេឡា ក៏ត្រូវ​អាមេរិក​ប្រកាស​ចាប់​ខ្លួន​ផង​ដែរ ដូចជា រដ្ឋមន្ត្រីការពារជាតិលោក Vladimir Padrino និងអតីតអនុប្រធានាធិបតី Tareck El Aissami ជា​ដើម៕

ដោយ៖ ឈាង