ព័ត៌មានអន្ដរជាតិ

ណាតូនឹងចាប់ផ្តើមបេសកកម្មនៅតំបន់អាក់ទិក ដោយមានបំពាក់សព្វាវុធផង

បានផុស

៣ ខែ មុន

នៅ

ថ្ងៃអង្គារ ១០ កុម្ភៈ ២០២៦

ដោយ

អង្គការ NATO នឹងចាប់ផ្តើមបេសកកម្មមួយនៅប៉ុន្មានថ្ងៃខាងមុខនេះ ដែលអាចបង្កើនការឃ្លាំមើល និងមានសព្វាវុធក្នុងដៃយោធាផងនោះ នៅតំបន់អាកទិក បន្ទាប់ពីមានភាពតានតឹងរវាងប្រធានាធិបតីសហរដ្ឋអាមេរិក លោក ដូណាល់ ត្រាំ និងសម្ព័ន្ធមិត្តអឺរ៉ុបជុំវិញកោះ Greenland ។ នេះបើតាម ប្រភពចំនួន ៥ ដែលរ៉យទ័របានស្រង់សម្តី។

សេចក្តីរាយការណ៍នោះ បានលើកឡើងថា យោងតាមអ្នកការទូតអ៊ឺរ៉ុបបីនាក់ មន្ត្រីយោធា និងអ្នកដែលដឹងពីបញ្ហានេះ ឱ្យដឹងថា ការចាប់ផ្តើមបេសកកម្ម ដែលត្រូវបានប្រសិទ្ធនាមថា «Arctic Sentry» អាចកើតឡើងនៅដើមសប្តាហ៍នេះ។ នេះបើតាមរដ្ឋមន្ត្រីការពារជាតិរបស់សម្ព័ន្ធមិត្តជួបប្រជុំគ្នានៅទីក្រុងព្រុចសែល ប្រទេសបែលហ្ស៊ិក។

អ្នកការទូតបាននិយាយថា បេសកកម្មនៅតំបន់អាក់ទិក អាចពាក់ព័ន្ធនឹងសមយុទ្ធយោធា បង្កើនការឃ្លាំមើល បន្ថែមនាវា និងសព្វាវុធក្នុងដែនអាកាសនៅក្នុងតំបន់ រួមទាំងយន្តហោះគ្មានមនុស្សបើក(Drone) ផងដែរ។

យ៉ាងណា ក្រុមមន្ត្រីបាននិយាយថា បេសកកម្មនេះទំនងជាផ្តោតលើការប្រើប្រាស់ធនធានរបស់អង្គការណាតូ នៅក្នុងតំបន់ឱ្យកាន់តែមានប្រសិទ្ធភាព ជាជាងការបន្ថែមកងកម្លាំងថ្មីដ៏ច្រើនសន្ធឹកសន្ធាប់។

មន្ត្រីអង្គការណាតូបានប្រាប់រ៉យទ័រតាមអ៊ីមែលថា៖ «បេសកកម្មនេះគឺជាផ្នែកមួយនៃកិច្ចខិតខំប្រឹងប្រែងរបស់សម្ព័ន្ធមិត្ត ដើម្បីបង្កើនការរារាំង និងការការពាររបស់យើងនៅក្នុងតំបន់ ជាពិសេសនៅក្នុងពន្លឺ ដែលអាចមើលសកម្មភាពយោធារបស់រុស្ស៊ី និងការឃ្លាំមើលកាន់តែខ្លាំងឡើងពីចិន នៅតំបន់ភាគខាងជើង»។

មន្ត្រីរូបនេះបាននិយាយថា បេសកកម្មនេះ រំពឹងថានឹងដំណើរការក្នុងពេលឆាប់ៗនេះ។

មិនតែប៉ុណ្ណោះ អង្គការណាតូបានលើកឡើងកាលពីសប្តាហ៍មុនថា ខ្លួនបានចាប់ផ្តើមរៀបចំផែនការសម្រាប់បេសកកម្មនេះ បន្ទាប់ពីកិច្ចពិភាក្សានៅទីក្រុង Davos រវាងលោក ដូណាល់ ត្រាំ និងប្រធានអង្គការណាតូ លោក Mark Rutte ។

ការពិភាក្សារវាងអ្នកទាំងពីរបានបន្ធូរបន្ថយភាពតានតឹងច្រើនជុំវិញមហិច្ឆតារបស់ លោក ត្រាំ ក្នុងការទទួលបានថាកោះ Greenland ជាដែនដីស្វយ័តរបស់ប្រទេសដាណឺម៉ាក។

ក្រុមមន្ត្រីបន្តទៀតថា មិនទាន់មានការសម្រេចចិត្តចុងក្រោយណាមួយត្រូវធ្វើឡើងទេ ហើយការរៀបចំកម្លាំងយោធានៅតែធ្វើ ជាជម្រើសរបស់ណាតូ។

យ៉ាងណា មេបញ្ជាការសម្ព័ន្ធមិត្តកំពូលរបស់អង្គការណាតូ លោក Alexus Grynkewich បានលើកឡើងកាលពីថ្ងៃចន្ទថា ផែនការរបស់យើងគឺស្ថិតក្នុងដំណាក់កាលចុងក្រោយហើយ។

លោកបន្តថា៖ « ប្រសិនបើកិច្ចប្រជុំដំណើរការល្អ […] យើងប្រហែលជា អាចប្រកាសនៅចុងសប្តាហ៍នេះ ពីអ្វីដែលយើងកំពុងធ្វើការលើរឿងនេះ »៕

ប្រែសម្រួល៖ ណឺ មិនា