ព័ត៌មានអន្ដរជាតិ

អានុទីន បដិសេធរបាយការណ៍នៃការបើកព្រំដែនកម្ពុជា-ថៃឡើងវិញ

បានផុស

៩ ខែ មុន

នៅ

ថ្ងៃអង្គារ ២៨ តុលា ២០២៥

ដោយ

Chheang

លោក អានុទីន ចានវីរៈគុល កាលពីថ្ងៃចន្ទទី២៧ខែតុលា បានច្រានចោលរបាយការណ៍ដែលថា ប្រទេសថៃនឹងបើកច្រកព្រំដែនជាមួយកម្ពុជាឡើងវិញនៅខែក្រោយ ដោយនិយាយថា លក្ខខណ្ឌទាំងបួនដែលមានចែងក្នុងកិច្ចព្រមព្រៀងសន្តិភាពនាពេលថ្មីៗនេះត្រូវតែបំពេញ មុនពេលទំនាក់ទំនងធម្មតាអាចចាប់ផ្តើមវិញបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម The Nation នាយករដ្ឋមន្ត្រីថៃ បានប្រាប់អ្នកយកព័ត៌មានថា «ខ្ញុំមិនដឹងថា អ្នកណាជាអ្នកកំណត់កាលបរិច្ឆេទនោះទេ» ដោយសំដៅលើការរំពឹងទុកថា ច្រកព្រំដែនអាចបើកឡើងវិញនៅថ្ងៃទី១ខែវិច្ឆិកា។

លោកអានុទីន បានបញ្ជាក់ថា ការបើកឡើងវិញអាស្រ័យលើសកម្មភាពរបស់កម្ពុជា ក្នុងការអនុវត្តសេចក្តីប្រកាសរួមដែលលោកបានចុះហត្ថលេខាជាមួយសម្ដេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា។ លោកថា ប្រទេសថៃនឹងចាំវាយតម្លៃពីសកម្មភាពរបស់កម្ពុជា មុននឹងបន្តទៅជំហានបន្ទាប់នៅក្រោមកិច្ចព្រមព្រៀង។

យោងតាមលោកអានុទីន ថៃចង់បានការដកអាវុធធុនធ្ងន់ចេញពីព្រំដែន ការបោសសម្អាតមីន ការបង្រ្កាបរួមគ្នាលើការបោកប្រាស់តាមអ៊ីនធឺណិត និងការដោះស្រាយការទន្ទ្រានព្រំដែន។

លោកអានុទីន នៅតែប្រកែកទាំងទទឹងទិសថា «ប្រទេសថៃមិនមែនជាប្រទេសដែលបំពានលក្ខខណ្ឌបទឈប់បាញ់នោះទេ ដូច្នេះរាល់សកម្មភាពត្រូវតែចាប់ផ្តើមពីប្រទេសកម្ពុជា។ មានតែបន្ទាប់ពីបញ្ហាទាំងអស់ដែលប៉ះពាល់ដល់សន្តិសុខជាតិត្រូវបានដោះស្រាយ យើងនឹងចាប់ផ្តើមការពិភាក្សាដើម្បីធ្វើឲ្យទំនាក់ទំនងដូចដើម។ ច្រកព្រំដែនអាចបើកឡើងវិញបន្ទាប់ពីនោះ»។

សូមជម្រាបថា ព្រំដែនដែលជាចំណុចស្នូលនៃជម្លោះទឹកដីកម្ពុជា-ថៃអស់ជាច្រើនទសវត្សរ៍មកហើយនោះ ត្រូវបានបិទកាលពីខែមិថុនាឆ្នាំ២០២៥ បន្ទាប់ពីមានភាពតានតឹងកាន់តែខ្លាំងឡើង រួមទាំងការប៉ះទង្គិចប្រដាប់អាវុធក្នុងខែកក្កដា។ ការបិទព្រំដែនបានជះឥទ្ធិពលអវិជ្ជមានដល់អាជីវកម្មដែលពឹងផ្អែកលើការដឹកជញ្ជូនឆ្លងកាត់ព្រំដែន។ លោក Kriengkrai Thiennukul ប្រធានសហព័ន្ធឧស្សាហកម្មថៃ (FTI) បានកត់សម្គាល់ថា ការរំខាននេះបានបង្កើនតម្លៃខ្សែសង្វាក់ផ្គត់ផ្គង់។ រដ្ឋាភិបាលថៃត្រូវបានជំរុញឲ្យផ្តល់ជំនួយផ្នែកហិរញ្ញវត្ថុដល់អាជីវកម្មដែលរងផលប៉ះពាល់ ខណៈដែលការចរចាកំពុងបន្ត៕

ដោយ៖ ឈាង