ព័ត៌មានអន្ដរជាតិ

Macron ជំរុញមេដឹកនាំចិនគាំទ្របទឈប់បាញ់អ៊ុយក្រែន និងដោះស្រាយអតុល្យភាពពាណិជ្ជកម្ម

បានផុស

៥ ខែ មុន

នៅ

ថ្ងៃព្រហស្បតិ៍ ៤ ធ្នូ ២០២៥

ដោយ

Chheang

ប្រធានាធិបតីបារាំង លោក Emmanuel Macron នាថ្ងៃព្រហស្បតិ៍ទី៤ខែធ្នូឆ្នាំ២០២៥នេះ បានជំរុញប្រធានាធិបតីចិន លោក ស៊ី ជីនពីង ឲ្យគាំទ្រកិច្ចខិតខំប្រឹងប្រែងដើម្បីបញ្ចប់សង្រ្គាមនៅអ៊ុយក្រែន និងជួយកាត់បន្ថយឱនភាពពាណិជ្ជកម្មដែលកំពុងរីកធំឡើងរបស់អឺរ៉ុបជាមួយទីក្រុងប៉េកាំង ខណៈមេដឹកនាំទាំងពីរជួបគ្នានៅសាលមហាបុរសនៃទីក្រុងប៉េកាំង។

យោងតាម RFI លោក Macron ដែលបំពេញទស្សនកិច្ចផ្លូវការរយៈពេលបីថ្ងៃ និងជាដំណើរទស្សនកិច្ចលើកទីបួនរបស់លោកទៅកាន់ប្រទេសចិនចាប់តាំងពីចូលកាន់តំណែង បានលើកឡើងថា កិច្ចសហប្រតិបត្តិការរវាងទីក្រុងប៉ារីស និងទីក្រុងប៉េកាំងនឹង«មិនរួញរា» ក្នុងការជំរុញកិច្ចចរចាបទឈប់បាញ់ក្នុងជម្លោះដ៏សាហាវបំផុតរបស់អឺរ៉ុប ចាប់តាំងពីសង្គ្រាមលោកលើកទីពីរមក។ ប្រទេសបារាំងកំពុងលើកកម្ពស់ជម្រើសមួយជំនួសឲ្យក្របខ័ណ្ឌសន្តិភាពដែលគាំទ្រដោយសហរដ្ឋអាមេរិក ដែលទីក្រុងកៀវ និងរដ្ឋធានីអឺរ៉ុបភ័យខ្លាចថានឹងលម្អៀងផ្ដល់ផលប្រយោជន៍ច្រើនពេកទៅឲ្យទីក្រុងមូស្គូ។

លោក Macron បាននិយាយថា «យើងត្រូវតែបន្តធ្វើការឆ្ពោះទៅរកសន្តិភាព និងស្ថិរភាពក្នុងពិភពលោក និងនៅអ៊ុយក្រែន» ដោយហៅសង្រ្គាមនេះថាជាការគំរាមកំហែងដោយផ្ទាល់ដល់សន្តិសុខអឺរ៉ុប និងសណ្តាប់ធ្នាប់អន្តរជាតិផ្អែកលើច្បាប់។

លោកស៊ី បាននិយាយឡើងវិញនូវការគាំទ្រទូទៅរបស់ចិនសម្រាប់បទឈប់បាញ់ដែលបានចរចា ដោយបញ្ជាក់ថា ទីក្រុងប៉េកាំង«សង្ឃឹមថា ភាគីទាំងអស់នឹងឈានដល់កិច្ចព្រមព្រៀងសន្តិភាពដែលយុត្តិធម៌ ស្ថិតស្ថេរ និងរឹងមាំតាមរយៈកិច្ចសន្ទនា»។

ដំណើរទស្សនកិច្ចនេះ កើតឡើងបន្ទាប់ពីប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បានជួបលោក Macron នៅទីក្រុងប៉ារីស ដោយជំរុញឲ្យមេដឹកនាំអឺរ៉ុបរក្សាជំហរនៅពីក្រោយទីក្រុងកៀវ ខណៈទីក្រុងវ៉ាស៊ីនតោនកំពុងជំរុញសំណើផ្ទាល់ខ្លួនដើម្បីបញ្ចប់ជម្លោះ។ រដ្ឋាភិបាលលោកខាងលិចចោទប្រកាន់ប្រទេសចិនថាបានផ្គត់ផ្គង់សមាសធាតុប្រើប្រាស់ដែលជួយពង្រឹងឧស្សាហកម្មការពារជាតិរបស់រុស្ស៊ី ដែលជាបញ្ហាដែលលោក Macron បានអះអាងថា លោកគ្រោងនឹងលើកឡើងដោយផ្ទាល់ជាមួយលោកស៊ី។

ភាពតានតឹងផ្នែកសេដ្ឋកិច្ចក៏បានគ្របដណ្តប់លើកិច្ចចរចាផងដែរ។ ឱនភាពពាណិជ្ជកម្មរបស់បារាំងជាមួយប្រទេសចិនបានកើនឡើងដល់៤៦ពាន់លានអឺរ៉ូ ក្នុងឆ្នាំ២០២៤ ហើយឱនភាពសរុបរបស់ EU ឥឡូវនេះលើសពី៣០០ពាន់លានអឺរ៉ូ៕

ប្រែសម្រួល៖ ឈាង