​អាមេរិកបង្កើនសម្ពាធលើគុយបា ក្រោយការដួលរលំនៃរបបដឹកនាំវ៉េណេស៊ុយអេឡា

បន្ទាប់ពីប្រតិបត្តិការចាប់ខ្លួនលោក នីកូឡាស ម៉ាឌូរ៉ូ ដោយកងកម្លាំងអាមេរិកកាលពីដើមខែមករាឆ្នាំ​២០២៦ រដ្ឋបាលលោកដូណាល់ ត្រាំ បានបង្វែរគោលដៅយុទ្ធសាស្ត្រ «សម្ពាធអតិបរមា» ទៅ​លើ​គុយបាវិញម្តង។ ជោគជ័យនៅវ៉េណេស៊ុយអ៊ែឡា បានក្លាយជាគំរូថ្មីមួយដែលបង្ហាញថា សហរដ្ឋអាមេរិកអាចផ្លាស់ប្តូររបបអរិភាពបានយ៉ាងឆាប់រហ័ស។

បច្ចុប្បន្ន គុយបាកំពុងស្ថិតក្នុងវិបត្តិថាមពល និងសេដ្ឋកិច្ចយ៉ាងធ្ងន់ធ្ងរ ក្រោយពេលអាមេរិកគ្រប់គ្រងការនាំចេញប្រេងពីវ៉េណេស៊ុយអេឡា ដែលជាខ្សែជីវិតតែមួយគត់របស់ខ្លួន។ ខណៈដែលទីក្រុងហាវ៉ាណាកំពុងធ្លាក់ក្នុងភាពងងឹតដោយសារការដាច់ចរន្តអគ្គិសនី រលកនៃការតវ៉ា​បានរីករាលដាលពាសពេញទីក្រុង ដែលជាសញ្ញានៃអស្ថិរភាពផ្ទៃក្នុង។

ខណៈដែលសម្ពាធលើទីក្រុងហាវ៉ាណាកាន់តែខ្លាំងឡើង អ្នកវិភាគភូមិសាស្ត្រនយោបាយ​មួយ​ចំនួន​បានលើកឡើងនូវមូលហេតុគន្លឹះចំនួន៣ ដែលធ្វើ​ឲ្យ​រដ្ឋបាល​អាមេរិកចង់ផ្លាស់ប្តូររបបនៅគុយបា ឲ្យដូចទៅនឹងអ្វីដែលបានកើតឡើងនៅវ៉េណេស៊ុយអេឡា៖

១. ការលុបបំបាត់ឥទ្ធិពលបរទេស (រុស្ស៊ី និងចិន)៖ សម្រាប់វ៉ាស៊ីនតោន គុយបាមិនមែនគ្រាន់តែជាកោះតូចមួយនោះទេ ប៉ុន្តែវាគឺជា «ច្រកទ្វារ» យុទ្ធសាស្ត្រដែលរុស្ស៊ី និងចិនប្រើប្រាស់ដើម្បីឈរជើងក្បែរព្រំដែនអាមេរិក។ ការផ្លាស់ប្តូររបបនៅទីនោះ គឺជាគោលដៅចម្បង ដើម្បីបណ្តេញមូលដ្ឋានស៊ើបការណ៍ និងឥទ្ធិពលយោធារបស់មហាអំណាចគូប្រជែង ចេញពីតំបន់អឌ្ឍគោលខាងលិច។

២. ការកាត់ផ្តាច់សម្ព័ន្ធភាពឆ្វេងនិយមក្នុងតំបន់៖ គុយបាត្រូវបានគេមើលឃើញថាជា «ខួរក្បាល» នៃមនោគមវិជ្ជាកុម្មុយនិស្ត និងឆ្វេងនិយមនៅអាមេរិកឡាទីន។ អាមេរិកជឿជាក់ថា បើរបបនៅគុយបាដួលរលំ នោះបណ្តាញគាំទ្ររបបផ្តាច់ការដទៃទៀត (ដូចជាវ៉េណេស៊ុយអេឡា និងនីការ៉ាហ្គា) នឹងត្រូវចុះខ្សោយទាំងស្រុង ដែលផ្តល់ឱកា​ស​ឲ្យអាមេរិកពង្រីកឥទ្ធិពលសេរីនិយម និងសេដ្ឋកិច្ចទីផ្សារសេរីឡើងវិញ។

៣. សម្ពាធនយោបាយក្នុងស្រុក និងសន្តិសុខព្រំដែន៖ វិបត្តិសេដ្ឋកិច្ចដែលបង្កឡើងដោយរបបបច្ចុប្បន្ន បានធ្វើ​ឲ្យជនភៀសខ្លួនគុយបារាប់ម៉ឺននាក់សម្រុកទៅកាន់សហរដ្ឋអាមេរិក ដែលបង្កជាបញ្ហានយោបាយក្នុងស្រុកដ៏ក្តៅគគុក។ សម្រាប់រដ្ឋបាលលោក ត្រាំ ការប្តូររបបគឺជាវិធីតែមួយគត់ដើម្បីដោះស្រាយបញ្ហាចំណាកស្រុកខុសច្បាប់ដែល​ចាក់ឫស និងដើម្បីបំពេញបំណងម្ចាស់ឆ្នោតដើមកំណើតគុយបាដ៏មានឥទ្ធិពលនៅរដ្ឋផ្លរីដា។

សរុបរួមមក ការចង់ប្តូររបបនៅគុយបា មិនមែនគ្រាន់តែជារឿងមនោគមវិជ្ជានោះទេ ប៉ុន្តែវាគឺជាយុទ្ធសាស្ត្រ «បោសសម្អាត» ឥទ្ធិពលសត្រូវចេញពីមាត់ទ្វារផ្ទះរបស់អាមេរិក ដើម្បីធានាសន្តិសុខជាតិ និងស្ថិរភាពសេដ្ឋកិច្ចយូរអង្វែង៕

ដោយ៖ ឈាង