បាក់ភ្នំសំរាមនៅហ្វីលីពីន មនុស្សស្លាប់កើនដល់ ៣៥នាក់

ចំនួនមនុស្សស្លាប់ក្នុងហេតុការណ៍បាក់ភ្នំសំរាមនៅប្រទេសហ្វីលីពីន បានកើនដល់៣៥នាក់ហើយ បន្ទាប់ពីសាកសពត្រូវបានរកឃើញជាបន្តបន្ទាប់។

តាមការផ្សាយរបស់ The Star នៅថ្ងៃអាទិត្យទី១៨ខែមករាឆ្នាំ២០២៦, មនុស្សស្លាប់ទាំង៣៥នាក់ ភាគច្រើនជាកម្មករដែលធ្វើការនៅទីលានចាក់សំរាម មានទីតាំងស្ថិតក្នុងទីក្រុង Cebu។

យ៉ាងណា ការិយាល័យបង្ការគ្រោះអគ្គិភ័យទីក្រុង Cebu បានឲ្យដឹងថា មនុស្សចំនួន១៨នាក់ ត្រូវបានជួយសង្គ្រោះក្នុងហេតុការណ៍នេះ ប៉ុន្តែនៅមានបុគ្គលិកម្នាក់ទៀតកំពុងបាត់ខ្លួន ប៉ុន្តែគេមិនទាន់សន្មត់អំពីជោគវាសនានៅឡើយទេ។

សូមជម្រាបជាថ្មី សោកនាដកម្មនេះ កើតឡើងកាលពីថ្ងៃព្រហស្បតិ៍សប្តាហ៍មុន នៅទីលានចាក់សំរាម Binaliw ពេលដែលភ្នំសំរាម​កម្ពស់ប្រហែលអគារ​២០ជាន់ បានបាក់សង្កត់លើកម្មករជាង​១០០នាក់ដែលកំពុងបំពេញការងារ។

មុននេះ អភិបាលក្រុង Cebu លោក Nestor Archival បានប្រកាសថា ក្រុមស្វែងរកបានរកឃើញ «សញ្ញានៃជីវិត» ដែលជំរុញ​​ឲ្យ​មានការបន្តសកម្មភាពសង្គ្រោះជាបន្ទាន់ ដើម្បីស្វែងរកមនុស្សបន្ថែមទៀត ប៉ុន្តែឥឡូវក្តីសង្ឃឹមបានរលាយអស់ទៅហើយ។

តាមរបាយការណ៍បឋមពីការិយាល័យរ៉ែ និងភូគព្ភសាស្ត្របានសន្មតថា មូលហេតុបាក់ភ្នំសំរាមនេះ គឺបណ្តាលមកពីការធ្លាក់ភ្លៀងជាប់ៗគ្នារយៈពេលប៉ុន្មានសប្តាហ៍ចុងក្រោយ ដែលធ្វើ​ឲ្យសំរាមជោកជាំដោយទឹក និងមានទម្ងន់ធ្ងន់ខ្លាំងរហូតដល់បាក់។

ក្រសួងបរិស្ថាន និងធនធានធម្មជាតិ (DENR) បានចេញបញ្ជា​ឲ្យ​ផ្អាកសកម្មភាពជាបន្ទាន់ចំពោះក្រុមហ៊ុន Prime Integrated Waste Solutions, Inc. (PWS) ដែលជាអ្នកគ្រប់គ្រងទីលានចាក់សំរាមនេះ និងតម្រូវ​ឲ្យក្រុមហ៊ុនដាក់ស្នើផែនការកែលម្អក្នុងរយៈពេល​៩០ថ្ងៃ៕

អត្ថបទ៖ សុខ សុវណ្ណ