កូនប្រុសលោកស្រី ស៊ូជី ស្រែកតវ៉ាជាថ្មី ឲ្យដោះលែងម្ដាយ ខណៈ មីយ៉ាន់ម៉ា កៀកថ្ងៃបោះឆ្នោត

កូនប្រុសពៅរបស់មេដឹកនាំគាំទ្រលទ្ធិប្រជាធិបតេយ្យមីយ៉ាន់ម៉ា លោកស្រី អ៊ុង សានស៊ូជី កាលពីថ្ងៃទី១៤ធ្នូ បានចូលរួមក្នុងការតវ៉ាធ្វើឡើងក្នុងទីក្រុងតូក្យូប្រឆាំងនឹងរបបយោធា ដែលគ្រប់គ្រងប្រទេសចាប់តាំងពីរដ្ឋប្រហារនៅឆ្នាំ ២០២១ ដោយទាមទារឲ្យដោះលែងម្ដាយជាបន្ទាន់ ខណៈមីយ៉ាន់ម៉ាកាន់តែកៀកថ្ងៃបោះឆ្នោត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចេញផ្សាយពីសារព័ត៌មាន NHK ប្រជាជនមីយ៉ាន់ម៉ាដែលរស់នៅក្នុងប្រទេសជប៉ុន និងពលរដ្ធផ្សេងទៀតបានធ្វើបាតុកម្មនៅមុខស្ថានទូតមីយ៉ាន់ម៉ា ស្ថិតក្នុងសង្កាត់ Shinagawa ទីក្រុងតូក្យូ កាលពីថ្ងៃអាទិត្យ។

ថ្លែងទៅកាន់ក្រុមអ្នកតវ៉ា លោក Kim Aris បាននិយាយថា សេរីភាពសម្រាប់ម្តាយរបស់គាត់នាំទៅរកសេរីភាពសម្រាប់ទាំងអស់គ្នា ហើយថា «សកម្មភាពរបស់អ្នកគ្រប់គ្នា ពិតជាអាចជួយសង្គ្រោះជីវិតម្ដាយគាត់បាន»។

ក្រុមអ្នកតវ៉ាបានតវ៉ាប្រឆាំងនឹងការបោះឆ្នោតទូទៅដែលយោធាមីយ៉ាន់ម៉ា មានគ្រោងធ្វើឡើងចាប់ពីថ្ងៃទី ២៨ ខែធ្នូ ក៏ជាផ្នែកមួយនៃការផ្លាស់ប្តូរទៅជាការគ្រប់គ្រងរបស់ស៊ីវិល។ ពួកគេនិយាយថា ការបោះឆ្នោតនេះគ្រាន់តែជាការបន្លំភ្នែកប៉ុណ្ណោះ ព្រោះប្រជាជនគាំទ្រលទ្ធិប្រជាធិបតេយ្យត្រូវបានហាមឃាត់មិនឲ្យឈរឈ្មោះសូម្បីតែម្នាក់។

ដោយឡែក នៅក្នុងបទសម្ភាសន៍ជាមួយ NHK មុនពេលការតវ៉ា លោក Aris បាននិយាយថា គាត់មិនបានទាក់ទងជាមួយម្តាយទេ ចាប់តាំងពីទទួលបានលិខិតមួយច្បាប់កាលពីខែមករា ឆ្នាំមុន។ កាលណោះ លោកស្រីស៊ូជីបានរៀបរាប់ទុកលំបាកមួយនៅក្នុងលិខិតដែលសរសេរដោយដៃថា «បន្ទប់ឃុំឃាំងត្រជាក់ខ្លាំងក្នុងរដូវរងា និងក្តៅខ្លាំងនៅរដូវក្តៅ»។

លោក Aris បាននិយាយថា ឥឡូវនេះម្ដាយកាន់តែមានអាយុជ្រេ ដោយរូបគាត់ឈានចូលវ័យ ៨០ ឆ្នាំហើយ ជាពិសេសដោយសារមានបញ្ហាបេះដូង គាត់មានការព្រួយបារម្ភយ៉ាងខ្លាំងអំពីថា តើម្ដាយបានទទួលការព្យាបាលចាំបាច់ឬអត់?

ជាងនេះទៅទៀតនោះ កូនប្រុសមេដឹកនាំគាំទ្រលទ្ធិប្រជាធិបតេយ្យមីយ៉ាន់ម៉ារូបនេះ នៅតែបង្ហាញពីការប្តេជ្ញាចិត្តផ្ទាល់ខ្លួនក្នុងការបន្តកិច្ចខិតខំប្រឹងប្រែងដើម្បីស្វែងរកការដោះលែងម្តាយឲ្យបានឆាប់តាមដែលអាចធ្វើទៅបាន។ លោក Aris បាននិយាយថា គាត់ចាត់ទុកថា វាជាកាតព្វកិច្ចក្នុងនាមជាកូនប្រុស យ៉ាងហោចណាស់ត្រូវឲ្យម្ដាយអាចវិលត្រឡប់ទៅផ្ទះវិញ ឬឃុំខ្លួនក្នុងផ្ទះ ហើយត្រូវបានផ្តល់សិទ្ធិជាមូលដ្ឋានរបស់មនុស្សក្នុងការទំនាក់ទំនងជាមួយក្រុមគ្រួសាររបស់គាត់ និងទទួលបានការព្យាបាលចាំបាច់ណាមួយ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

កូនប្រុសលោកស្រី អ៊ុងសាន ស៊ូជី អំពាវនាវ​ឲ្យ​ដោះលែង​ម្ដាយ​ជា​បន្ទាន់ក្នុង​សន្និសីទនៅសាធារណរដ្ឋឆែក