អ៊ីរ៉ង់ ផ្តាំទៅអាមេរិកថា ការវាយប្រហារយោធា មិនអាចកម្ទេចកម្មវិធីនុយក្លេអ៊ែរបានឡើយ 

ជាការបង្ហាញជំហរដ៏ម៉ឺងម៉ាត់របស់ទីក្រុងតេហេរ៉ង់ រដ្ឋមន្ត្រីការបរទេសអ៊ីរ៉ង់ Abbas Araghchi បានប​ញ្ជាក់ច្បាស់ៗសាជាថ្មីថា ការវាយប្រហារយោធា មិនអាចកម្ទេចកម្មវិធីនុយក្លេអ៊ែររបស់ខ្លួនបានឡើយ។

សារព័ត៌មានអ៊ីស្រាអែល Jerusalem Post បានដកស្រង់សម្តីលោក Araghchi ដែលអះអាងកាលពីថ្ងៃសុក្រទី២០ខែកុម្ភៈថា៖ មិនអាចយកយោធាមកដោះស្រាយកម្មវិធីនុយក្លេអ៊ែររបស់ទីក្រុងតេហេរ៉ង់បានឡើយ ​ហើយការវាយប្រហារគ្រាន់តែអាចធ្វើឲ្យខូចខាតដល់ទីតាំងមូលដ្ឋាននានាប៉ុណ្ណោះ ប៉ុន្តែមិនអាចលុបបំបាត់បច្ចេកវិទ្យា ឬចំណេះដឹងដែលអភិវឌ្ឍបានដោយអ្នកវិទ្យាសាស្ត្រអ៊ីរ៉ង់បាននោះទេ។

យ៉ាងណា លោកទទួលស្គាល់ថា ទីតាំងនុយក្លេអ៊ែររបស់អ៊ីរ៉ង់ ពិតជារងការខូចខាតយ៉ាងធ្ងន់ធ្ងរមែន ស្របពេលនៃការប្រឈមមុខដាក់គ្នានាពេលកន្លងមក ជាពិសេសកាលពីខែមិថុនាឆ្នាំ២០២៥តែម្តង អំឡុងជម្លោះរយៈពេល ១២ថ្ងៃ ជាមួយ អ៊ីស្រាអែលនិងសហរដ្ឋអាមេរិក។

ឥឡូវលោកព្រមានថា ការពឹងផ្អែកលើកម្លាំងបាយ នឹងមិនអាចបង្ខំឲ្យទីក្រុងតេហេរ៉ង់ អនុលោមតាមការទាមទារពីខាងក្រៅបានទេ។ អ្វីដែលសត្រូវមិនអាចសម្រេចបានតាមរយៈសង្គ្រាម ក៏នឹងមិនអាចទទួលបាននៅឯតុចរចាដែរ។ រាល់សកម្មភាពអរិភាពថ្មីៗ នឹងត្រូវសងសឹកវិញដោយការឆ្លើយតបយ៉ាងខ្លាំងក្លា និងធំធេងបំផុត។

ការព្រមានរបស់លោក Araghchi កើតឡើង បន្ទាប់ពីប្រធានាធិបតីអាមេរិក ដូណាល់ ត្រាំ កំណត់ឱសានវាទពី ១០ ទៅ ១៥ថ្ងៃ ​ឲ្យអ៊ីរ៉ង់ដោះស្រាយ​​បញ្ហានុយក្លេអ៊ែរ បើមិនចង់កើត​រឿងធំ។

ថ្លែងក្នុងកិច្ចប្រជុំលើកដំបូងនៃ «ក្រុមប្រឹក្សាសន្តិភាព» នៅទីក្រុងវ៉ាស៊ីនតោន លោកត្រាំបញ្ជាក់ថា ដ្បិតការចរចាកំពុងទៅមុខដោយរលូន ក៏​អាមេរិកអាចនឹងឈានមួយជំហានទៀត បន្ទាប់ពីការវាយប្រហារតាមអាកាសកាលពីខែមិថុនា ដែលលោកអះអាងថាបានបំផ្លាញសមត្ថភាពនុយក្លេអ៊ែររបស់អ៊ីរ៉ង់យ៉ាងដំណំ។ លោកបានសង្កត់ធ្ងន់ថា «ពួកគេមិនអាចមានអាវុធនុយក្លេអ៊ែរបានទេ… អ្នកមិនអាចមានសន្តិភាពនៅមជ្ឈិមបូព៌ាបានឡើយ ប្រសិនបើពួកគេមានអាវុធនុយក្លេអ៊ែរ»។

សូមជម្រាបថា ទោះបីជាមានការគំរាមកំហែងក៏ដោយ កិច្ចប្រឹងប្រែងផ្នែកការទូតនៅតែបន្ត ខណៈអ្នកចរចាអ៊ីរ៉ង់ និងអាមេរិកបានព្រមព្រៀងគ្នាលើ​គោលការណ៍​មួយ​ចំនួន​កាលពីថ្ងៃអង្គារ ប៉ុន្តែសេតវិមានបានបញ្ជាក់ថា ភាគីទាំងពីរនៅតែមានចំណុចខ្វែងគំនិតគ្នា។ វ៉ាស៊ីនតោនចង់​ឲ្យ​អ៊ីរ៉ង់បោះបង់ការចម្រាញ់អ៊ុយរ៉ាញ៉ូម និងមីស៊ីលបាលិស្ទិកទាំងស្រុង ប៉ុន្តែអ៊ីរ៉ង់បដិសេធ​ការ​ពិភាក្សាលើសពី​កម្មវិធី​នុយក្លេអ៊ែរ៕

អត្ថបទ៖ សុខ សុវណ្ណ