មុនធ្វើបាតុកម្មនៅស្ថានទូតអាមេរិក, Jatuporn Prompan ប្រកាសថា៖ «យើងកុំខ្លាចការគំរាមយកពន្ធបដិការ»

Jatuporn Prompan ដែលជាម្នាក់ក្នុងចំណោមសកម្មជនច្រើននាក់នៃចលនាជ្រុលនិយមថៃ «កម្លាំងសាមគ្គីរបស់ជាតិដើម្បីការពារអធិបតេយ្យភាព» បានប្រកាសក្តែងៗថា៖ «យើងកុំខ្លាចការគំរាមយកពន្ធបដិការ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកាសកើតឡើងមុនពេលក្រុមនេះប្រមែប្រមូលគ្នាធ្វើបាតុកម្មនៅស្ថានទូតអាមេរិកនិងម៉ាឡេស៊ី នាចុងសប្តាហ៍ ដើម្បីបង្ហាញការជំទាស់និងសម្តែងក្តីមិនពេញចិត្តរបស់ប្រទេសទាំងពីរ ដែលលូកលាន់កិច្ចការរបស់ថៃ។

ទីក្រុងវ៉ាស៊ីនតោន បានប្រកាសផ្អាកការចរចាពន្ធបដិការជាមួយថៃជាបណ្តោះអាសន្នសិន រហូតដល់ទីក្រុងបាងកក គោរពតាមកិច្ចព្រមព្រៀងសន្តិភាពជាមួយកម្ពុជា ដែលចុះហត្ថលេខានៅទីក្រុងគូឡាឡាំពួ មានប្រធានាធិបតីអាមេរិក ដូណាល់ ត្រាំ និងនាយករដ្ឋមន្ត្រីម៉ាឡេស៊ី អាន់វ៉ា អ៊ីប្រាហ៊ីម ជាសាក្សី។

យ៉ាងណា ដោយផ្គើនទៅនឹងសហរដ្ឋអាមេរិក, ចលនាជាតិនិយមថៃ បានប្រកាសធ្វើបាតុកម្មនិងថែមទាំងអាចលុកលុយស្ថានទូតអាមេរិកនិងម៉ាឡេស៊ីទៀតផង នៅថ្ងៃទី២២ខាងមុខ។

តាមការផ្សាយរបស់ Bangkok Post កាលពីថ្ងៃចន្ទទី១៧ខែវិច្ឆិកាឆ្នាំ២០២៥ លោក Jatuporn បញ្ជាក់យ៉ាងច្បាស់ថា បាតុកម្មនេះគឺដើម្បីប្រឆាំងលោកត្រាំនិងលោកអាន់វ៉ា ដែលលូកដៃក្នុងការដោះស្រាយជម្លោះព្រំដែនកម្ពុជា-ថៃ។ Jatuporn និយាយថា ចាប់តាំងពី សហរដ្ឋអាមេរិក ជ្រៀតជ្រែកក្នុងកិច្ចការរបស់ថៃមក ប្រជាជនថៃមានសិទ្ធិក្នុងការបង្ហាញកម្លាំងជាតិ ជាការឆ្លើយតបទៅនឹង ការគំរាមកំហែងពន្ធរបស់អាមេរិក។

លោកក៏សម្តែង ការមិនយល់ស្រប ជាមួយគណបក្សប្រឆាំងក្នុងសភាផងដែរ ចំពោះការណែនាំថា រដ្ឋាភិបាលមិនគួរប្រើវិធីសាស្ត្រខ្លាំងក្លាតបទៅអាមេរិកវិញទេ ព្រោះវាអាចបង្កឲ្យមានប្រតិកម្មសេដ្ឋកិច្ចអវិជ្ជមាន។ លោកនិយាយថា៖ «យើងមិនត្រូវខ្លាចការគំរាមកំហែងពន្ធទេ ពីព្រោះការការពារទឹកដីរបស់យើងគឺជាបញ្ហាសំខាន់បំផុត។ យើងក៏ត្រូវតែប្រយុទ្ធប្រឆាំងនឹងក្រុម Scammer ដូចគ្នា។ យើងមិនអាចអនុញ្ញាតឲ្យប្រទេសថៃក្លាយជាគោលដៅងាយស្រួលរបស់នរណាម្នាក់ និងត្រូវគេគំរាមកំហែង ឬរុញច្រានបានឡើយ»។

សូមជម្រាបជាថ្មី បុគ្គលចេញមុខចេញមាត់ខ្លាំងជាងគេនៃក្រុមជ្រុលនិយមនេះ មានដូចជា Chatuporn Prompan, Nitithorn Lamluea, Phichit Chaiyamongkol, Somchai Saengkan និង Jessada Tonawanik៕

អត្ថបទ៖ សុខ សុវណ្ណ

ចុចអាន៖ មុនធ្វើបាតុកម្មនៅស្ថានទូតអាមេរិក, Jatuporn Prompan ប្រកាសថា៖ «យើងកុំខ្លាចការគំរាមយកពន្ធបដិការ»