ស៊ូដង់៖ មនុស្សជាង ៦ម៉ឺននាក់ កំពុងជាប់ក្នុងទីក្រុងដែលយោធាកាន់កាប់ មិនដឹងជោគវាសនាយ៉ាងណា

ស៊ូដង់ កំពុងកើតមានអំពើប្រល័យពូជសាសន៍ដ៏សាហាវឃោរឃៅ បង្កការសោកសង្រេងទូទាំងពិភពលោកឈានដល់ការអំពាវនាវឲ្យមានអន្តរាគមន៍ជួយប្រទេសនេះជាបន្ទាន់ ដើម្បីសង្គ្រោះជីវិតជនស៊ីវិលរាប់លាននាក់ដែលកំពុងស្ថិតនៅមាត់ជ្រោះមរណៈ ហើយអ្វីដែលគេបារម្ភកាន់តែខ្លាំងនាពេលនេះគឺថា មនុស្សជាង ៦ម៉ឺននាក់កំពុងជាប់នៅក្នុងទីក្រុង el-Fasher ចេញមិនរួច មិនដឹងជោគវាសនាយ៉ាងណា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ PBS News កាលពីថ្ងៃអាទិត្យទី២ខែវិច្ឆិកាឆ្នាំ២០២៥, កងកម្លាំងគាំទ្ររហ័ស (RSF) កំពុងធ្វើសង្គ្រាមជាមួយកងកម្លាំងប្រដាប់អាវុធស៊ូដង់ (SAF) ឈានដល់កើតមានអំពើប្រល័យពូជសាសន៍ដោយស្នាដៃ RSF ដែលកំពុងតាមប្រមាញ់ក្រុមជនជាតិភាគតិចដូចជា Fur, Masalit និង Zaghawa។

ប៉ុន្មានថ្ងៃចុងក្រោយនេះ យោធានៃ RSF បានវាយដណ្តើមបានការកាន់កាប់ទីក្រុង el-Fasher ជាហេតុបង្កការភ័យខ្លាចថា មនុស្សរាប់ម៉ឺននាក់នៅក្នុងទីក្រុងនេះ អាចប្រឈមនឹងការសម្លាប់ឬធ្វើទារុណកម្មយ៉ាងសាហាវឃោរឃៅ។

យោងតាមការបញ្ជាក់ពីក្រុមជំនួយ  ទីក្រុងនេះមានប្រជាជន ៧០ ៨៩៤នាក់ ប៉ុន្តែគេឃើញមានមនុស្សមិនដល់៦ ០០០នាក់ផង ដែលអាចគេចចេញមកកាន់ជំរំនៅជិតនោះបំផុតបាន។

លោក Shashwat Saraf នាយក​ក្រុមប្រឹក្សា​ជនភៀសខ្លួន​ន័រវេសប្រចាំ​នៅ​ស៊ូដង់ ដែល​គ្រប់គ្រង​ជំរំ​នេះ មានចម្ងាយ៦៥គីឡូម៉ែត្រពីទីក្រុង el-Fasher បានប្រាប់ AP ថា៖ «ចំនួនពិតជាតិចខ្លាំងណាស់។ យើងមិនឃើញមនុស្សច្រើនដូចការរំពឹងទុកទេ។ ប្រសិនបើមនុស្សនៅតែស្ថិតក្នុងទីក្រុង el-Fasher វានឹងពិបាកខ្លាំងហើយសម្រាប់ពួកគេ»។

សូមជម្រាបជាថ្មី អំពើប្រល័យពូជសាសន៍ថ្មី​បានកើតឡើងនៅប្រទេសស៊ូដង់ ដោយមានការសម្លាប់រង្គាលឥតក្តីមេត្តា ខណៈមនុស្សរាប់ម៉ឺននាក់ ត្រូវបានប្រល័យដោយគ្មានទោសកំហុស ជាពិសេសកុមារដែលគ្នាមិនដឹងអី។

តួលេខពីអង្គការសហប្រជាជាតិ ប៉ាន់ស្មានថា មនុស្សជាង ១៥០ ០០០នាក់បានស្លាប់និង ១៤លាននាក់ផ្លាស់ទីលំនៅ។ ក្រៅពីការសម្លាប់ ក៏មានសេចក្តីរាយការណ៍ថា RSF បានចាប់រំលោភស្រ្តី ធ្វើទារុណកម្មគ្រប់ទម្រង់និងប្រព្រឹត្តអំពើឃោរឃៅជាច្រើនទៀតផងដែរ។

ពលរដ្ឋមួយចំនួនបានប្រាប់ភ្នាក់ងារសារព័ត៌មានថា ស្ថានភាពប្រៀបបាននឹងឋាននរក ពួកគេសឹងតែមិនអាចរត់គេចពីសេចក្តីស្លាប់បាន។ អ្នកខ្លះត្រូវយោធាឃុំខ្លួន ដើម្បីទារប្រាក់លោះចន្លោះពីជាង ៨ ០០០ទៅ ៥០ ០០០ដុល្លារអាមេរិក។ អ្នកខ្លះទៀតនិយាយថា ពួកគេឃើញយោធាធ្វើទារុណកម្មនិងសម្លាប់អ្នកទោស ដោយដាក់ឲ្យរថយន្តកិន។

ទន្ទឹមនោះ បើយោងតាមរបាយការណ៍របស់មូលនិធិសហប្រជាជាតិសម្រាប់ប្រជាជន (UNFPA), សោកនាដកម្មដ៏សាហាវបំផុតមួយគឺបានកើតឡើងនៅថ្ងៃទី២៩ខែតុលា ពេលដែលក្រុមអ្នកប្រយុទ្ធ RSF ចូលមន្ទីរពេទ្យសម្ភព El-Fasher សម្លាប់មនុស្ស៤៦០នាក់។ យ៉ាងណា អ្នកនៅកន្លែងកើតហេតុប្រាប់ថា តួលេខមនុស្សស្លាប់ពិតប្រាកដគឺខ្ពស់ជាងនេះឆ្ងាយណាស់៕

អត្ថបទ៖ សុខ សុវណ្ណ

ចុចអាន៖ សោកនាដកម្មនិងអំពើប្រល័យពូជសាសន៍ដ៏សាហាវឃោរឃៅបំផុត កំពុងកើតឡើងនៅ ស៊ូដង់