ព័ត៌មានអន្ដរជាតិ

Breaking News៖ ប្រធានាធិបតីឆាដ Déby ស្លាប់ក្នុងសមរភូមិប្រយុទ្ធជាមួយក្រុមឧទ្ទាម

បានផុស

៥ years មុន

នៅ

ថ្ងៃអង្គារ ២០ មេសា ២០២១

ដោយ

សេចក្តីថ្លែងការណ៍មួយពីយោធាបាននិយាយថា ប្រធានាធិបតីប្រទេសឆាដលោក Idriss Déby អាយុ៦៨ឆ្នាំដែលកាន់អំណាច៣០ឆ្នាំត្រូវបានសម្លាប់នៅសមរភូមិប្រយុទ្ធ បន្ទាប់ពីលោកបានរបួសពីការប្រយុទ្ធជាមួយពួកឧទ្ទាម។

លោក Déby កាលពីសប្តាហ៍មុនទើបតែបានឈ្នះការបោះឆ្នោតជ្រើសរើសប្រធានាធិបតីអាណត្តិទី៦។ ការបោះឆ្នោតនោះបានជំរុញឲ្យមានការឈ្លានពានដោយក្រុមឧទ្ទាមដែលមានមូលដ្ឋាននៅលីប៊ីឈ្មោះ «កម្លាំងដើម្បីការផ្លាស់ប្តូរនិងសាមគ្គី»នៅឆាដ ដែលមន្ត្រីយោធាបាននិយាយថា ត្រូវបានបណ្តេញចេញកាលពីចុងសប្តាហ៍កន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីបាននិយាយថា អ្នកនយោបាយជើងចាស់មិនទាន់បានថ្លែងសុន្ទរកថាពីជ័យជម្នះរបស់ខ្លួនឡើយ។ បន្ទាប់ពីបោះឆ្នោតរួច លោកក៏បានធ្វើដំណើរទៅកាន់ខ្សែត្រៀមជួរមុខដើម្បីបញ្ជាប្រតិបត្តិការយោធា។

អតីតឧទ្ទាម និងជាទីប្រឹកប្រធានាធិបតីលោក Abderrahman Koulamallah បានប្រាប់បណ្តាញវិទ្យុបារាំង RFI ថា ៖«លោកបានស្លាប់ នៅពេលលោកមានរស់នៅជាបុរសមានសេរីភាពដែលមានអាវុធនៅលើដៃ»។

របាយការណ៍ពីរដ្ឋធានី N’Djamena បាននិយាយថា បន្ទាប់ពីការស្លាប់របស់លោក Déby រដ្ឋសភាត្រូវបានរំលាយ ហើយរដ្ឋាភិបាលត្រូវបានជំនួសដោយក្រុមប្រឹក្សាយោធាអន្តរកាលដែលដឹកនាំដោយកូនប្រុសរបស់លោក Déby អាយុ៣៧ឆ្នាំគឺលោក Mahamat Idriss Déby Itno ដែលជាអគ្គមេបញ្ជាការយោធា។

សេចក្តីថ្លែងការណ៍មួយដែលផ្សាយតាមទូរទស្សន៍ជាតិ អ្នកនាំពាក្យលោក Azem Bermendao Agouna បានចេញការអំពាវនាវមួយឲ្យមានកិច្ចពិភាក្សា និងសន្តិភាព ដល់ប្រជាជនឆាដទាំងអស់ទាំងក្នុង និងក្រៅប្រទេសឲ្យបន្តរួមគ្នាកសាងប្រទេសឆាដ។

លោកបាននិយាយទាំងមានមន្ត្រីជុំវិញខ្លួនថា ៖«ក្រុមប្រឹក្សាជាតិនៃការផ្លាស់ប្តូរត្រូវធានាប្រជាជនឆាដថា ត្រូវតែប្រើគ្រប់វិធានការដើម្បីធានាបាននូវសន្តិភាព សន្តិសុខ និងសណ្តាប់ធ្នាប់សាធារណៈ»។

លោកប្រធានាធិបតី Déby បានគ្រប់គ្រងប្រទេសឆាដស្ថិតក្នុងការបះបោរដោយអាវុធតាំងពីឆ្នាំ១៩៩១។ លោកជាមេដឹកនាំកាន់អំណាចបានយូរបំផុតម្នាក់នៅអាហ្វ្រិក និងជាសម្ព័ន្ធភាពជិតស្និទ្ធនៃមហាអំណាចលោកខាងលិចដែលប្រយុទ្ធជាមួយសកម្មជនអ៊ិស្លាមនៅភាគខាងលិច និងអាហ្វ្រិកកណ្តាល៕

ប្រែសម្រួល៖ វីរបុត្រ
ប្រភព៖ theguardian

Related Topics:ទ្វីបអាហ្រ្វិក