រថយន្តក្រុងបុករថយន្តដឹកប្រេងនៅអារ៉ាប៊ីសា​អូឌីត​ សម្លាប់អ្នកធ្វើធម្មយាត្រាឥណ្ឌា ៤៥ នាក់

រថយន្តក្រុងមួយគ្រឿងដែលដឹកអ្នកធ្វើធម្មយាត្រាឥណ្ឌាបានជួបគ្រោះថ្នាក់ចរាចរណ៍នៅជិតទីក្រុងMedinaក្នុងប្រទេសអារ៉ាប៊ីសាអូឌីត ដោយបានសម្លាប់មនុស្សយ៉ាងហោចណាស់ ៤៥ នាក់។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១៨ខែវិច្ឆិកា។

ហេតុការណ៍ដ៏រន្ធត់នេះកើតឡើងរវាងរថយន្តក្រុងបានបុកជាមួយរថយន្តដឹកប្រេងខណៈពេលកំពុងធ្វើដំណើរពីទីក្រុងពិសិដ្ឋ Mecca ទៅ Medina។ មានតែអ្នកដំណើរម្នាក់ប៉ុណ្ណោះដែលនៅរស់រានមានជីវិតពីគ្រោះថ្នាក់ ដែលធ្វើឱ្យវាក្លាយជាគ្រោះថ្នាក់ចរាចរណ៍ដ៏សាហាវបំផុតមួយនៅក្នុងប្រទេសអារ៉ាប៊ីសាអូឌីតក្នុងរយៈពេលប៉ុន្មានឆ្នាំចុងក្រោយនេះ។

បើតាមស្នងការប៉ូលិសឥណ្ឌាម្នាក់ ជនរងគ្រោះភាគច្រើនមកពីទីក្រុង Hyderabad រដ្ឋ Telangana ប្រទេសឥណ្ឌា ។នាយករដ្ឋមន្ត្រីឥណ្ឌា លោក Narendra Modi បានសម្តែងការចូលរួមរំលែកទុក្ខ និងបាននិយាយថា ស្ថានទូត និងស្ថានកុងស៊ុលឥណ្ឌាកំពុងសម្របសម្រួលជាមួយមន្ត្រីអារ៉ាប៊ីសាអូឌីត ដើម្បីជួយគ្រួសារដែលរងផលប៉ះពាល់។

គួរបញ្ជាក់ថាអារ៉ាប៊ីសាអូឌីតតែងតែមានគ្រោះថ្នាក់ចរាចរណ៍ធ្ងន់ធ្ងរ ជាពិសេសពាក់ព័ន្ធនឹងរថយន្តក្រុងដែលដឹកជញ្ជូនអ្នកធ្វើធម្មយាត្រារាប់លាននាក់ជារៀងរាល់ឆ្នាំក្នុងពិធីបុណ្យhajj និង umrah។

សោកនាដកម្មនេះកើតឡើងចំពេលមានទំនាក់ទំនងជិតស្និទ្ធយូរអង្វែងរវាងឥណ្ឌា និងអារ៉ាប៊ីសាអូឌីត ដែលជាជម្រករបស់កម្មករឥណ្ឌាជាងពីរលាននាក់ និងជាអ្នកផ្គត់ផ្គង់ប្រេងដ៏សំខាន់ដល់ប្រទេសឥណ្ឌា៕

អត្ថបទ៖ ប៊ុន សុភាព