អ៊ីស្រាអែលបើក «ប្រតិបត្តិការខ្នាតធំ» ដើម្បីស្វែងរកចំណាប់ខ្មាំងចុងក្រោយនៅ​ហ្គាហ្សា

យោធាអ៊ីស្រាអែល បានចាប់ផ្តើមប្រតិបត្តិការដ៏ធំមួយនៅភាគខាងជើងហ្គាហ្សា ដើម្បីស្វែងរកសាកសពរបស់លោក Ran Gvili ដែលជាចំណាប់ខ្មាំងចុងក្រោយបង្អស់ដែលនៅសេសសល់ក្នុងតំបន់នោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោង​តាម​ France24 ការស្វែងរកនេះកំពុងផ្ដោតលើទីបញ្ចុះសពមួយ​កន្លែង​ក្នុងតំបន់ Shujaiyya-Daraj Tuffah ដោយមានការចូលរួមពីក្រុមអ្នកជំនាញកោសល្យវិច័យ និងបុគ្គលិកជំនាញដើម្បីកំណត់អត្តសញ្ញាណសាកសព។ ការរកឃើញសាកសពលោក Gvili ដែលជាមន្ត្រីប៉ូលិសវ័យ២៤ឆ្នាំ ដែលត្រូវបានសម្លាប់ក្នុងអំឡុងការវាយប្រហារថ្ងៃទី៧ខែតុលាឆ្នាំ២០២៣ គឺជាលក្ខខណ្ឌចុងក្រោយសម្រាប់អ៊ីស្រាអែលក្នុងការឈានទៅរកដំណាក់កាលទីពីរនៃបទឈប់បាញ់ដែលសម្របសម្រួលដោយសហរដ្ឋអាមេរិក។

ដំណាក់កាលបន្ទាប់ រួមមានការ​បើកឡើងវិញ​នៃច្រកព្រំដែន Rafah ដ៏សំខាន់ជាមួយប្រទេសអេហ្ស៊ីប សម្រាប់ការឆ្លងកាត់ថ្មើរជើង ដែលជាវិធានការជំរុញដោយរដ្ឋបាលលោក ដូណាល់ ត្រាំ និងអ្នកសម្របសម្រួលអន្តរជាតិ ដើម្បីសម្រួលដល់ការផ្ដល់ជំនួយ និងស្ថិរភាពនៅហ្គាហ្សា ក្រោមការគ្រប់គ្រងរបស់រដ្ឋបាលបច្ចេកទេសថ្មី។

ខណៈដែលរដ្ឋបាលលោកត្រាំ បានផ្តល់សញ្ញាថា ដំណាក់កាលទីពីរនៃបទឈប់បាញ់កំពុងដំណើរការ គណៈរដ្ឋមន្ត្រីរបស់នាយករដ្ឋមន្ត្រី Benjamin Netanyahu នៅតែស្ថិតក្រោមសម្ពាធក្នុងស្រុកពីគ្រួសារលោក Gvili មិន​ឲ្យ​មានការយោគយល់ណាមួយឡើយ រហូតទាល់តែសាកសពរបស់លោកត្រូវបានបញ្ជូនមកវិញ។ ទន្ទឹមនឹងនេះ ភាពតានតឹងនៅក្រុងយេរូសាឡឹមខាងកើតបានផ្ទុះឡើងកាលពីយប់ថ្ងៃអាទិត្យ នៅពេលដែលទីស្នាក់ការកណ្តាលរបស់ទីភ្នាក់ងារ UNRWA ត្រូវបានគេដុតបំផ្លាញ។ គ្រោះអគ្គិភ័យនេះ បានកើតឡើងបន្ទាប់ពីមានការវាយកម្ទេចអគារក្នុងបរិវេណនោះដោយអាជ្ញាធរអ៊ីស្រាអែលនាពេលថ្មីៗនេះ ហើយត្រូវបានមន្ត្រីអង្គការសហប្រជាជាតិថ្កោលទោសថាជាការវាយប្រហារដោយផ្ទាល់លើស្ថានភាពជនភៀសខ្លួនប៉ាឡេស្ទីន។

អ៊ីស្រាអែលបានព្យាយាមរំលាយទីភ្នាក់ងារនេះជាយូរមកហើយ ដោយចោទប្រកាន់ថាមានការជ្រៀតចូលពីក្រុមហាម៉ាស ខណៈដែល UNRWA នៅតែបន្តបម្រើជនភៀសខ្លួនរាប់លាននាក់នៅក្នុងតំបន់ ទោះបីជាមានការកាត់ផ្ដាច់ទំនាក់ទំនងពីរដ្ឋាភិបាលអ៊ីស្រាអែលក៏ដោយ៕

ប្រែសម្រួល៖ ឈាង