វិស័យកម្សាន្តពេលរាត្រីនៅប៉ាតាយ៉ាជួបបញ្ហាសេដ្ឋកិច្ចធ្ងន់ធ្ងរ និងកំពុងសុំជំនួយពីរដ្ឋាភិបាល

វិស័យកម្សាន្តពេលរាត្រីដ៏ល្បីល្បាញរបស់ទីក្រុងប៉ាតាយ៉ា ប្រទេសថៃ កំពុងប្រឈមមុខនឹងបញ្ហាសេដ្ឋកិច្ចធ្ងន់ធ្ងរដោយសារការថយចុះអ្នកទេសចរមកលេង ក្រោយមានរឿងអាស្រូវទាក់ទងនឹងទេសចរណ៍ជាបន្តបន្ទាប់។ នេះបើយោងតាមការចេញផ្សាយរបស់ Pattaya Mail នៅថ្ងៃទី២៩ខែតុលា។

ទោះបីជាបារ ក្លឹប និងកន្លែងកម្សាន្តបានបើកឡើងវិញក៏ដោយ អ្នកសំដែងជាច្រើន អ្នកចម្រៀង អ្នករាំ និងឌីជេ និយាយថាពួកគេនៅតែរកចំណូលបានតិចជាងមុន។ អ្នកខ្លះថែមទាំងត្រូវចាកចេញពីប៉ាតាយ៉ា ហើយត្រឡប់ទៅស្រុកកំណើតរបស់ពួកគេវិញ ព្រោះពួកគេមិនអាចមានលទ្ធភាពស្នាក់នៅដោយគ្មានការងារធ្វើជាប្រចាំបាន។

ម្ចាស់អាជីវកម្មនិយាយថា បញ្ហាចម្បងគឺចំនួនអ្នកទេសចរបរទេសទាបដែលមកទស្សនាប្រទេសថៃនៅរដូវកាលនេះ។ ទោះបីជាប្រទេសនេះបានបើកដំណើរការឡើងវិញសម្រាប់ការធ្វើដំណើរអន្តរជាតិកាលពីប៉ុន្មានខែមុនក៏ដោយ ការមកដល់របស់អ្នកទេសចរនៅតែទាបជាងមុនមានជំងឺកូវីដ-១៩។ អ្នកទេសចរជាច្រើនក៏ចំណាយប្រាក់តិចជាងមុនលើការកម្សាន្តរាត្រីផងដែរ ដែលធ្វើឱ្យប៉ះពាល់ដល់ទីកន្លែងតូចៗ និងកម្មករដែលពឹងផ្អែកលើប្រាក់ចំណូលប្រចាំថ្ងៃ។

ស្ថានភាពនេះបានបង្កឱ្យមានការព្រួយបារម្ភកាន់តែខ្លាំងឡើងក្នុងចំណោមអ្នកសំដែង និងម្ចាស់ក្លឹប ដែលឥឡូវនេះកំពុងស្នើសុំឱ្យរដ្ឋាភិបាលផ្តល់ជំនួយហិរញ្ញវត្ថុ ឬកម្មវិធីសង្គ្រោះ។ ពួកគេនិយាយថា បើគ្មានជំនួយទេ មនុស្សជាច្រើននៅក្នុងឧស្សាហកម្មកម្សាន្តរាត្រីអាចបាត់បង់ការងាររបស់ពួកគេជាអចិន្ត្រៃយ៍។ អ្នកខ្លះបានស្នើឱ្យមានការគាំទ្រប្រាក់ឈ្នួលបណ្តោះអាសន្ន ឬការកាត់បន្ថយពន្ធសម្រាប់ទីកន្លែងកម្សាន្ត ដើម្បីជួយពួកគេឱ្យបន្តបើកដំណើរបាន។

អ្នកជំនាញព្រមានថា ការកម្សាន្តពេលរាត្រីរបស់ទីក្រុងប៉ាតាយ៉ាមានសារៈសំខាន់ខ្លាំងណាស់សម្រាប់វិស័យទេសចរណ៍ និងសេដ្ឋកិច្ចក្នុងស្រុក។ វាជួយនាំមកនូវអាជីវកម្មដល់សណ្ឋាគារ ភោជនីយដ្ឋាន និងសេវាកម្មដឹកជញ្ជូន។ ប្រសិនបើឧស្សាហកម្មកម្សាន្តពេលរាត្រីនៅតែបន្តជួបការលំបាក វាអាចប៉ះពាល់ដល់សេដ្ឋកិច្ចទាំងមូលរបស់ទីក្រុងប៉ាតាយ៉ា និងធ្វើឱ្យសេដ្ឋកិច្ចថៃកាន់តែពិបាកងើបឡើងវិញ។

ទោះបីជារដូវកាលទេសចរណ៍ដ៏មមាញឹកនាពេលខាងមុខអាចផ្តល់នូវការងើបឡើងវិញខ្លះក៏ដោយ ក៏មនុស្សជាច្រើនមានការព្រួយបារម្ភថាវានឹងមិនគ្រប់គ្រាន់ដើម្បីជួយសង្គ្រោះឧស្សាហកម្មកម្សាន្តពេលយប់របស់ទីក្រុងនេះបានដែរ។ បើគ្មានការគាំទ្រពីរដ្ឋាភិបាល ការកម្សាន្តពេលរាត្រ្តីដ៏មមាញឹករបស់ប៉ាតាយ៉ាអាចនឹងរងការខូចខាតរយៈពេលវែង និងគំរាមកំហែងដល់ជីវភាពរស់នៅរបស់កម្មកររាប់ពាន់នាក់៕

អត្ថបទ៖ ប៊ុន សុភាព