ព័ត៌មានអន្ដរជាតិ

អ៊ីស្រាអែលប្រគល់សពប៉ាឡេស្ទីន៣០នាក់ ក្រោយហាម៉ាសប្រគល់សពចំណាប់ខ្មាំង២នាក់

បានផុស

៩ ខែ មុន

នៅ

ថ្ងៃសៅរ៍ ១ វិច្ឆិកា ២០២៥

ដោយ

Chheang

គណៈកម្មាធិការអន្តរជាតិនៃកាកបាទក្រហម (ICRC) និងមន្ត្រីមន្ទីរពេទ្យក្នុងតំបន់ បានឲ្យដឹងថា អ៊ីស្រាអែលបានប្រគល់សាកសពជនជាតិប៉ាឡេស្ទីនចំនួន៣០នាក់ទៅកាន់តំបន់ហ្គាហ្សាវិញ មួយថ្ងៃបន្ទាប់ពីក្រុមហាម៉ាសបានប្រគល់អដ្ឋិធាតុរបស់ចំណាប់ខ្មាំងអ៊ីស្រាអែល២នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃសុក្រទី៣១ខែតុលា សាកសពដែលរុំដោយថង់ពណ៌ស ត្រូវបានគេដាក់ជាជួរនៅខាងក្រៅមន្ទីរពេទ្យ Nasser ក្នុងទីក្រុង Khan Younis ភាគខាងត្បូង បន្ទាប់ពីទទួលបានដោយបុគ្គលិកមន្ទីរពេទ្យ។ មន្ត្រីសុខាភិបាលបាននិយាយថា កិច្ចខិតខំប្រឹងប្រែងកំណត់អត្តសញ្ញាណកំពុងដំណើរការ ប៉ុន្តែត្រូវបានពន្យារពេល ដោយសារតែមានការលំបាកព្រោះខ្វះខាតឧបករណ៍ធ្វើតេស្ត DNA។

យោងតាមក្រសួងសុខាភិបាលនៃតំបន់ហ្គាហ្សា ឥឡូវនេះអ៊ីស្រាអែលបានប្រគល់សាកសពប៉ាឡេស្ទីនសរុបចំនួន២២៥នាក់ហើយ ចាប់តាំងពីការចាប់ផ្តើមនៃបទឈប់បាញ់នៅថ្ងៃទី១០ខែតុលា។

ការិយាល័យរបស់នាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ បានប្រកាសថា អដ្ឋិធាតុដែលផ្តល់ដោយក្រុមហាម៉ាស គឺជារបស់ Sahar Baruch និង Amiram Cooper ដែលត្រូវបានចាប់ធ្វើជាចំណាប់ខ្មាំងក្នុងអំឡុងថ្ងៃទី៧ខែតុលាឆ្នាំ២០២៣។ រហូតមកដល់ពេលនេះ ក្រុមហាម៉ាសបានប្រគល់អដ្ឋិធាតុរបស់ចំណាប់ខ្មាំងអ៊ីស្រាអែលចំនួន១៧នាក់វិញ ដោយសាកសពចំនួន១១នាក់បន្ថែមទៀតត្រូវបានគេរំពឹងថានឹងត្រូវធ្វើមាតុភូមិនិវត្តន៍ ក្រោមកិច្ចព្រមព្រៀងដែលបានប្រកាសដោយប្រធានាធិបតីអាមេរិក ដូណាល់ ត្រាំ។

ការដោះដូរនេះ កើតឡើងចំពេលមានភាពតានតឹងម្ដងទៀតនៅតំបន់ហ្គាហ្សា ជាកន្លែងដែលអ៊ីស្រាអែលបានបើកការវាយប្រហារតាមអាកាសយ៉ាងធ្ងន់ធ្ងរក្នុងរយៈពេលប៉ុន្មានថ្ងៃថ្មីៗនេះ បន្ទាប់ពីមានសេចក្ដីរាយការណ៍ថាទាហានអ៊ីស្រាអែលម្នាក់ត្រូវបានសម្លាប់ដោយក្រុមយុទ្ធជនហាម៉ាសនៅទីក្រុង Rafah កាលពីថ្ងៃអង្គារ។ មន្ទីរពេទ្យក្នុងតំបន់ បានប្រាប់ថា យ៉ាងហោចណាស់មនុស្ស១០៤នាក់ត្រូវបានសម្លាប់នៅក្នុងការវាយប្រហារទាំងយប់កាលពីថ្ងៃពុធ៕